ليش المديرات متسلطات وكأنهم بالعسكرية ؟

بنات ليش كل مديرة مدرسة تلاقينها متسلطة وماتتكلم مع الوحده الا من راس خشمها او تجلس تحمر لك عينها وتحسسك كأنك مب عاجبتها ؟!!
ماقد مرت علي مديرة طيبه وحبوبه من الابتدائية لين تخرجت من الثانوية ..كلهم نفس الشاكله
دايما احس المديرة تتعامل مع الطالبات وأحيانا المعلمات بشكل يخليك تحسين نفسك بالعسكرية مب بمكان علم وتعلم ؟!!
اذكر يوم كنت بالمتوسطة مديرتنا نادت ع معلمتنا رسلت لها الخاله وهي كانت تشرح لنا الدرس وماجات حسيت من وجهها كذا كنها متضايقة وماتبغى تنزل المهم الا وشوي تناديها المعلمة وتطلع برا الفصل والمديرة تحت وهي فوق بالدور الثاني وتخاصم فيها والمعلمه يوم ترد ، ترد عليها المديرة بهواش شويه وتآكلها ؟!!!
دخلت مدرستنا الفصل ووجهها حيييل متغير عمري ماراح أنسى تعابير وجهها بذاك اليوم
ونفس المديرة هذي كانت كل ماشافت وحده من الطالبات تطالع فيها بتحميرة عين ومستحيل تبتسم لطالبه يمكن النفسيه تحس ان الابتسامه راح تقلل من قدرها عند الطالبات او تطيح هيبتها !!
و موقف ثاني صار لي بالثانوية . هو اني غبت فيه عن اختبار نهائي بسبب الحمل جاني طلق وانا احسب ولادة وغبت وماستقرت حالتي آلا الظهر و اليوم الثاني اروح المدرسة طبعا المعلمات والادارايات كلهم زي العسسسسل يسلمون علي ويسألون عن حالي .. ومعلمة نفس المادة قالت أبشري ولا عليك بعيد لك الاختبار ومن ذا الحكي وتجي المديرة وهي مكشرة تسأل سلامات ليش غايبه ؟ قلت لها تعبت وجاني طلق وحسبت انه ولادة وغبت قال خلاص انتي الحين تعتبرين راسبه وبتعيدين الاختبار ومانختبرك لين تجيبين عذر طبي >>اقولها الطلق جاني بالبيت ومارحت المستشفى وهي تقول ما اختبرك لين تجيبين لي عذر طبي ؟!!
قلت يعني مايصير اختبر بذا الأسبوع قالت لا ما نختبرك الا بعد الاختبارات ب اسبوع أظن او أسبوعين او نختبرك بداية السنه الجايه ع خير وبس وراحت كلمت المدرسة وقالت والله انا ماعلي وإني ابي اختبرك لو اليوم ماعندي مشكله بس المشكلة بالمديرة وقالت بكلمها وحسيتها كذا مترددة كأنها عارفه ان المديرة متشددة ..
وتخيلوا نفس هذي المديرة يوم مرضت وغابت وحطت وحده بدالها تمسك الادارة ان الأمور في المدرسه تمشي بالسهالات
وحده غابت وبدون عذر و باختبار نهائي اختبروها وخلصوها والطالبه تقول لو ان المديرة موجودة كان ماختبروني
ولا مديرة مدرسه ثانيه بالثانوية جيتها بتسجل بالمدرسة وانا طبعا متزوجه ومعي جوالي بشنطتي ،،، دخلت وكلمتها عشان اتسجب مو عشان أداوم وانا نازله رِن الجوال وهي سمعت وتطالع علي مدري كيف بس ماقدرت تتكلم ويوم جيت أداوم اول يوم تقول لي تعالي اشوف وش عندك بالشنطة يمكن جايبه جوال ولا شيء وتفتش شنطتي ومالقت شيء اللهم لقت مرطب شفايف وتقول ماشاء الله مرطب شفايف وقالت للمعلمه اسحبيه منها أخذته وقلت لها عادي مو مشكله حلال عليك الخمسه ريال وتقول انتي وش قصدك هاه وتطالع فيني وكأنها بتقتلني قمت أخذت شنطتي ومشيت ...
ومواقف كثييييييرة شفتها وحصلت تغث النفس ..
بس ابغى اعرف ذولا وش يحسون فيه ؟ ابغى اعرف المديرة نست انها في البداية والنهاية هي مجرد معلمة مثلها مثل زميلاتها ؟!!
تدرون انا احس لو ان كل معلمه يخلونها ماتمسك الادارة غير سنه وحده وبس وترجع لشغلها الأساسي كان ماشفنا ذي العينات المتسلطة ؟؟؟ أنتم وش رأيكم ؟