كانت نزايل بيت اهلي بإستراحه بس ماكانت مناسبة وحده كانت تمايم بنت اخوي وولد اخوي والنزاله بس مااشوف فيها شي اذا حط النزايل سواء بالبيت او استراحة الشخص له حرية الاختيار ولا تعقدون انفسكم مره

..


انا أئيد تكون في البيت واعزم فقط المقربين


وبالنسبة لصحون البلاستك .. والله برمضان احطها وش المشكلة
شغل رمضان يهد الحيل ,, وماعندي شغالة وواقفة من لصبح بالمطبخ

عالاقل ارحم نفسي من غسيل هالصحون
واا مقدرة ضيوفي بطبخي واستقبالي ماجت على الصحون اصير مو مقدرتهم لو حطيتها بلاستك !!


واللي بتزعل ترحمني من الاساس ولاتزورني برمضان
انا ضدددد الزيارات برمضان وخاصة الفطور
بس مرات اضطر ,, يجينا احد من برى الرياض مراجعة مستشفى وماشابه


..

انا لي وجهة نظر تختلف انا عمري ماثثت بيتي علشان اذا عزمت الناس يشوفونه

اعرف ناس لهم اثاثين اذا جاهم ناس شالو السجاد وحطو الجديد نزلو التحف فرشو المشايات بالاسياب

حطو الرميات على الكنب وزعو الخديديات على الكنب والارض ليش هالعذاب تعب قبل لايجون وتعب بعد مايروحون شيل وحط بالاثاث

انا ااثث لي انا لنفسي ولزوجي ولعيالي لبيت ترتاح فيه نفسيتي وين مالفيت وجهي القى شي يبهجني ويبهجهم حتى الجديد اللي اشتريه افرشه على طول

ناس يستغربون مني انه لاتفرشينه خليه بس وقت الضيوف قلت مافي اغلا مني ومن زوجي وعيالي بيدخل هالبيت ويجلس عليه حنا نستمتع به وننبسط عليه والناس اخر همي
اما الناس في رايي اللي تترك عيالها وكنها ماتعرفهم هاذ ي احط عليها اكس اتجنب اناديها حتى لو كانت قريبه الا في المناسبات الضروريه وبدون اطفال

طبعا الحياء يمنعك تهاوشين بيقولون علشان اثاث و قطعة كنب ولا خايفه على سيراميكها خلهم يقولون اصلا هاذي حجة اللي مايبي يتعب يربي عياله

وللاسف هذا راي اغلب الناس

واغلبهم اللي يجون يطلقون عيالهم في بيوت الناس ومخلينهم براحتهم يسرحون ويمرحون لو ببيتهم مايسوون اللي يسونه عند الناس


في الاخير قررت اني اذا عزمت مااعزم جمعات يعني اجتمع انا واختي بعيالنا مثلا انا وسلفتي مثلا انا وجارتي

انا وصديقتي طبعا باطفالهم بس قليلين واقدر اسيطر على الوضع

بطلت من الجمعات الكبيره كثرة الاطفال تخلي البيت ملاهي وتقلب البيت فوق تحت وقولي على الدنيا سلام

لو بغينا جمعه كبيره استراحه وقطيه والكل يرتاح

قصه يمكن ماتهمكم بس اعرف وحده توها ناقله شقتها وتعبانه في تاثيثها

وشي من جده وشي شاحنته من الرياض وشي مدري من وين المهم اول زياره

جمعه سوتها طبعا الاطفال عددهم ماشاءالله كثير
بعد ماراحو دولاب التخزين مكسور اوكرة الباب مخلوعه البويه اللي خلف الاوكرة مضروبه وطالع الاسمنت والتلفزيون خربان
الله لايبلانا ولايبلاكم
زوجها بغا ينهبل يقولون تونا ساكنين وهي لاتعليق
يعني بعض الحريم الله لايبلانا ماتعرف تقول لولدها عيب ولاّ تقول مابي اضربهم قدام العيال طيب اذا على كذا لاتاخذينهم معاك خليهم ببيت ابوهم

ولااقعدي معهم مو شرط تروحين تزورين اذا ماتبين تادبينهم قدام احد

عااااااااااااااادي جداآ...

اذا عزيمه وبيجي ناس كثير يحطونها باستراحه ..

وبالبيت يعزمووون كل عائله وحدهاا...

والله هذا اللي مقرره اسوييه من الحيين وانا بشقه وأجار..

كيف لو سكنت بيت ملك ...

وربي مايروووحون ضيوووفي الا انا هلكانه من عيالهم كل شوووي واحد يجيني بشيء ..

ويرووح يومي كله وانا ارفع عنهم بس..


الله يصلحهم ويرزقناآ بيت ملك عاجلا غير آآجل يآآآرب...

اذكر مره وانا توي عروس وابو العيال حاط البيت كله موكيت سكرررررررررررررري
وجتني صديقتي عندها ولد وحيدهاعمره حول ال خمس سنوات وانا قاعده اقهويها والا افقد الولد واروح والقاه فاتح الثلاجه
وماأخذ حزمة جرجير عندي وناثرها بالصاله وهات ياركض وفرك وهرس الى ان صار الموكيت لونين سكري وجرجيري
ويوم امه شافت حوسته ضحكت وقالت يالله تعال اجلس بكل برووووووووود حتى كلمة تأنيب ماسمعتها
لافيه ناس ابد ماتربي
الا والله خوذي إستراحه ترانا ندفع دم قلوبنا بالأثاث ولاعندنا إستعداد للتلفيات والكوارث..