ليلة رمضان مانبي فيها ازعاج 👊

السلام عليكم ورحمة الله وبركاتة
العنون غريب صح ✌🏻
مادري ليه بشعبان فاضين بس نتسدح ☺️
وبس يبقى يومين على رمضان نتذكر الاغراض والمقاضي 🏃🏻🏃🏻 وحالات طوارئ بالسوبرماركة والثلاجات وبنده والعثيم 🤔
طيب انا ودعت هالعادة الشينة واعلنت التوبة
وصار ب ١٥ شعبان اشمر عن يدين واربط راسي بعصبة
وابد تجهيز السمبوسة ( لحم ودجاج وجبن ) والف سبرنق خضار واصابع العروسه وكل نوع بعلبة بلاستيك مكتوب عليها العدد والنوع
واجيب صندوقين طماط واقطعها انصاف وبقدر كبير بدون ماء او ملح اوبهارات وعلى النار لين يغلي واطفيه واطحنه واعبي بعلب بلاستيك او اكياس لحم مقدار مغرفة وافرزنه للشوربه والايدام والمعكرونة
واروح لحبيبي وقلبي ( الكماليات) اخذ اكواب وصحون وملاعق وشوك بلاستيك وعلب شفافه للجلي والكريمة
ومانسى بخور المسنى يجنن بعد صلاة المغرب يشيل ريحة القلي ويعطيك جو رمضاني
ومن العطار اخذ بصل مجفف يجنن يابنات لما تطبخي مع الاكل يطلع نفس الطازه
في ابيض وفي اسمر الاسمر للسلطات والكشري
بعدين اخذ بصل مجفف وثوم مجفف وكزبرة اطحنها سوى يطلع لك بهار ابيض ريحته حلوة ويعطي نكهة للاكل
وماننسي نشترى ليمون اسود وقرفه وورق غار وبهار الجنوب حلو مره بس اطلبي من العطار يطحنه
واشترى الشوفان والزيت والطحين الكويتي وباقي اغراض رمضان
واروح اشترى ملابس العيد وتجهيزاته عشان اتفرغ بشهر رمضان للعبادة شهر مادري يعود علي ولا لا
وبرمضان اصلي العصر ادخل مطبخي اشعل الراديو على اذاعة القران وارفع الصوت استفيد من الفتاوى واوسع صدري بصوت القران
وابد بالشعل المعتاد اعجن عجينة لقيمات على مقاسنا
٢ كوب طحين + علبة زبادي + بيضه + ٣ ملاعق حليب جاف+
بيضه وملعقه سكر وملعقه ملح اعجنها بنصف كوب ماء وعشان تنجح خليها اثقل من الكيكة
واسوى عجينة فطائر اطلع منها بيتزاء واقماع
واشترى تانج برتقال + تانج ليمون اخلطهم سوى يطلع احلا عصير حامض حلو
مع حبيب الكل فيمتو ( توت)
مع نوع حلا اقدمه بعد التراويح اما كنافه او بسبوسه او اي حلا سهل
الطبق الرئسيى عندنا ياهل نجد الشوربه والسمبوسة والقيمات والمعجنات
وارتب السفرة واخذ على جنب ٣ اطباق اوزعها على الجيران اللي فوقي واللي جنبي اذوقهم اكلنا وعشان ماحرجهم احطها بصحون قصدير
بعد الفطور نجمع الباقي بحافظة كبيرة ونفرش سفرة عند التلفزيون مع باقي العصيرات للى ماكمل فطورة
ولاتنسون طباخة الرز سعرها ١١٠ حطي الدجاج والبهارات والرز والمويه واحلا كبسة تطلع لك ويظل فيها الرز ساخن لين وقت التقديم
واذا اذن العشاء اصلي انا وبنياتي التروايح بالبيت طبعا بالمسجد ماركز من بعض الحريم الله يهديهن
طبعا سحورنا الساعه وحده بالليل اما رز او معكرونة بالفرن مع انه مو ضروري لان الفطور يشبع


واسوى مسابقة من يختم القران اول الجائزة ١٠٠ ريال عاد الصغار يتحمسون للمسابقه
نخصص ساعة يوميا نقراء قران ونستغفر ونقراء سيرة الرسول عليه الصلاة والسلام والصحابة
الدعاء للاموات والصدقه عليهم وخير الصدقة الماء نرسل للمسجد يوميا ٣ كراتين مويه بارده ومناديل
يمر الشهر علينا واحنا مبسوطين لازحمة اسواق ولاغيره
والله يعيده علينا وعليكم وعلى الامة الاسلاميه بالخير والبركات
اتمنى كل وحده تنزل نظامها برمضان عشان نستفيد