ليش الرجال مرتاحين والحريم هنا يتباكون ؟؟

بسم الله والصلاه والسلام على رسول الله

كل ماادخل هالقسم اقرى واتعجب مننا معشر النساء ليش احنا دايم نشكي وكل مشاكلنا وهمومنا او اقول ثلاث ارباعها من الرجل يعني فعلا مثل مايقولون الرجال اننا خلقنا تبع لهم ؟؟ يعني مالنا حياه بدونهم او بمعنى اخر حياتنا تنقلب علشانهم
طيب ليه الرجال ماهمه شي يعني لو زوجته زعلت منه او تهاوشت معه راح حط راسه ونام والا طلع مع اخوياه يسولف ويضحك والا حتى راح جلس على النت او التلفزيون وعاش حياته
ليه الرجال لما تصير مشكله بينه وبين زوجته يمارس حياته طبيعي ولا يفتح موضوع ويشكي مثلنا ؟
تدرون ليه لان الرجال هنا عارف انه عايش حياته له هو مو تبع ورى الحرمه
يمكن احيان الحرمه هنا علشان الناس تشيل هم والا تدور مليون حل وحل علشان ترضي هالرجال بس علشان الناس ماتتكلم عليها
ترى ربي خلقنا ذكر وانثى وكل واحد سكن للثاني مو تبع او ان حياته ماتتم الا بالطرف الثاني


ياحريم يابنات ليش لما مثلا زوجي يتهاوش معي اشيل هم الدنيا فوق راسي اذا انا غلطانه اعتذر صح وطبيعي هالشي مع الناس كلها مو بس مع الزوج واذا كان هو الغلطان ليش مااعيش حياتي طبيعي مثله

اشوف ان اغلب الحريم تجي هنا تشتكي لانها مقهوره او مظلومه او مهانه من رجال وهو متبطح ولا درى عنها ويمارس حياته بكل اريحيه
احنا خلينا الرجال يتسلطون علينا ويفردون عضلاتهم وخليناهم يتأكدون اننا بدونهم ولاشي
صحيح احنا عاطفيات لكن عاطفتنا لازم نفرغها باماكن معقوله يعني نربي فيها عيالنا ونحتويهم فيها والزوج ان كان تعامله كويس نعطيه من هالعاطفه وان كان العكس ليش نحترق علشانه
مليون مره اقول ترى وربي الدنيا مو بس رجال حسسيه انك تعيشين فيه او بدونه وان الدنيا للعباده مو بس للمشاكل والشغل والهواش الى متى نشيل الدنيا كلها فوق روسنا على انسان ممكن بأي لحظه يتخلى عننا او يدور انسانه ثانيه غيرنا


انا ادري ان مجتعنا للاسف يعتقد ان الحرمه مستحيل تقدر تعيش بدون رجال ودايم يناظرون للحرمه الي ماعندها زوج انها ناقصه لكن لو الوحده حطت الموت قدامها وبكره ربي بيسألها عن عملها وعبادتها له كان عاشت مرتاحه

الزبده من الموضوع لو الرجال الي قدامك سوى اي شي يقهرك او يحزنك طنشيه ومارسي الي تحبينه من امور الدنيا لاتجلسين تصايحين وتنامين ودمعتك على خدك وتشيلين الدنيا كلها فوق راسك وهو قاعد يشاخر
ولاتنسين ملك الملوك ادعيه ان ربي يهديه وادعي لنفسك اهم منه ادعي ان ربي يتقبل منك عملك ويستر عليك وبعد الدعاء روحي مارسي حياتك