ماأحب أعزم أحد في بيتي/ قديم

السلام عليكم
هلا خواتي
دايما اقرا مواضيع البنات اللي يشتكون انه فيه ناس دايما تزورهم ومع هذا عمرهم ماعزموا في بيوتهم
وبصراحة انا من هالناس
مااحب اعزم في بيتي
واصلا انا ماازور احد لمجرد الزيارة
يعني اذا فيه مناسبة وعزومه وقالولي ساعتها ممكن ألبي الدعوة يعني حسب ظروفي لاني من طبعي مب اجتماعية ومااحب اطلع من البيت كثير
وبنفس الوقت ولاعمري قلت لأحد حياكم في بيتي .. واذا احد بغى يجيني اقولهم حياكم بس احس انهم يحسونها مو من قلبي ولااكرر العزيمة عليهم مره ثانيه .. يعني ماتطلع مني انا
والله مو بخل
والحمدلله بيتي مرتب وعندي شغاله تعاوني
وزوجي ماعنده مانع
بس انا طبعي كذا مااحب الجمعات واللمة
ومن النوع اللي قبل العزيمة بأسبوع اكون على اعصابي انه لازم يكون كل شي يكون مرتب ونظيف وحلو
يعني لازم التقديم والعشا يكون مثااااااالي
وووووايد اتوتر واكون على اعصابي واخاف احد ينتقدني
عشان هالسبب اتجنب اني اعزم احد عشان ماامر بهالحاله اللي اكرهها
ولاتقولون اني كثيرة زيارات لاوالله .. عشان هالسبب ماازور الناس وايد عشان محد يقولي ابي ارد لج الزياره
والله ماعرف شاسوي بنفسي
ودي اقوي قلبي واعزم بس اخاااااف
يعني احس عيب صارلي سنين متزوجة وعندي بيتي وياما ناس لمحولي وانا فاهمه بس مطنشه
اتوقع هذا بسبب تربيتي
لانه في بيت ابوي كان ابوي مايجب العزايم فكنا مانعزم كثير .. مع انه امي تحب تعزم بس ابوي مايحب الزيارات كثير ..
فتعودت على هالشي
وصارت العزيمة بالنسبة لي هم وتعب وتوتر
عشان جذي لاتلومون الناس اللي ماتعزم
ساعات مايكون السبب البيت او الفلوس او الزوج
يكون السبب شي داخلي ونفسي
وتقبلوا كلامي بصدر رحب
ومستعده اسمع نصايحكم وتعليقاتكم