ماتت فيني كل الاشيا الجميله ....

السلام عليكم ورحمة الله وبركاته ..



ترددت ملايين المرات قبل لا اكتب موضوعي ..

مادري هو خوف من ردة فعلكم .. او معرفتي بإني مخطئة مليون بالمية .. وعدم قدرتي على اني اشوف راي الغير فيني ..



بنات انا يايتنكم اليوم بعد ما فاض بي همي ..

مب عارفه كيف اصيغ مشكلتي .. لكن اتمنى انكم تفهموني .. اقسوعلي .. شدو علي .. بس افهموني .. لأني والله متعبه وحزينه إلى أبعد الحدود .. واللي ما بترد .. تدعيلي ..


للأسف الشديد .. والله يسامحني ويغفرلي .. دخلت في علاقة مع شاب .. والله يابنات عشان ما تتحرون اني تركته لسبب دنيوي .. كان مب مقصر علي ف شي لكني .. تركته خوفاً من ربي .. ولأني ما ابي اغضب ربي .. تركته وانا ( مخدوعه ) بأني يالسه اتخلى عن اجمل شي بحياتي ..

تركته وانا اتوهم بإني يالسه اخسر زوجي وحبيبي وصديقي.. تركته وانا متوهمه بإني حبيبته اللي بتتركه .. وكنت اصيح واصيح لكن ارجع واقول ربي ربي ربي ..

بنات لمى قلتله هددني وسبني وشتمني وقالي بفضحج .. وما بفرح إلا لمى بخلي اسمج على كل لسان ..

انصدمت .. وانهرت و على كثر ماخفت .. على كثر ما انهارت اعصابي على كثر ما اترجيته وصحت .. وذليت عمري ..على كثر ما اصريت على موقفي .. ما فكرت اني ارجعله واصريت على موقفي على كثر ما كنت ضعيفه تماسكت يدامه .. هددني وهددني وهددني وآخرتها تعب .. انسحب من حياتي لكن بعد شو يا بنات ..

والله يا بنات هربت من الجو اللي عايشه فيه لحضنه واللحينه ندمانه وغرقانه بالحزن .. نسيت ان ربي فوق .. وكنت اكلمه ومستانسه وناسيه ان الدنيا فانيه .. خايفه يا بنات اموت واتعذب ف قبري على جرمي .. على ذنبي ..

بنات والله نفسيتي تعبانه .. تخيلو انا مغطيه ويهي وشفته اليوم يدامي وتلاقت عيوننا بدون قصد ثواني كانت بس مرت علي مثل سنين .. والله يابنات ريولي ما شلتني .. ودارت فيني الدنيا .. والله بغيت اموت ف مكاني ..

كل ما اذكره .. اروح ايلس بروحي .. والله يا بنات ندمانه ندمانه .. مب قادره اكمل حياتي .. والله ساعات اشتاق لشخص يحبني ويدلعني .. لكن مب بالحرام .. وارجع واذكر غلطتي واحس اني ما استاهل انسان نظيف ..

بنات والله احس بإنكسار كبيييييييييييييييييييير مب عشانه هو ... عشان خيانتي لربي عشان اللي سويته .. عشان احساسي بإني خربت معنى شي جميل وهو الحب ..

وفي نفس الوقت .. احس بحزن لأنه عاملني بهالطريقة مب قادرة انسى كلامه وصراخه علي .. سكن فيني حزن وخوف و ذل و إنكسار .. يا بنات مب طايع يفارقني حتى ف منامي ..

بنات والله مابي شي غير رضا ربي .. واني اعيش مرتاحه ..

والله بقول شي وانا مستحيه منكم وادري البعض بيستكثره علي ..

بنات انا ودي يكون لي سند .. شخص يحبني ويخاف علي .. يكون سندي ..

بنات انا اول انسان فتحت له قلبي وقلت له عن مرضي النفسي ومشاكلي العائلة والبلاوي اللي صارتلي ولازالت تصيرلي يا بنات صفعني اكبر صفعة ف حياتي ومب قادرة اتجاوزها ومابي غير انسان يحمل هالذكرى من بالي ويساعدني على الخير واساعده على الخير ..



ودي اكتب واكتب واكتب فيني مشاعر حبيسه لكن ادري اني طولت وايد

بنات ارجوكم ادعولي ربي يسامحني ويغفرلي .. ويتجاوز عن زلتي ..

اتمنى انكم تفهمون شي من كلامي ..



انتظر ردودكم على احر من الجمر ...



الحزينه ..

ألم ..