ليه أولادي مش بيهتموا بيا؟ حتى وأنا موجوعة قدامهم!
عدد كبير من الأمهات يرددون نفس الشكوى:
"بكون في شدة التعب قدامهم ومش بلاقي رد فعل.. كأني مش موجودة!"
"حتى مع طلب المساعدة يساعدوني بالعافية، ولو ساعدوا في أي حاجة تكون بتأفف!"
وللأسف التصرف ده مش بس بيوجع، ده بيظهر و بيكسّر.. خصوصًا لو الأم حنونة وبترعى البيت ومسؤوليات وعطاء بلا مقابل.
ياترى الإهمال ده عناد؟ ولا أنانية؟
ولا يا ترى في أسباب أعمق واخطر محتاجة وعي وعلاج؟
طيب تعالوا نفهم بهدوء إيه الأسباب:
1. من الأسباب الرئيسية انهم اتربوا على "الأخذ" وتعودوش على "المشاركة":
إذا الطفل اتعود ياخد كل شيء جاهز من غير منعلمة تقول شكرا، وكمان من غير ما يُطلَب منه حاجة، مش هيتبني عنده الإحساس بالمسؤولية أو المشاركة و المبادرة.
2. كمان علشان كنا بنخبي وجعنا زيادة عن اللزوم:
خليكم متأكدين ان الطفل والمراهق عمره ما هيحس بتعبك و بألمك إذا دايمًا شايفك بتتحملي وقوية و دائمًا "أنا كويسة" برغم تعبك.
المبالغة في القدرة والقوة بتخليهم يتواكلوا وعندهم اعتمادية ويفكروا إنك ما بتتأثريش وان تعبك مجرد تمثيل علشان يساعدوكي مهو اصل من امتى ماما بتتعب.
3. كمان التعاطف مهارة لازم يتدربوا عليها ويتعلموها:
بالظبط زي ما بنعلمهم يلبسوا و يكلوا لوحدهم، كمان مهم نعلمهم يحسوا بمشاعر اللي حواليهم. و نقول بوضوح:
"شايفيني؟ انا موجوعة وتعبانة."
كمان اطلب الحضن وانده عليهم من غير سبب و اقول "أنا محتاجة حضنكم." اد ايه بيخلق تواصل سريع وفعال بينكم
واقول مشاعري بحب "لما تساعدوني، بحس اني ليا قلب بيخاف عليا و بتفرّحوا قلبي."
4. ومننساش نذكر دائمًا بحب مش مجرد وعظ أن الدين يأمر بالبر والرحمة والرفق وأن النبي صلى الله عليه وسلم رفق بجزع الشجر ما بالكم بأمكم واحضن كتير الحضن من أهم لغات التواصل، مش بس من الابن أو الابنة الكبار، لكن من كل ولد وبنت، من صغرهم وحتى الكبر.
النبي ﷺ قال:
"ليس منّا من لم يرحم صغيرنا ويوقّر كبيرنا."
وده مش مبدأ أخلاقي بس، ده توجيه نبوي تربوي لتأسيس بيت مليء بالمودة واحتواء لمشاعر بعض.
هنبدا نصلح ونزع علشان نحصد كل اللي محتاجينه من ولادنا اذاي؟
شوفي لما تشعري إن أولادك معندهمش مهارة التقدير أو التراحم، مش إعلان فشل، ده تذكير وتنبيه للبدء من جديد.. بأساس تربوي واضح:
🌷 علّميهم يتدربوا على تحمل مسؤوليات بسيطة بشكل يومي:
يعني بعد قعدة ود واتفاق يجي حزم ووضع الحدود بمعنى مطلوب منك تخلصي البند ده من فضلك انهاردة سريعا و مش تساعديني لو حبيتي انتبهي، "دي مهمتك النهاردة.. ده دورك في المساعدة بالبيت".
🌷 مهم جدا انك تعبّري عن احتياجاتك بوضوح مش مجرد تمني بنبرة ضعف وقلت حيلة لأ بصوت مسموع:
اتكلمي واشرحي "أنا تعبانة" و بلاش تتوقعي إنهم يحسوا من نفسهم هما لسه زي ما اتفقنا في مرحلة تأهيل نزرع علشان نحصد.
"أنا محتاجة حضن" ده عمره ما كان ضعف، دي تربية على الوعي و الحس الإنساني.
🌷 ما تيأسيش، درّبي ووجّهي ان الله لايضيع أجر من أحسن عملا:
خليكي ذكية و لاحظي العتاب المستمر بيسبب رفض داخلي دون وعي.
بعكس التأهيل والتشجيع على الأدوار الإيجابية بيخلق سلوك جديد.
🌷 حافظي دائمًا على وقت مريح هادي تفضفضي فيه مع أولادك
وجربي اديهم فرصة يتكلموا بسؤال بسيط: "إيه اللي يخليكم تحسوا انكم عايزين تساعدوني؟"
خليهم يتكلموا و يعبروا، واسمعهم بحب و من غير حكم.. وازرعي قيمة "احنا عائلة لو مكناش نحس ببعض عمرنا ما نتوقع أن حد تاني ممكن يتحملنا أو يحسنا".
بكل الحب نصيحة أخيرة لكل أم وأب:
انسوا تمامًا هما اتعودوا أو اتربوا على إيه،
الأهم أنتم قررتم تراعوهم و تدربوهم من جديد بوعي.
#التربية_الواعية
#مشاعر_الأم_مش_ضعف
#علّموا_أولادكم_التعاطف
#الإرشاد_الأسري_أمنيةمحمد
#جرعة_راحة_أمنية_محمد
لازم نساعد اولادنا على برنا
انا ضد اعتماد الابن عليه بالكامل
حتى بالمذاكرة الصغير فقط اللي يحتاج تاسيس اذاكر له اما الكبير دوري فقط ناصحة وموجهه
اشوف امهات ابنائهم في الثانوي ومازالو يذاكرو لهم ويسهرو معاهم وهذا غلط خليه يعتمد على نفسه
لاتكوي ملابسه لاترتبي دولابه خليه يعتمد على نفسه
علميهم ينتظروك وقت الاكل غلط ياكلو قبل تجلسي معاهم
تعبتي ارتاحي وخليهم يساعدوك لاتضغطي على نفسك وتحمليها فوق طاقتها
وعليك بالدعاء دائما لان الهداية الصلاح من الله