بما إني من أهل الامارات ودبي بالتحديد ، قررنا السنة اللي فاتت أنا و 8 من صديقاتي نروح الى وايلد وادي بالليلة النسائية وبصراحة كان عندنا عدة ملاحظات جميعنا اتفقنا عليها والحمدلله انه من خلال المنتدى نقدر نوصل أصواتنا لكم ، والأهم من توصيل صوتنا وملاحظاتنا لكم هو إنكم تاخذون ملاحظاتنا بعين الاعتبار مب التطنيش:
أولا: سعر التذكرة غالية (175 درهم للشخص) مقارنة مع الوقت المحدد للسيدات ( 4 ساعات فقط).
ثانيا: فوق ما التذكرة غالية دفعونا على اللوكرات على كل لوكر 10 دراهم مدري 20 درهم والله ناسية بالضبط كم لكن بهالحدود.
ثالثا: مالقينا هذاك التنوع الكبير بالألعاب يعني حسيناهم كلهم كم لعبة تنعد على الأصابع وكلها مزدحمة لأن الجميع يبي يركب وهذا كله لأن عددهم محدود والوقت محدود والحريم كثار.
رابعا: المرافق خصوصا الحمامات كانت ضيقة جدا.
خامسا: إطلالة فندق جميرا بيتش على الحديقة مباشرة سببت لنا نوع من المضايقة صحيح انه في الليل مايبين مين الموجود او مين اللي لابس ايش لكن المنظر المباشر للفندق على الحديقة استفزنا بصراحة.
سادسا: وقت السيدات متأخر يعني البداية من الساعة 8 بالليل الى الساعة 12 منتصف الليل طبعا نحن جينا ساعتين ومشينا لأن أساسا الوقت صعب يعني اذا قعدنا لين 12 معناها بنوصل بيوتنا الساعة وحدة بالليل او اكثر وهذا بحد ذاته يسبب احراجات لنا ومشاكل مع اهالينا.
سابعا: أرجو التشديد على كل من تريد زيارة الحديقة ان تلتزم بلبس السباحة المحترم والمحتشم لأن معظم الموجودين للأسف كانت ملابس السباحة حقهم بصريح العبارة غير محترمة يعني حتى لو اننا كلنا بنات لكن عيب المناظر اللي شفناها أصلا عيب كفتاة مسلمة تلبسين بكيني حتى لو كنتي بين حريم والأدهي من هذا يتفاخرن بالمشي به.
ثامنا: يجب تحديد يوم للأطفال غير عن يوم النساء لأنهم بصراحة سببوا كثير من الازعاج والصراخ و أخذ الأماكن يعني الواحد بدال مايجي يرفه عن نفسه يدخلوه بمشاحنات و ملاسنات مع الغير.
تاسعا: الوقت غير كافي وغير مناسب يعني إذا تبون تسوون ليلة للحريم سووها من العصر إلى حين إغلاق الحديقة مو تبدونها من الساعة 8 مساء.
أخيرا وبكل صراحة ، على قد ماكنا متحمسين لهاي التجربة ولوايلد وادي والإستمتاع فيه على قد ما حرمنا نعيد التجربة مرة ثانية للأسباب السالف ذكرها والتي لم أذكرها ، وللأمانة صرت لما امشي ومعاي حد من صديقاتي او حتى لوحدي واشوف الدعايات بالشوارع ليوم الحريم بالوايلد وادي صرت ألف وجهي وأقول تجربة غير محبوبة ولذلك لن تتكرر..
وأتمنى من عالم حواء ان يتم البقاء على تجربتي لأنها كانت تجربة من قلب الحدث وهذا اللي شفناه وربنا شاهد علينا بأن كل اللي ذكرته كان صحيح بدون أي مبالغة أصلا في أشياء ماذكرتها وحبيتها تبقى بيننا أنا وصديقاتي ، وعلى فكرة ورب الكعبة كان فيني ضيق من هاي التجربة وماحصلنا حد من الادارة نشكي له عن اللي شفناه لكن الحمدلله انهم جووا هنا برجولهم عشان أطلع حرتي وضيقي منهم ، و اتمنى انه مش لأنهم معلنين تجاريين يعني لازم نكتم الاشياء الغير مستحبة واللي شاهدناها مباشرة من المكان نفسه ونمدح أشياء ماكانت موجودة أساسا بس لأنهم معلنين لأنني أولا وأخيرا مسئولة أمام الله عن هالكلام اللي كتبته ، وأصلا اتمنى منهم أخذ هاي الملاحظات بعين الإعتبار عشان نساعدهم نحن أيضا كإماراتيين و سكان لها أن نسهم في إنتشارها لكن بظل هاي الظروف اللي فوق صعب نقول شي ماشفناه ونساعدهم على الاستمرار بالخطأ..
بما إني من أهل الامارات ودبي بالتحديد ، قررنا السنة اللي فاتت أنا و 8 من صديقاتي نروح الى وايلد...
كيف عاد اذا بس حريم ..
انا مافكرت اروحها ابدا .. متوقعة هالمناظر
حديقة الممزر احلى :) ... كبيرة .. وتقدري تختاري مكان مناسب محترم
..
.