ليش انتم كذابين يا حريم عالم حواء !!!

السلام عليكم ورحمة الله وبركااته :-

^


^
قبل اقول اي كلمه على موضوعك لي تعليق على سلامك بالبدايه ليه تقولين السلام على من اتبع الهدى هاذي الكلمه ماتنقال للمسلمين مايحضرني اسم النبي اللي قال هذا السلام لاحد من قوم كانومن غير المسلمين لان السلام هو الرحمن انا كنت مثلك فنصحني ابوي قال هذا الكلام لغير المسلمين واخيرا مشكوره على موضوعك وانت صادقه الله يجزاك خير ..

والله اني كتبته من حسن نية وما قصدت اي شيء لكن ارجع اكتبها ومشكورة ع النصيحة ويالله تخلي لك ابووك وتطول بعمرهـ
^


^

اعرف راح تعصبوون من العنوان بس والله هذا

الحاصل وهذا اللي قاعد يصير بيننا وهنا داخل اروقة هذا القسم


وقسم الحياة الاجتماعية


بتقولون : وش قصدك وليه وكيف وشلوون ؟


بقولكم ليه وكيف !!



مثلا لما وحدة من الاخوات تطلب مننا النصيحة يا بمشكلة بينها وبين زوجها يا بينها وبين خالتها او عمتها او اختهاا



هي عارفة الحل صدقووني وتدري وش الصح ووش الغلط بس احيانا الوحدة مننا تحس بلحظة يأس .. بلحظة


ضعف .. بخووف وتبغى احد يوقف معاهاا .. احد تحس معه ومنه بالأمان .. ويكون هذا الامان رائع خصوصاً


اذا كانت بجانب احد نعرف ومتأكدين انه ما يجي بيوم من الايام وهالشخص هذا يحسسك بحاجتك له وانك انذليتي


له بيوم واحتجتيه او احتجتيهاا يعني بالعربي مافيه مثل المنتدى والحرية بالكتابة والنصائح والوقفة اللي توقفووها


مع بعض والا ادعيتكم لبعض !!


يالله رووعة يوم ادخل موضوع كل وحدة تدعي للثانية دعوة بظهر الغيب .. دعوة من قلوب طاهرة نقية صافية


احسبها كذلك والله حسيبهاا ..


الزبدة بالموضووع


لما تكتب وحدة موضوع مثل

جميلة : تعالوا شوفوا زوجي وش سوا فيني ؟

ترد بهية : اضربيه واطلعي وسووي وافعلي واعملي ..


تكتب سناء : تهاوشت مع بنت جيراننا وتبي تضربني .. وش اسووي ؟

يجيها الرد من رانيا : خذي لك عجرا كبر راسها وافلقيهاا لين يطلع الدم ..


وايمان تكتب : عندي خمس اطفال وزوجي طلقني وش اسووي ؟

تنط اختنا بالله وهي ماعندها غير طفلين نسميها رجاء .. ارميهم بوجهه خليه يربيهم لحاله ويعرف قيمتك هذول


الرجاال ما يبغى لهم الا العين الحمراء روحي عيشي حياتك وتزوجي ..


وتمر الايام ويمكن السنين ونلقى بهية كاتبة موضوع عنوانه :

الحقووني زوجي ضربني وش اسوي ؟

هماك يا بهية رديتي على الضعيفة جميلة تقولين لها اضربي رجلتس وعمليه قيمتس !! وينتس عن زوجتس


ليه ما تضربينه وتطلعين شخصيتس عليه ؟ والا جميلة زوجها بهيمة ينضرب وانتي رجلتس بني آدم ما يحق لتس


تضربينه ؟



وبعد اسبوع من قصة سناء مع بنت جيرانهم الا رانيا كاتبة موضووع ... كان عنوانه :


ياعالم تخاصمت مع بنت جيراننا وصلت فينا الضرب .. وش اسوي معاهاا ؟


مو انتي يا رانيا قلتي لسناء خذي لك عجرا وافلقي راس بنت جيرانكم !! وين العجرا هذي عن بنت جيرانك ؟


روحي لها وافلقيهاا !! ردت رانيا بعنجهيه : وين عايشة انتي هذا اسلوب همجي مستحيل امد يدي على بنت جيراننا !!

يا سبحان الله بس سناء عادي تنصحينهاا تمد يدها على جارتهم .. اكيد لانك تربية راقية وسناء تربية حواري صح !


ويوم قرينا عنوان :


طردني واخذ اطفالي وش اسووي انصحوني انا متحطمة ؟

نتفاجأ ان كاتبة الموضووع رجاء !!


ارد عليها اتركيهم مع ابوهم خليه يتربى وروحي عيشي حياتك وتزوجي وانبسطي ..

ترد وهي شوي تبكي : حرام عليك هذوول عيالي قطعة مني ماقدر اعيش بدونهم وبعدين وين اتزوج ؟ البنات وهم


بنات ماهم لاقين رجال انا ام طفلين ومطلقة بلقى لي رجال ؟ وحتى لو لقيت انا ابي عيالي مابي اتزوج !!

يا سبحان الله يوم انك رديتي على ايمان وهي عندها خمس اطفال تقولين لها ارميهم على ابوهم وعيشي حياتك وتزوجي


وماعليك منهم .. نصحتيها يمكن لان ايمان عيالها مو بشرر وهي ماعندها قلب أم .. بس انتي عيالك غير وانتي


قلبك غير قلب ايمان وانتي ما تتحملين فراق عيالك وهي عادي تتحمل !!




هااهـ يا حلووات وش رايكم بالقصص تراها كلها من خيالي لا تجي وحدة تقوول انتي تقصدين والا ايش قصدك


والله العظيم قصدت به كل خير ان شاءالله


حبيت بس اووصل للي تنصح وترشد وتكتب ياليتهاا تنصح من قلب وترشد اختها للطريق الصح واذا بتحلين مشكلة


اي وحدة او ترسلين لها رسالة ياليت واتمنى تكون من قلبك وتتذكرين ان ربك فووقك بيحاسبك ومثلي هالقصة

والا المشكلة كنها انتي او اختك من امك وابوك ولا تكونين سبب دمار بيت وانتي موب دارية كوني صاحبة أُسس


وعقلانية وواقعية بردودك وكوني سبب في عمار البيوت لا بدمارهاا


ترانا نثق فيكم وفي آرائكم يا بنات ويا حريم ويا مشرفات عالم حوواء عشان كذا اتقوا الله فينا وخافوا ربكم وانتم


تنصحوون وتوجهوون تكفوون ترى ما كتبنا وشكينا لكم الا من يأس ومن قهر ومن الم راعونا وكونوا الامهات


والاخوات والقلوب البيضاء اللي نستمد منها قوتنا وطهرنا


استودعكن الله جميعاً ,,,,,,:26:

تنويه :-

الموضوع من كتاباتي ومن تأليفي << ارحمينا يا شيخة ههههه

لكم حرية النقل بدون ذكر اسمي ولا المصدر لاني مشهورة بكل مكان راح اكفشكم :)


تنويه آخــــر :-

اعذروني ماقدر ارد لاني جديدة هم يقولون اني جديدة بس من اول ما فتح المنتدى وانا هنيا مسنترة واخبر عضوات كثير اللي راحت واللي توفت واللي ماندري عنها واللي داخلة بستين الف معرف ( ماني منهم هع هع هع )

اختي اللي زعلت من هالكلمة اعتذر ماقصدت الا النماذج اللي كتبتها ما اقصدكم كلكم والمعنى ببطن الشاعر على قولتهم بس صدقيني مو الكل سوا فينا الكذابة وفينا المريضة نفسياً وفينا المنافقة وفينا المتلوعات من الدنيا وفينا الصادقة وفينا اللي مبسوطة وحياتها تووب بس تخاف من العين وتكذب وتكتب مشاكل غير واقعية البته وفينا اللي تحب تتجسس وماغير تفرفر بالملف الشخصي وتدور بس خيط ومخيط حتى تمسك فلانة وتروح تنشرهـ والا تطبعه والا تنسخه على سي دي وتوزعه ع الجماعة والا اللي مسنترة بملفك 24 ساعة مادري وش تحس به يومها تسنتر واللي قدام الكل عاقلة وخدوومة وراعية مواقف نبيلة وهي من داخل فارغة فاضية مسكينة تدور بس على احد تتقرب له ولو بالطرق البشعة والملتوية واللي تدور ممسك على مرت اخوها والا بنت عمها والا اخت رجلها حتى تذلها والا تعايرها
صدقيني اختي فيه نوعية نااس كثيرة بعضها عشنا معهم وبعضهم حسينا فيهم والبعض من بعيد بس الله يكافينا شرهم ويلهيهم بانفسهم ويشغلهم بطاعة الله حتى يفكوننا من شرهم