دلوقتي طبعا كلنا عارفين , ان الواحد لو عاوز يريح "ودانه"
.. "هيشرب" عصير مانجة !!!
و لو عاوز يدلع "مناخيرة" ... "هيسمع" أغنيتين
كدة "تحت اللسان" ,,,, !!!
أما بقى لو عاوز يمتع "عينيه"
... فعليه و على شوية برفان "ريحة" ما حصلتش !!!
حد حاسس بأي حاجة غلط ؟؟ !!
و لا ما حدش واخد باله أصلا ؟؟؟
متهيأ لي فيه غلطة بسيطة بس
ان اللي عاوز يريح ودانه ... يسمع حاجة حلوة -و بلاش أغاني
-
و اللي عاوز يريح مناخيره .... يشم ريحة حلوة
-
أما لو عاوز تمتع عينيك .... يبقى هتتفرج على مناظر طبيعية خلابة -حلوة خلابة دي .. يعني ايه ؟؟
-
حد عارف أنا عاوزه ايه ؟ و لا لسه ؟؟
بص يا ستي,,,
دلوقتي لو جنابك مخنوقه
؟؟ و مش طايقه نفسك
.. بتعملي ايه ؟؟
غالبا يعني , بنعمل حاجة تريح أعصابك ... تسمع موسيقى هادية ,
تتنطط و تطلع الـ"باور" :7_5_131:
اللي جواك , أو "تترزع" قدام التليفزيون تتفرج على أي حاجة "مسلية"
أو لو كنت في الكلية مثلا , تكلم الـ"friends":27:
او تخرجي تعملي شوبينج ,تتخانقي مع اي حد هههه أو لو ربنا كارمك و "دادي" جايب لك عربيةوسواق تطلعي تتمشي شويه ولا "تخمسي" بيها شوية( اه يا بخت الشباب نفسي افحط بسياره على راي السعودين ههه):3_10_6: .... أو أو أو أو ... حاجات كتيرة ممكن تعمليها لما تبقى مخنوقه .
صح ؟؟
صح و لا لأ؟؟
أكيد معظمنا بيعمل حاجة من دول
, و لا أزكي نفسي ,
بس لو جينا ناخد العملية "جد" شوية ,, و تيجي نشوف ايه "الحتة" اللي بتبقى عاوزة "تتظبط" لما بنبقى مخنوقين ؟؟
يعني ممكن تقولي انها : نفسك , قلبك , روحك , .... من الآخر "جواكي " هو اللي بيبقى عاوز يتظبط , :(
لكن للأسف بنروح جايين و بكل غباء
, بدل ما نظبط روحنا , نروح "شغالين" على حاجة تانية نظبطها , أكننا بالضبط عاوزين نريح وداننا رحنا رايحيين نشرب عصير !!!
في حين اننا المفروض لما نكون مخنوقين
, نشوف ايه اللي بيسعد و يريح الروح و النفس و نعمله , مش نروح نعمل اللي بيريح الحاجات التانية في جسمنا و نعمله ...
طيب و ايه اللي بيريح الروح ؟؟
باختصار ......, الصلة بالله عز وجل ,
بأي نوع من أنواع الطاعة ,,
تصلي , تتوضى -حتى لو اتوضيتي بس و ما صليتش- , تقرأ قرآن , أو حتى يا ستي تقعد ساكت كافي خيرك شرك , بس ما تروحيش تظبطي حاجة تانية غير الحاجة اللي عاوزة تظبيط ,
طيب أنا راضي ضميرك يا ستي
عمرك كنت مخنوقه , و رحت سمعت شوية موسيقى و لا اي حاجه من الي قلنا عليها, و حسيت انك استريحتي ؟؟
آه !!! :freak6:
أيوة استريحت ,, "لحظيا"
لكن أول ما خلصت رجعت لك الخنقة تاني , ده لأنه ما عالجتش
المكان اللي عاوز يتعالج ,
و اسمع لكلام ابن القيم في الموضوع ده :
"إن في القلب فاقة لا يسدها شيء سوى الله تعالى أبدا وفيه شعث لا يلمه غير الإقبال عليه وفيه مرض لا يشفيه غير الإخلاص له وعبادته وحده فهو دائما يضرب على صاحبه حتى يسكن ويطمئن إلى الهه ومعبوده فحينئذ يباشر روح الحياة ويذوق طعمها ويصير له حياة أخرى غير حياة الغافلين المعرضين عن هذا الأمر الذي له خلق الخلق ولأجله خلقت الجنة والنار وله أرسلت الرسل ونزلت الكتب ولو لم يكن جزاء إلا نفس وجوده لكفى به جزاء وكفى بفوته حسرة وعقوبة"
يبقى لما تبقى مخنوقه , و تيجي تطلعي زهقك , افتكر على طول انك مش بتعالجي الجزء الصحيح , انت بتدي "مسكنات" لأماكن "تانية خالص" غير الأماكن اللي المفروض تعالجها ..
أنا طولت عليكم , صح ؟؟
بس أرجو أن تكون الفكرة قد وصلت ,,,
و إن كنت لو أنتبه بالذي *** وعظت به فانتبه أنت به
و أنا و الله ما بكتب الحاجات دي علشان أنا بت مخلصه و عامله الحاجات الصح كلها , إنما أعظ نفسي بموعظتي لغيري ..
و لا تنسوني من أي دعوة صالحة بظهر الغيب ...
ملحوظة : ادعي بضمير و من القلب ,علشان الملك يدعيلك و يقول آمين و لك بمثل , و مش هتخسري حاجة يعني ...