ليه الانسان الجيد يتعب في حياته ؟؟

مرحبا يا حوائيات ،
سؤال أفكر فيه من فترة طويلة .. وما لقيت له إجابة ..
بداية أنا بنت عمري ٢١ ، مو متزوجة ، ما امدح نفسي لكني بنت جيدة من كل النواحي .. ما اقصد اني جميلة ، وإنما من حيث الشخصية والأخلاق وملتزمة دينياً الحمدلله .. هالمقدمة كلها عشان تعرفون وضعي كيف ..
السؤال يا بنات هو اني على الرغم من اني بنت جيدة وملتزمة وما عندي حركات بنات هالجيل الله يصلحهم ، إلا إني تعبت في حيآتي كثيير .. واخلاقي والتزامي سببه خوفي من الله فقط ،
لكن اللي متعبني ان كل حاجة عند اهلي ممنوع ..
بتجمع مع صديقاتي ممنوع ، بطلع كوفي مع صديقتي ممنوع ، بتابع فلم ممنوع ، بسوي كذا ممنوع ، بقص شعري ممنوع ..
طيب ليه كذا ؟ اهلي حتى المرض النفسي جابوه لي بعد ما كان ربي خالقني بنت سليمة معافاة ..
انا بنت ملتزمة وأخاف الله ومستحيل اسوي اي شيء غلط .. لكن أهلي مو حاسيين بقيمتي ! من القصص والبلاوي اللي نسمعها وربي اهلي المفروض يحبوني ويحمدون ربي ان عندهم بنت عاقلة مثلي ..

أنا حتى أبسط الاشياء ممنوعة منها .. صار موضوع الزوج والزواج كأني بدخل الجنة استغفرالله العظيم ، تعبت جداً ..
رافعة راس اهلي وكل من يعرفني يثني علي لكن اهلي يشوفون هذا واجب علي وليس اختيار بأن اكون بنت صاحبة اخلاق ودين ووالخ ..
أطلب طلب معين واكون فرحانة فجأة يكشرون ويتعكر مزاجهم ويحكون لي طيب طيب بدون نفس.. بعدها أنا من نفسي أتراجع واقول خلاص مو ضروري بس عشان ما اضايقهم أو أسوي شيء مو راضيين عليه ..
ليه البنات اللي اخلاقهم سيئة وروحات وجيات ولا عندهم حاجة ممنوعة وكل طلباتهم أوامر .. اهلهم يحبونهم جداً .. مع ان البنت ذي تكون أخلاقها للأسف سيئة لكن أهلها ما عندهم علم بهالشيء ..
بالمقابل أنا بنت بنفس عمرهم وما امدح نفسي لكن افضل منهم بككككثير ، ومع ذلك مافي أحد من اهلي يحمد ربه ان عنده بنت رافعه راسه .. وفيني طبع إني مستحيل أسوي حاجة من وراهم أبداً .. كفاية هم مو واثقين فيني وأنا ماشية مضبوط كيف لو سويت حاجة بدون علمهم !😅 ..
فعلاً أصبح موضوع الزواج كأني بدخل الجنة وتصير كل حاجة ممنوعة ببيت أهلي ، مسموحة ببيتي ، ابسطها اني اشوف فلم 😢
بنات انصحوني تعبت .. ليه الانسان الجيد يتعب بحياته ويعاني مع انه ملتزم وحاط ربه بين عيونه ، وبالمقابل الإنسان السيء وأخلاقه سيئة مبسوط بحياته على الآخر ؟؟
احتاج اجاباتكم ونصايحكم لي .. بدون طقطقة رجاءً لأني فعلاً ما لقيت جواب لهالسؤال ..