ماأدري شفيني بس يوصل المغرب اتغير

السلام عليكم


خواتي أنا أختكم محتاجة دعواتكم مادري شنو صاير فيني أكون أنسانه طبيعية وكل شي اوكي وبس تبتدي الشمس تنزل للغروب أصير أنسانه غير أسوي أشياء ما أوتعي اني سويتها ورغم اني بيتوتية وأحب البيت وقعدة البيت ها الأيام ما اوتعي الا وأنا في الشارع وأسأل روحي أنا شنو جابني هني وأعصب على كل الناس وأغلط كل اللي حولي قالوا لي اني أصير موب أنا


أوقات أفزع من نومي صدقوني أقعد خمس دقايق على ما استوعب انا من ؟وشسوي هني؟ وأسترجع ذكرياتي وأقعد أتلفت حولي وانا في حالة توهان وضياع وعدم استيعاب صلاتي قمت انساها واتهاون فيها والكسل ذبحني


انا مو انا يا بنات مو انا ارجوكم ساعدوني



من يومين أخذت حبة منوم وخذيت حبوب ثانية صرت مثل السكرانه بس أهذي (على حسب أقوال زوجي لأني ما اذكر شي) خذاني زوجي رقدني لاني كنت اهذي ومادري شقول نمت حلمت حلم غريب بس الأغرب اني اتذكره لاني صايره ما اذكر الاشياء اللي تصير وياي بفترة الهذيان حلمت ان الموت جاني وانا نايمه وماكنت خايفه ابدا حسيت روحي بتطلع وتشهدت ثلاث مرات ولما فتحت عيوني شفت واحد واقف فوقي انا فكرته ملك الموت(رغم ان هيئته كانت هيئة انسان عادي بثياب عادية وحليق ) وجاي يقبض روحي وكان يبتسم وانا رجعت تشهدت وحسيت روحي بتفيض لباريها وكأنو سحبها مني سحب بس ما حسيت باي الم ها الحزه فزيت من النوم فزعانه وكنت معرقه وحالتي حالة من تعرف تفسر لي الحلم؟؟؟؟؟؟؟؟؟؟؟لا تبخل علي

وقبلها حلمت بأمي الله يرحمها أخذت عباة وقاعدة تلبسها الا اقولها امي هاي العباة كانت لي وانا أعطيتها لأختي شنو وصلها عندج؟ وذاك اليوم حلمت الشرطة ملاحقيني وأنا اركض حافية ومسكوني وحطو القيود في ايدي


وأحلام واااااااااااااااااااااااااااايد رغم اني قبل ما كنت أحلم أحلام جذي



ونفسيتي في الحضيض


كتبت لكم الموضوع احين لاني ما اضمن اعرف اكتبه بعد المغرب

تراني والله يا بنات اتغير 180 درجة وأحس تضارب في نفسي وصراع بين ضميري ونفسي الامارة بالسوء وكان أحد يحدني على الغلط



ساعدوني ارجوكم قبل لا استجن


واللي عندها رقم شيخ راقي ثقة في البحرين لا تبخل


وما ابي اي شيخ لاني قبل رحت لواحد ماحسيته كفؤ وكان يغلط في قرائة القرآن ويرجع يصحح من الاوراق ومرتبك فما ارتحت وما كملت



ارجوكم الله يحفظ لكم كل غالي واللي ما تعرف على الاقل تدعي لي بظهر الغيب ان الله يشفيني و يهديني للصواب ويرزقني حسن الختام وانه ما يطلعني من ها الدنيا والا وهو راضي عني وطبعا تدعي لأمة محمد أجمعين


أختكم قطرات الندى