برج بيزا بدا الشغل عليه بتاريخ 8 أغسطس 1173م، لما وصلوا الطابق الثالث سنة 1178 بدا البنيان يميل بسبب ضعف الأساسات (كان عمقها 3 امتار بس) والتربة التحتية كانت هم ضعيفة مو مستقرة.
يعني التصميم كان مكانه غلط من الأول.
وتوقف شغل البرج لمدة قرن بسبب الحروب المستمرة بين جمهورية بيزا و جمهوريات جنوى ولوكا وفلورنسا وضعف الميزانية. على مدى هالفترة الطويلة التربة استقرت بمكانها وصارثابت بمكانه
سنة 1272 ردوا اشتغلوا عليه والمهندسين يعني يبون يرقعون الميلان ولا يسوون صوب الطرف المايل من البرج شوي أطول من الجهة الثانية عشان يرد مستقيم ويثبت، من جذي بالأخير طلع البرج هم مايل وهم منحني والحركة هذي خلته يغوص أكثر لي داخل. بس قبل لا يخلص هم رد وقف الشغل عليه سنة 1284 بسبب انتصار جمهورية جنوى على بيزا في حرب ميلوريا
ردوا اشتغلوا عليه بعدها ووصلوا الدور السابع سنة 1319، البرج كله خلص سنة 1372م مع انتهاءهم من غرفة الجرس الرئيسية في الطابق الثامن والأخير. بعدها قاموا يحطون الأجراس السبعة في طوابق البرج، كل جرس يمثل إيقاع من الإيقاعات الموسيقية وكل واحد مسويه مصمم مختلف وبينهم وبين بعض تقريباً 100 سنة.
بالأخير تقدر تقول 200 سنة علما خلصوه!
سنة 1990 إلى سنة 2001 كان في مشروع كبير لتدعيم وتنظيف البرج من التآكل وتغير اللون بعد كل هالسنوات الطويلة وتأثير الشمس والرياح والأمطار على الأحجار.
يعني البرج مشهور بس لأنه مايل ؟
لا، البرج مشهور لأنه تحفه معمارية وتاريخية وفنية في نوع الديكور والبناء من العصور الوسطى لأوروبا. ولا ترى حتى الكنيسة والمعمودية هم غايصين وفيهم ميلان وحسب ما قريت في أبراج ثانية هم مايلة بالمدينة وعندهم نفس المشكلة.
منو اللي بنى البرج أو طلع بفكرته ورسم مخططه؟
الغريب لي الحين محد متأكد منو مصمم البرج ومسوي تخطيطه الرهيب -إي التخطيط رهيب بس مكانه غلط مثل ما قلنا-. كانوا حاصرين الأسامي المحتملة بين جم واحد بس دايما يلقون شي يثبت انه مو حقهم وبالأخير محد متأكد.
شنو الهدف من البرج أصلاً؟
الهدف كان شوي سياسي وشوي سياحي وفني، بيزا كانت جمهورية قوية عسكريا ولها نفوذ ورهبة وهي بعز ايامها. قرروا يبينون شكثر اهم متطورين وأغنياء عن طريق مشروع بناء كاتدرائية اسمها ميدان المعاجز – the Field of Miracles. الكاتدرائية هذي كان على اساس يكون فيها كنيسة + معمودية + برج جرس + مقبرة.
تفاصيل سريعه عن البرج:
طوله في أعلى نقطة من الجهة المايلة يصير 56.67م ومن الجهة الثانية 55,86م.
وزن البرج يقولون يوصل 13.154.178 كيلو جرام!
يميل بنسبة 3.9 متر أفقياً.
فيه 8 طوابق و207 أعمدة و 296 درجة سلم بس يقولون الظاهر شالوا عتبتين مع عمليات الصيانة وصاروا 294.
صور من البرج:
هذي الصورة من الطابق الثامن للبرج وتشوفون نهاية الدرج:
هذي من الطابق السابع من الداخل:
هذي من الطابق السادس:
هذي مجموعة أوزان ضخمة حاطينها على الصوب البارز من أرضية البرج عشان يعادلون الوزن.
الباب الرئيسي للبرج:
هذا الجرس اللي حاطينه بالطابق الخامس من البرج وإسمه La Pasquereccia or La Giustizia:
المصادر/
ويكيبيديا
وشكرا على هالمووضوع الممتع ^^
سبحان الله وبحمده
سبحان الله العظيم
أستغفر الله العظيم وأتوب إليه