مأساتنا في بيت اهلي .."يارب فرجها علينا"

السلام عليكم
كل عام وانتم بخير وصحه وسلامه

بنات بكتب لكم مأساتنا وطمعانه بدعواتكم الطيبه ان ربي يفرج لنا
ابوي تزوج يوم اني في صف اولى ابتدائي واكان تحتي بنت هي اخر العنقود لأمي الله يرحمها ويسكنها الجنه
وطبعا يوم تزوج صارت حالتنا مايعلمها الا ربي ابوي غسل يده منا بس كان يجيب الاغراض الاساسيه الي نحتاجها وقل المصروف وصارت المسؤليه على اخواني
كبرنا والحال مثل ماهي مانشوف ابوي ولا يعرف العدل ابد الله يهديه
الان لي 5 اخوان من ابوي 3 اولاد وبنتين اكبر ولد عمره 18 سنه
بعد ماتوفت امي تأزمت الاوضاع اكثر واكثر
صار ابوي مايتقضى لبيتنا نهائي
ولا يصرف علينا انا واختي واخواني الاثنين وطبعا اخواني الباقين متزوجين
وذقت ايام مره يوم انقطعت المكافئه الله لا يعيدها من ايام
الان صرنا انا واخواني اذا جينا نزور ندخل بقسم ابوي وفيه مرة ابوي وكانت طيبه معنا مره
مع ان ابوي يتضايق منا وكنا نحرص ماندخل قسمه كثير
واللحين صارت مشكله لان ابوي رمم قسمه وجدده وقسمنا مالمسه وقسمنا خراااابه
بس طلبو اخواني منه يجدد غرفة اختي الي ماتزوجت رفض نهائي قال انا ما علي منكم !
والله كلنا رحمنا اختي يتيمه لا ام وابو وجوده زي عدمه وهي تشوف وشلون صلح غرف اخواتي من ابوي
وبالاخير تكفل فيها واحد من اخواني على وشك زواج ادعو له ربي يوفقه فرش لها احسن فرش وضبط غرفتهاا
بس الان مرة ابوي زعلانه ليش !
عشان طلبنا ان ابوي يزين غرفة اختي؟ حسبي الله ونعم الوكيل
بعد ماكنا حبايب صرنا اللحين اغراب عن بعض
مارحمة بالسالفه الا اختي الي معهم بنفس البيت عندها مطبخ فاضي واب قاسي وام متوفيه حتى اخوي الي حنون عليها بيتزوج
والاكل ترسل لها مرة ابوي ..
طبعا هي راحت عند اخوي الكبير الحمدالله هو طيب ويحبها وزوجته بعد بنت رجال
واللحين انا بعد متوهقه مدري وين اتنفس بيت اهلي ابد موب مهيئ ولا ابي اقعد لحالي مامعي الا اختي الي اصغر مني وشغاله
وخواتي ماراح يقدرون يجون لان ولادتي بوقت مدارس وربي تمنيت اني بسكن مستقل عن حمولتي عشان اتنفس عند رجلي
عاد مرة اخوي تقول تعالي عندي انا انفسك ومحتاره
آه وينك يايمه ..
ولي اخت متزوجه بالقصيم ماتقدر تجي لان وضع بيتنا سيئ وابسط الاشياء مااتتوفر فيه
تشرشحو خواتي كلهم
اتمنى ادخل بيت اهلي وتقابلني امي الحنونه
الحمدالله على كل حال امي صار لها متوفيه 3 سنوات ونص
جعلها بجنة الفردوس صبرت على ابوي عشاني انا واخواني مع انه مذوقها الويل وكنت اسألها اخر حياتها تحبينه يمه ؟ تقول ايه احبه ومحللته جعلك بالجنه ياميمتي
كانت تقول هالكلام عشاني وعشان مااتكدرني .. فجر العيد ذكرتها وقعدت ابكي تمنيت اعايدها واحب راسها
كانت لنا الام والاب وماقصرت علينا بشي ابد كل الي نبيه نلقاه بس بعد وفاتها تغير حالنا
الله يرضينا بحكمه
والمصيبه ابوي يبي يطلع لبيت ويبيع هالبيت يعني بيصير انا وخواتي مالنا ملفى نتشاوف فيه
دعواتكم لنا انا واخواتي ..
والحمدالله رب العالمين على كل حال

طبعا كلامي مو مرتب لاني اكتب مباشره بدون ورقه ولا شي