ليش الي عندها اخوات حياتها الأجتماعيه افضل

السلام عليكم
انا خلقني الله وحيدة اهلي ماعندهم غيري
لاكني اجتماعيه عندي صديقات بنات جيران
نجتمع سوا
يجوني اجيهم
لاكن يوم احضر زواج او اي مناسبه الكل يسحب علي
كل اخت مع اختها او مع صديقاتي مع بعض
اجي بسولف معهم محد يعطيني وجه
احاول ادخل معهم بسوالف يردون على قد سوألي ثم يكملون ضحك مع بعض
لما اخش بسولف معهم كلهم يسكتون ويناظروني لين اخلص اذا خلصت قالو ايوا المهم نكمل لكم السالفه ويضحكووون ولا كأني قلت شي
بنات معمي مايعترفون فيني ولا بنات خالي ولا بنات عمتي ولا بنات خالتي
قسم بالله اني اتكلم معكم من جد
اذا جوني للبيت وااااااو يامحلاهم لاكن وقت العيد وزواجات ولجمعات والله كأني طوووووفه
انحرجت قدام امي يوم تناظرلي نضرات الشفقه
عندي بنت عمرها 7سنوات تلعب مع الأطفال وكل شوي اناديها بس عشان مااكون صنم قدام الحريم
اخر شي قالت ها يماما طفشتيني كل شوي تناديني
كرهت الجمعات بسبب اني اكون لحالي
مع اني جريئة واسولف واضحك لاكن الكل يتجنبني
كأنهم يكرهون الي ماعندها اخوات
قسم بالله اني اكتب لكم ونا اصيح وخانقتني العبره
وكل يوم ونا على هلحال
تعبت من التهميش
تعبت اني افرض حالي على احد
تعبت وناابادر بكل شي
عندي زواج قريب لقريبتي وشايله هم
حتى الرقص كل ثنتين مع بعض يرقصون ويشجعون بعض ونا ماني قادره ارقص لحالي
والله ماعندي عداوات ولا عمري ضريت احد بكلمه
وبلعكس يحبوني لاكن مايتقبلون يكونون معي بالجمعات
الي عندها حل تقولي
لان عندي زواج لوحده تقرب لي
واهل زوجي بيحضرون ومابيهم يقولون ماكأن الزواج يقرب لها لان قسم بالله كأني غريبه محد يقدر يتكلم معي
كأنهم ماهم شايفيني
ياليت عندي اخت اهرج معها وتهرج معي بمثل هلمواقف