مثل ما نشوف الكل عند شي شاغل باله في هالدنيا
اللي ودها تتزوج..
واللي ودها الله يرزقها بالذرية الصالحة..
واللي مريضة تنتظر الفرج والرحمة من الله..
وطبعاً هالاشياء الثلاثة المهمة في الحياة من وجهة نظري ما نقدر نصيبها الا بأذن رب العالمين..
انضميت لكم قبل فترة قصيرة..
وقلت ادخل واطلب من البنات يدعولي بالزوج الصالح..
وبإذن الله تعالى يبلغني هالمراد في القريب العاجل ..
لكني اليوم اكتشفت شي..سبحانه وحده هو اللي دلني عليه..
هالشي ماهو سورة ولا آية..
ماهو استغفار ولا غيرها..
شي الأنبياء كانوا متمسكين فيه واحنا جهلناه
هالشي هو
القناعة بما قسم الله لنا والرضا
مع التمسك بالقرآن الكريم وبالادعية والاستغفار والصلاة على النبي بلا يأس..
سواء طلعتي من بيتك او ما طلعتي
لو كنتي في بطن حوت مثل يونس بن متى
عمرك صغير او كبير
لو كنتي بعمر السيدة خديجة
اجتماعية ولا انطوائية
ولو انطويتي على نفسك و ابتعدتي عن اهلك مثل يعقوب
فقيرة او غنية
ولو كنتي في قصر مثل قصر زليخة
جمالك عادي او ملكة جمال
صحيحة البدن او مريضة حتى
لك رزق بتاخذيه
لو يوقف من هو في طريقك..
الله هو ناصرك وهو متمم زواجك..
وانا عند هالكلمة ومن خلال معرفتي باشخاص تزوجوا
والنقطة الأهم في هالقضية
ماهو مهم تتزوجي كثر ماهو مهم تكوني سعيدة في الزواج ومرتاحة..
بقولكم قصص من خلال محيطي اللي عايشة فيه..وماهي منقولة
ومن تحب تضيف لاتبخل
من بين الجيران ..لنا جيران عندهم بنت مريضة بفقر الدم المنجلي..والحاد ..والحمد لله اللي عافانا
وأيام البرد تتعب كثير لدرجة توصل للمستشفى..
سبحان الله قبل اربع سنوات او اكثر تزوجت..
ومن رجال طيب النسب ..رغم كونها من عائلة عادية..
اهلها قالوا له انها مريضة لكنه قال يبيها..
وبحكم والدها يصلي في المسجد الولد تعرف على والد البنت وطلب من اهلها يزورنهم ولقوا عندهم بنت الحلال
وعلى الرغم من ان أم الولد مارضيت في البداية ورفضت ..لكنها بعدين اقتنعت وتم الزواج..
والحين البنت عندها ولد وبنت ورغم انها تعبت كثير وقت ولادتها لدرجة زوجها واهله يدعون لها مع ذلك النتيجة اهم زوجها يحبها وتم الزواج في النهاية
الله يرزقني مثل مارزقها
في قصة ثانية >>>>
لبنت اعرفها ..ولد خالها يموت فيها..لدرجة انه اذا زار عمته يدخل بيتها فجأة عشان يشوف هالبنت..
لكنه مايصلي وشهادته ابتدائي وصاحب مشاكل..لدرجة تجي ايام يبقى فيها مطرود من البيت..
وبعد فيه شي..البنت ..عندها اولاد عم من نفس الشاكلة..
البنت خافت بحكم والدها شخص قاسي انه يجبرها و يزوجها لأحد منهم..ومع انها جميلة لدرجة كبيرة ماتقدم لها احد الا ولد خالها لحد ماوصل عمرها 21او 22 كذا
وفوق هذا اهي مانجحت بالجامعة واستبعدوها من الدراسة فيها..
عانت من خوف ماتكلمت فيه لأحد..
حتى مرة من المرات الولد كلم عمته الا هي ام البنت..
وقالت لأبوه عن السالفة وقال انا ما ازوجه ..
وبعدها بكم شهر تقدم لها واحد شهادته بعد ابتدائي لكنه مقتدر ومن عائلتهم ومعروف عنه طيب وفيه موصفات اللي خلتها توافق عليه وتحط شروطها رغم ترددها في البداية لكونها عانت بين مشاكل ابوها وامها وصار لها الحين بعد فوق الاربع سنوات وعندها منه بنتين و ولد..
اللي اعرفه انها ماكنت تترك القرآن وكانت تساعد والدتها في البيت ومنظمة شؤونه ..وزوجها اكبر منها بأكثر من عشر سنوات يمكن 12 سنة لكنه مسؤول وطيب ومن محبته لها يحب حتى اهلها ..حتى اذا مرض واحد من اهلها بحكم حالتهم المادية اكثر من السيئة اهو يعالج اخوانها..ما شاء الله
والله يجمعني بالزوج الصالح الطيب عاجلاً مثل ماجمع بينهم
قصة ثالثة..
البنت كانت تدرس معانا بالجامعة..
البنت مهي جميلة لدرجة كبيرة عادية..ورغم ان عمرها 22 لكن شعرها مليان شيب..والله تمر أيام الاختبارات حالتها حالة ..تهمل نفسها لدرجة تتعجبي منها..
وسرحانة على طول..ملابسها بدون ترتيب
والله ما اكذب عليكم يابنات عندنا زميلات ماتخلي شي ماتسويه تهتم بنفسها وبشكلها كثير ونعومات ماتزوجوا وهي تزوجت قبلهم
وانقلبت البنت شي ثاني..والله تقولين ولا ملكة جمال ماشاء الله..
وصارت تهتم بنفسها..
والحين عندها 3 اطفال..
وللعلم زوجها دكتور كان يدرس خارج المملكة
القصة الرابعة >>>
لبنت كانت تعاني من السمنة ..
البعض يقول ماتتزوج الا النحيفة..هالبنت كانت طويلة وسمينة والله ما اكذب عليكم انها انخطبت قبل كم شهر بس..وسوت حفلة خطوبتها ..وزوجها من نسب طيب ومعروف..
يارب يسهل علي وييسر لي
اللي جمع بينهم وبين ازوجهم يجمع بيني وبين زوج صالح غني بعلمه ودينه..يالله..
قولي امين وادعي لنفسك..
بقولكم عن أشياء الحين ممكن تسويها اضافة لقراءة سورة البقرة والاستغفار والدعاء..
واوعدك اضيف من القصص بهالموضوع اللي اقدر عليه..
لكذا الموضوع ماهو متوقف عند هالحد..
اذا كان عندك جدة او جد كبير في السن ومريض حاولي تهتمي فيه..
صدقة لاتتركينها..
بيت اهلك تعهديه بالاهتمام..لين الله يسهل..
اقرأي القرآن واختميه ولاتكتفين بسورة البقرة..
المساجد حاولي تساهمين فيها باللي تقدري عليه..
عندك يتيم في عائلتكم..احسبيه اذا سويتي اكل او اشتريتي ملابس او ساعة او اي هدية لاحد..
ولاتنسويني من دعائكم
والله يرزقني واياكي بالزوج الصالح الغني بدينه واخلاقه وماله..عاجل بإذنه..
وابتغوا الاسباب..وادعوا بصالح اعمالكم..
وان شاء الله مابعد العسر الا اليسر
بالازواج الصالحين يااااارب العـاالميــن والحيااه الهادئه من غير مشاكل بإذن الواحد الأحد ..