ليه انتي مجربة الحمل .. احرجتك صح!!

بسم الله الرحمن الرحيم

السلام عليكم ورحمة الله وبركاته..

انا سقطت قبل سنة وشهرين الحمدلله ،زوجي واهله واهلي يقولون لي لاتفكرين بالحمل متى ماربي كتب لك تحملين بتحملين ان شاء الله وفكري الحين بدراستك لأني ولله الحمد ناجحة في دراستي لكن اقاربنا والناس ماخلوني لحالي ودايما يتكلمون من وراي ماحملت فلانة وهذاك اليوم سلفتي تقول ماحملتي طولتوا وغيرها..تخيلوا يابنات انا ادرس بالجامعة وقلت الحمدلله انشغل بالجامعة لمن ربي يكتب لي واحمل ..تخيلوا مااشوف بالجامعة راحة البنات يسألوني من بعد ماسقطت متى تحملين ..ويوم تأخرت شوي اللي تقول خلاص مامليتي دورة ..واللي تلمح تلميحات سخيفة تخيلوا مرة كنا متجمعين وكانوا اللي معي كلهم بنات وبعضهم مخطوبات وانا المتزوجة بينهم وكنا نسولف وجبنا طاري الحمل والولادة جلسنا نتناقش ببعض الامور وفجأة الا اشوف وحده منهم تقول لي ليه انتي مجربة ..لاوتعترف تقول احرجتك صح ...بصراحة انقهرت قلت لها الحمدلله انا حملت ببداية زواجي وسقطت
قالت ادري ادري..وفي مرة ثانية كنا مجتمعين بعد ويسولفون نفس الشي عن الحمل الا تقول وحدة مو حلو الوحدة تطول تجيها حالة نفسية عاد انا خلاص مااعرف اسكت قلت لها عادي دام عندها شي يشغلها ، وفي موقف ثاني هذا الله يسلمكم ان باب المدخل اللي يودينا للقاعة قدامه مثل السور رفيع شوي حنا دايما نطمر منه وندخل للباب على طول اختصارا للوقت ..بس في اسبوع كان انا فيني الدورة وعادي اطمر عالسور بس في يوم ظهري يعورني وماطمرت قلت بروح من الدرج يعني السلم قالت لي وحده خايفة تطيح الفوطة ..بصراحة انا حز في خاطري ماتوقعتها منها لأنها صديقتي المقربة ، وغيرها من المواقف ادري اني طولت بس حبيت افضفض لكم
شفتوا حتى الواحد لو حاول ينسى او يتناسى حتى في من يذكره لكن مانقول الا الحمدلله على كل حال وانا متفاءلة جدا بأن ربي بيرزقني قريبا ان شاء الله


ادعوا لي يابنات ماتجيني الدورة هذا الشهر ان شاء الله واحمل

واسأل الله ان يرزق كل عضوة في هذا القسم بالحمل السليم المعافى عاجلا غير آجل وان لاتأتي السنة الجديدة الا وكل واحدة منا مسرورة بحملها منتظرة قدوم مولودها ان شاء الله

اللهم صلي وسلم على نبينا محمد وعلى آله وصحبه ومن تبعهم بإحسان الى يوم الدين

سبحانك اللهم وبحمدك استغفرك واتوب اليك