ليش صرتي كذا انتي متغيره ماش تغيرتي علي

السلام عليكم
بعض العلاقات سواء أقارب او صديقات او خوات حتى
لكن خلونا نخص الصديقه كان عندي صديقه فاضيه تدق باليوم مرتين ثلاث ابد كل مافضت دقت علي تفضفض او تسولف او شي
طبيعتي هذي الأنسانه احترمها واحبها فدايم ارد عليها لها معزه خاصه عندي
طالت السالفه كل يوم ومرتين الى ثلاث مرات وسوالف مالها سنع اهملت دراست بنتي واهملت زوجي وبس على هاالجوال
الحد مامليت حسيت يومي يروح بالثرثره هنا صرت ما ارد ابدا بتاتا
وينك ماتردين الوووو الووو والله انا مشغوله انا طالعه انا نايمه وتصريفه ورى تصريفه ورى تصريفه الحرمه هجدت صرت ارسلها برود كاست عادي واسلم عليها بالواتس كلمة ورد غطاها لكن ماكالمااات مستحيل ولو دقت وانا متصل بالواتس ما ارد عليها اقولها ما اقدر ارد زوجي عندي
في يوم من الأيام زعلت مني جدا وقالت وش فيك قلبتي فجئه قبل تعطيني وجه وندق على بعض باليوم اربع وخمس مرات وتردين وش غيرك وش خلاك كذا وش قلبك علي السالفه مو مشغوله ولا زوجك السالفه منك انتي واضح وضوح الشمس انتي ماتبيني
قلت يا فلانه انتي عزيزه وغاليه واحبك ولا ودي اقطعك ابد
لكن والله ودي اصارحك ومستحيه انا المكالمات ٣ و ٤ مرات باليوم تقل مراهقات ماورنا بيوت ولا رجال اتعبتني والله واهملت بيتي ونفسي و٢٤ ساعه في ذا الجوال حاطته في اذوني تعبت عندك سالفه مهمه ابد بالواتس نتراسل وغيره ماعندي استعداد تعبت
هي طبعا عاتبتني انه ليش ماخبرتها كذا من الأول وكنت صريحه من البداية وانا قلت انه خفت تزعلين او تشيلين بخاطرك وقالت ابد عادي ولك اللي تبين ابد ماعاد ادق
وفعلا صارت تخفف ومره اختفت دايم انا ارسلها واتس اسلم عليها وكذا
فجئه ترسلي اليوم انا مليت من ذا الوضع انتي متناقضه قبل كنت تعطيني وجه وادق عليك ٣ و ٤ مرات ونسولف وننبسط وفجئه قلبتي وش ذا التناقض وش بيضرك اذا دقيتي علي ساعه يوميا نسولف وكلام وبربره وش كثرها حومت كبدي انا مارديت طنشت
انا الفتره اللي كنت اكلمها قبل قطعت السناب والانستقرام والتويتر تخيلو مافيه وقت ابد اتفرج كله معاها حتى اطفالي اهملتهم زوجي شايف وساكت
ماعندي مشكله اعطيها ساعه نسولف بالجوال بس ماش اخاف افتح على نفسي باب وترجع نفس قبل وساعه تجر ساعه وترجع حليمه العادته القديمه انا جد احترت مدري وش ارد عليها
ياشين التشره الزايد بالعلاقات تخلي الواحد يشيل هم ويكره يكون صداقات ويكتفي في اسرته وبيته والله العظيم انها عزيزه وغاليه علي لكن نفرني منها التشره الزايد ليش تغيرتي ليش ماعاد تدقين مثل اول ليش قبل ادق عليك باليوم مرتين وثلاث وعادي والحين بالاسبوع مره ولا لك خلق ليش وليش وليش