ليش تدعي على أولادها؟!!! :(

• صباح /مساء الخير 🌸

لفت نظري بعض الأمهات تدعي على أولادها وبناتها وكأنهم أعداء وأنهم السبب في تعاسة حياتها وأنها صابرة عالقهر بسببهم وهي اللي قاهرتهم تصحى وهي تسب ،وتنام وهي تدعي ،وتقول أنا جالسة عشان ما يضيعوا بعدي وربي يحاسبني فيهم وهي اللي مضيعتهم وإذا نصحتيها تقولك نحنا تربينا كذا ومافينا إلا العافية لا تعبت نفسياتنا ولا مرضنا. طيب هذا اللي تسويه أيش اسمه؟ لو ما تأثرتي بالتربية القاسية ما بتكوني كذا ..والأسوأ اللي تنصحيها وتزود الدعاء وتدعي بدعوات تزلزل العدو وتندمين إنك تكلمتي ،واللي تقول الدعوات مو من قلبي بس عشان يحسوا فيني ،طيب وإذا ربي استجاب دعواتك ؟ بتكوني مبسوطة؟ ..يا رب اهدهم و عافهم مما ابتليتهم به ولا تبتليني ..إذا كنتي كذا ومو مرتاحة بحياتك مع زوجك لا تصبري وتقولي بجلس عشان أولادي لأنك كذا بتأذيهم أكثر ،،صدقيني إذا كنتي كذا فإن أولادك يتمنون مفارقتك. ليش بعض الأولاد إذا كبروا يفارقوا أهلهم ويفضلوا جلسة أصحابهم على الجلسة مع أهلهم؟ الكلام القاسي والدعاء عليهم أثره أقوى من الضرب أشوف اللي تضرب أهون من اللي تدعي عليهم ..الضرب بساعته وينساه بس الدعوات ما يعرف الواحد متى تتحقق. يمكن يكون ضياع ولدك في شبابه بسبب دعوة وهو صغير يمكن اتعرف على صحبة السوء بسبب دعوة يمكن مرضه بسبب دعوة ..إذا كنتي كذا حاولي تغيرين نفسك حتى لو صعب عليك لأن تغيير العادة صعب بس الجأي لله بالدعاء وحاولي تتغيري ..بدل ما تدعي عليهم ادعيلهم ،ما تقدري تدعيلهم وأنتي معصبة استغفري واذكري الله.. إذا غلطوا استري عليهم مو تمشي بين الناس وتفضحي فيهم .ادعي في كل صلاة بالهداية والصلاح ،،خلي ذكر الله على لسانك دائمًا ..كتبت الموضوع لأني أنحرق لما أسمع وحدة تدعي على أولادها أو تكشف سترهم قدام القريب والغريب، .. أنا ما أنزه نفسي عن الغلط وإني ما أعصب عليهم أو أتضايق منهم بس أحاول قد ما أقدر إني أدعي لهم بالهداية وقت غضبي أو أذكر الله ..قبل يومين نرفزتني بنتي وقلت حسبي الله ونعم الوكيل بنبرة غضب وزعلت البنت وجلست تبكي وليش تدعي علي أنا بنتك ،ولو هاوشت وخاصمت ما تزعل كذا صغيرة وأثرت فيها حسبي الله ونعم الوكيل كيف اللي تصبح وتمسي بدعوات تسم البدن،، الله لا يجعلنا منهم ويهديهم ويهدينا للحق والصواب الله يحفظ لنا أولادنا ويجعلهم قرة عين لنا ولا يرينا فيهم ما يسوؤنا ..سبحانك اللهم وبحمدك أشهد أن لا إله إلا أنت استغفرك وأتوب إليك