ليش نبذل في سبيل الله ونتصدق !

السلام عليكم ورحمة الله وبركاته
بدون مقدمات راح ادخل بالموضوع على طول ( ما اعرف اقدم )
كثير من المرات نكون نتسوق او نتمشي انا وزوجي او نشوفهم جنب الاشارات
يجون المحتاجين يمدون يدهم ونعطيهم المقسوم في اغلب الاوقات
مرة قلت لزوجي شوف هذي اجل هذي شكلها محتاجه ... شوف عبايتها شلون فيها تطريز اللوان ومسوية شعرها على فوق ( مبين من العباية لانها مرتفعه على فوق) .
او تجيك وحده وعليها سوارات ذهب او او او
المحتاجه تشوف حالها كسيفه من شكلها... انا ما اتشجع اعطي الا اللي اشوفهم فعلا محتاجين من اشكالهم
قال لي : وشو عرفك انهم محاتجين او مو محتاجين ؟
قلت له : من اشكالهم قلت لك .
قال لاتحكمين على اشكالهم ...وبعدين انتي تبذلين مشان وشو !
قلت له : مشان الاجر
قال: اوكي خلاص ...انتي انويها وعقدي النية انها صدقة وبذل وراح تاخذين الاجر سواء محتاجين او لا ..لان نيتك كانت بذل في سبيل الله .
قلت له: بس المحتاجين اولى بهالبذل
قال: انتي ماتدرين اذا محتاجين او لا ...هم مدو ايدهم لك ( مع اني ضد هالظاهرة واستحي انظر للي يمد يده ..افضل يشتغل ببيع الكلينكس ولا يمد يده ) ولاتدرين يمكن تردينهم وماتعطيهنهم ويكونوا فعلا محتاجين ويمكن لا
لذلك انوي الخير والبذل وربي يتقبل
وبكذا اقتنعت وخلاص ما انظر للشكل

اللي خلاني اكتب هالموضوع
اني قريت مواضيع كثيرة وبالخصوص لاحد الاخوات اللي تقول ان السعودية تساعد وتساعد وتساعد هالدول وهالدولة وووو وهم ينكروون ويتكلمون عنها بغير الخير
اقول اجرها واجرنا على الله مانبغى شكر
ربي يعطي بومتعب الصحه والعافية ويدفع عنه البلاء ويسعده دنيا واخرة
ومرة قريت لاخت ( بمعنى ما اتذكر حرفيا وشو كتبت ) تقول انها عطت وحده مبلغ وقامت هالوحده تصارخ عليها تقول بس يالبخيلة وووووو وهي اختنا انقهرت
انا مو ضدها لكن تحتسب الاجر وانها مادفعتها لهالحرمة
ادفعتها في سبيل الله

اكيد فية كثيييير اللي يبذلون لوجهه الله
وفية اللي مثلي اللي ممكن مر عليهم يوم يقولون ان مافية احد محتاج يو متعب ماقصر

اتمنى كلامي يكون فية منفعه لكم ولي في الدنيا والاخرة يارب
اتمنى كلامي مايضايقكم خواتي
دعواتكم