ماتوقعت يوم اكتب هالموضوع ادخلو كلكم

السلام عليكم ورحمة الله وبركاته، يا بنات، الله يسعدكم ويجبر خواطركم جبرًا يتعجب منه أهل السماوات والأرض، حبيت أفضفض لكم بشيء في قلبي من زمان، وأتمنى من كل وحدة تقرأ كلامي تدعي لي من قلبها، لعلّ فيكم من هي أقرب إلى الله مني، ولعلّ دعوة صادقة من وحدة فيكم تكون سببًا في فرحة عمري.

يا بنات، أنا تأخرت بالزواج، وكل ما مرّ الوقت أحس إن الموضوع صار يثقل على قلبي أكثر. أشوف اللي بعمري واللي أصغر مني تزوجوا وخلفوا وصار عندهم بيوت وأزواج وأطفال، وحتى اللي تزوجوا وتطلقوا ربي رزقهم من جديد وتزوجوا مرة ثانية، وأنا للحين أنتظر نصيبي. والله إني أفرح لكل وحدة ربي يسعدها ويرزقها، وما أتمنى الشر لأحد، لكن أحيانًا غصب عني أتألم وأسأل نفسي: يا رب، متى يجي دوري؟ متى أفرح مثلهم؟ متى يجي اليوم اللي ألبس فيه فستاني وأحس إن ربي عوّضني عن كل هالسنين؟

والله يا بنات إن شعور الانتظار صعب، خصوصًا لما تشوفين الأيام تمر والسنين تمضي، وكل اللي حولك ينتقلون لمرحلة جديدة من حياتهم، وأنتِ مكانك تنتظرين. أحيانًا أكون طبيعية وأضحك وأتكلم، لكن بداخلي غصّة ما يعلم فيها إلا الله

أنا ما أبي شيء مستحيل، كل اللي أتمناه زوج صالح يخاف الله فيني يصونني وأصونه أبي أعيش شعور الزوجة والأم، وأحس إن لي شريكًا في هالدنيا أرجع له وأفضفض معه وألقى عنده الأمان بعد الله.

واللي يزيد تعبي يا بنات إني أحاول أصبر وأحتسب، وأقرأ القرآن وأصلي الوتر وأدعي ربي في جوف الليل، وأطلب منه يرزقني ويعفني بالحلال. والله إني ما تركت الدعاء، وكل ما ضاق صدري لجأت لربي، لكن أحيانًا يضعف قلبي وأحزن وأتساءل متى الفرج؟ مو اعتراضًا على قضاء الله، حاشا لله، لكن لأن النفس تتعب، والإنسان مهما كان صابرًا يحتاج أحيانًا من يواسيه ويذكّره بأن رحمة الله واسعة.
أحيانًا أقول لنفسي: يمكن ربي كاتب لي شيئًا أجمل، ويمكن تأخير الإجابة فيه حكمة ما أعرفها، وأرجع وأستغفر وأحسن الظن بالله. لكن والله يا بنات، مهما حاولت أكون قوية، تجيني لحظات أحس فيها بالوحدة وأتمنى لو أن عندي أحدًا أشاركه همومي وأحلامي،

أنا مؤمنة إن الزواج رزق من الله، وإن لكل إنسان نصيبًا ووقتًا كتبه الله له، وما أبي أستعجل على شيء ما كتبه ربي لي، لكن ادعوا لي الله يشرح صدري، ويقوّي قلبي، ويرزقني الزوج الصالح عاجلًا غير آجل، ويرزقني فرحة تنسيني مرارة الانتظار، ويجعل القادم من عمري أجمل مما مضى.

واللي بيقول اشغلي نفسك الحمد لله قدمت على وظائف وما صار نصيب بالقبول، وبالنسبة للمناسبات والاختلاط الحمد لله أروح وأختلط. لكن الزواج رزق ونصيب، ومو كل شيء بيد الإنسان، وأنا طرحت الموضوع للفضفضة وطلب الدعاء، الله يرزقنا وإياكم الخير 🤍

و تكفون يا بنات، لا تنسوني من دعواتكم.ادعوا لي في صلاتكم، وفي جوف الليل، إن ربي يرزقني الزوج الصالح اللي يتمناه قلبي، ويعفني بالحلال، ويجبر خاطري جبرًا يليق بكرمه والله إني محتاجة دعواتكم من قلب

وإذا فيه وحدة منكم كانت متأخرة بالزواج، ثم رزقها الله بزوج صالح بعد طول انتظار، أتمنى تحكي لي قصتها وتطمني قلبي، وتقول لي كيف كانت أيامها قبل الفرج، وكيف جاءها رزق الله من حيث ما كانت تحتسب. أحتاج أسمع قصصًا تزرع الأمل في قلبي

الله يرزقني ويرزق كل بنت تتمنى الزواج بالزوج الصالح، ويجبر قلوبنا، ويعفنا بالحلال، ويرزقنا حياة مليئة بالمودة والرحمة والسكينة، ولا يجعل في قلوبنا حسرة على شيء، ويعوّض كل محرومة خيرًا، وكل منتظرة فرحة، وكل مهمومة فرجًا