ليش تفكير الناس فينا كذا نفسي اعرف السبب

السلام عليكم
كيفكم بنات
ابغى اقول لكم موقف صار لي اليوم موقف مرة محرج و في نفس الوقت مؤلم
اليوم زوجي وداني الدوام لان عنده موعد في المستشفى المهم نزلني القسم حقي بصمت حضور و شلت عبايتي و لبست البالطو حقي و رحت معاه للعيادات الخارجية علشان الموعد حقه وزوجي لابس لبس رسمي ثوب و شماغ لانه رايح مكان عام المهم مشيت انا وياه لين وصلنا العيادات و اعطى موظفة الاستقبال ورقة الموعد و رحنا على جنب لين ينادون عليه احنا واقفين نسولف مع بعض و نتكلم عن تجهيزات رمضان و كيف بيكون دوامي و من هالكلام جات الممرضة ونادت اسمه و دخل للدكتور ما دخلت معاه لان موضوع مرضه حساس بالنسبة له و كنت ابغاه ياخذ راحته مع الدكتور بدوني المهم يَ بنات جتني وحدة و هبت فيني وتصارخ اتقي الله في نفسك اتقي الله في اهلك اللي وثقو فيك وخلوك تشتغلين في هالمكان و انا اتلفت يمين يسار وش السالفة تكلم مين هذي قلت لها حبيبتي وش فيك قال الله لا يحبك خير انتي واياه لا حياء و لا حشيمة للناس الموجودة واقفين مع بعض و تبربرون و تضحكون كأنكم في مقهى مو مكان عمل محد خرب سمعة الممرضات الا انتي و اشكالك قلت لها وش فيك وش السالفة علشان اعرف ارد عليك وربي ي بنات قلبي يرجف من الحيا وعرقت وما عاد ادري و اقول ما احب هالمواقف قالت لي مسوية ما تدرين وش السالفة قاعدة تسولفين مع شخص لاهو محرم لك ولاهو من قرايبك ب اسم زميل عمل و قلة الحيا حقتكم قلت لها ترا انتي فاهمة الموضوع مرة غلط و جاية تهاجمين بدون وجه حق قالت يلا نوريني فهميني قلت لها ترا ماني مجبورة لا ابرر لك ولا افهمك بس لانك لميتي علينا الناس بدون سبب راح افهمك و فتحت شنطتي وطلعت البوك و اعطيتها كرت العايلة يوه ي بنات الادمية ما عاد نطقت بحرف تلعثمت ما عاد تدري وش تقول الا على طلعة زوجي و شاف الناس ملتمين سأل وش فيك قلت له سوء تفاهم قعدت تعتذر و انا اسفة وما ادري ايش و الناس يهاوشونها و اللي يقط كلام المهم قلت لزوجي يلا خلينا نطلع من هنا اه ي بنات تمنيت الارض تنشق و تبلعني ولا انحط بهالموقف ليتها جات ونصحت ب اسلوب و هدوء بيني و بينها بدون ما تلم علينا العالم والله ي بنات اني محتشمة ولله الحمد نقابي ضيق و طرحتي طويلة لين نص بطني و تنورتي طويلة مغطية كعبي و لابسة بنطلون اسود من تحت التنورة كل هذا علشان لما امشي او يجي هوا او اطيح لا سمح الله ما يبان مني شيء و البالطو حقي لين نص الساق وش اللي خلاها تفكر كذا ما ادري اه يَ بنات كل شوية ادخل الانستقرام و تويتر اشوف لا يكون احد صور اللي صار و انتشر و يبدون يتمصخرون العالم ادعولي ما يكون احد صور والله يمكن احبس نفسي في البيت معاد اطلع 😭😭😭


بنات كلمة اخيرة ترا مو كل من اشتغلت في مكان مختلط يعني ما تستحي وقليلة ادب فيه بعضنا مجبورين و بعضنا حابين مهنة الطب لانها شغلة انسانية ما تدرون قد ايش افرح لما اعالج حرمة كبيرة و تدعي لي يكفي تقول لي روحي الله يفرجها عليك من واسع سماه ولا تقول لي جعلك ووالديك الجنة
ما انكر ان فيه بنات مخربينها لكن حسابهم عند رب العالمين ولو بغيتو تنصحونهم انصحو بطريقة حلوة علشان الوحدة تتقبل مو بهجوم و صراخ بالعكس تحطين نفسك و البنت في موقف بايخ جداً
و تقبلو مروري
و ادعو لي ي بنات انا في هم عظيم ما يعلم به الا ربي