ليه بعض النساء تحب تحطم غيرها حتى لو ماتعرفها

السلام عليكم
انا خريجه جامعه مرموقه وعندي اكثر من لغه ومؤهلاتي جيده تخرجت من الجامعه واراد الله امر بظروف تمنعني من الشغل لسنوات وكانت ظروف صعبه بعد فتره قررت اشتغل وقدمت على طاقات
وكلموني ورحت وكنت جداً متحمسه ومتفائله وواثقه
اعطوني استماره عبيتها وكنت واضحه جدا وعارفه وش ابي
وكنت متفائله بمشرفتي في البدايه
شافت سيرتي الذاتيه والاستماره اللي عبيت وطالعت فيني
وقالت كيف ما اشتغلتي للآن لما جيت اشرح السبب جلست تلعب في ملابسها وتتلفت انا شفتها في البدايه بنت جدا عمليه بس فجأه بدأت تسوي حركات غريبه مافيها اي مهنيه وتتجاهلني انا مادققت واستمريت واعطيتها كل اللي سألت عنه وحاولت اكون متعاونه
بعدين قالت ان سيرتي ومؤهلاتي جيده بس فجأه بدأت تطلع عيوب في شخصيتي وتذم فيني
قلت كيف ماجلسنا مع بعض اكثر من خمس دقايق كيف حكمت بهالشي
قلت في قلبي مايخالف هذي مشرفة التوظيف الخاصه فيك اكيد تبي مصلحتك وش بينها وبينك
بعدها رجعت على الموعد الثاني وقابلتها
وكان معانا مجموعه وبدأت تقول انا رشحت فلانه وفلانه للوظيفه الفلانيه لان عندهم لغات واستثنتني مع ان عندي ثلاث لغات
شوي وبدأت ترمي كلام بشكل غير مباشر عني
فجأه ولاحظت وحده من المقدمات في سيرتي ان لي خبره في شي هي تحبه وجلست تسألني انا تحمست وجلست اشرح لها قاطعتني وقللت تماماً من قيمة اللي اقوله وانه تخصص مو مهم وهي ماتفهم فيه واشرت بيدها وشفايفها وعيونها الحركه اللي تدل انه سخيف انا وقتها تضايقت بس طولت بالي وتحملت
طبعا انا واثقه من مؤهلاتي والتخصص اللي كنت اتكلم فيه كان قوي جدا ونادر اللي يشتغل فيه في السعوديه
بس انا جتني صدمه قويه
ليه
يعني انتي المفروض تساعديني
مافي داعي اذا استفزك شكلي او سيرتي او اي شي انك تحاولين قدر الامكان تقللين من قيمتي
انا انسانه بالغه وفاهمه وعارفه معنى هالتصرفات
المصيبه لما يكون مستقبلك بيد اشخاص مثل هالنوع
انا احبطت جدا وعرفت اني مستحيل اوصل لشي معاها وحسبي الله ونعم الوكيل
انا غالبا اتعرض لهالمواقف اللي الى الآن ماعرفت لها تفسير لكن فهمت ان النساء انواع
بعضهم متصالحه مع نفسها وجمالك ونجاحك مايأثر
بعضهم مهما بلغت من النجاح فطرتها تجبرها على تحقير كل امرأة تظهر مظاهر الثقه وتحطمها
بعضهم تحب راعية النكته علشان توسع صدرها
وبعضهم ماتحترم وتحسب حساب الا للي لسانها مثل السيف ماترحم وتحب المشاكل
انا مستحيل انسى هالموقف
رأيكم اخواتي وهل لكم تجارب من هالنوع