كيفكم اخواتي الغاليات؟ عساكم بخير؟
حبيت هنا انقل قصتي اللي استمرت لمدة 18 سنة ولا اعلم متى تنهي!
انا يابنات تزوجت لما كان عمري 16 سنة وكان زوجي لؤطه زي مايقولون..حسب ونسب ومال وعز وكل شي لدرجة اني كنت موضع حسد علني لبنات العيلة في فترة الخطوبة..
تمم ربي وبخير وجمعنا عش الزوجيه..زوجي كان ماسك شركة ابوه اللي لها مشاريع في شمال المملكه وكان دايم يسافر وانا كنت لاهيه بدراستي واهلي يعني اقدر اقول كانت لقائاتنا تقتصر على الويكندز.. لكنه ماكان مقصر ابدا من ناحية ماديه وكنت ساكنه بفيلا لحالي مع شغالتين وسواق وبواب رغم معارضة اهلي الا اني كانت حابه اترك السعه واروح لبيت اهلي اللي فايض باخواني واخواتي لانني انا كنت البكر واول وحده تركت البيت..
بعده عني وصغر سني ماخلاني اعرف قيمة الزوج في حياتي واستمرينا على هالحال لما تخرجت من الجامعه وحملت وربي رزقني بولدين توأم الحمدلله اعتبرهم بهجة حياتي..
بعد الولادة زوجي بلغني انهم بيفتحون فرع للشركه في دبي لان هذاك الوقت دبي كانت في اوج قوتها الاقتصاديه ومتعطشه لاي استثمارات (على حد تعبيره بذاك الوقت)..
سئلته وانا والعيال بنروح معك..قالي لا مو ضروري اجلسي هنا لان امي ماتتحمل بعد احفادها عنها وانتي عارفه اني غلا عيالي عندها غير عيال اخواتي..وافقت بدون اي اصرار لاني اصلا ماكنت متعوده على وجوده معي الا لماما..
جلس في دبي 7 سنين تخللتها زيارات للرياض وغير الصيفيه والاجازات القصيره اللي كنا نقضيها سوا..
لكن بعدين بديت احس اني محتاجته خصوصا اولادي اللي كانوا دايما يسئلون مابعد ماكبروا بابا ليش يسافر كثير هو مايبينا هو مايحبنا وكنت اقولهم اي شي بس عشان يسكتون بدون اي اقتناع مني..
رجع زوجي للرياض بعد غيبه طويله وكنت فرحانه جدا برجعته واقول في نفسي خلاص اللحين بنستقر وبعيش مثل باقي الحريم..لكن للأسف زوجي رجع انسان ثاني بعادات سيئة جدا!!!!
حصلت مشاكل بينه وبين ابوه وقام وفتح لها شركه له..انبسطت بقراره لان في معتقداتي الساذجه ان هالشي بخلي عنده حريه اكثر لكن للاسف اول شهرين وظف له سكرتيره لبنانيه وبهذاك الوقت ماكان الشغل المختلط منتشر او مقبول غير بالمستشفيات وبعض البنوك..
زعلت وعصبت وقلت ليش ماتوظف رجال وقال هذي اعرفها من ايام شغلي بدبي وهي عارفه الشغل كله من اي تو ذا زي على قولته وانا مالي خلق ادرب احد او افهمه الشغل ابي سكرتيره تنفيذيه تبدا معي على طول..
سكت على مضض واستمر على هالحال سنه .. لما جا ذاك اليوم ولقيته جايب السكرتيره البيت بزعم يكملون الشغل بالبيت.. انا اول ماشفتها حسيت بزي اللي كب مويه بارده على جسمي وبعدين زي الحراره في اطراف جسمي وصرت ارتعش ومدري وش اسوي..حسيت بقمة الاهانه وعصبت جدا.. كتمت غضبي واستنيت لما بالليل..
وللأسف استنيت واستنيت بغير فايده لما قررت انزل تحت واشوف وش السالفه.. رحت لما مكتبه ولقيت الانوار مطفيه وهدوء..دورت بالبيت كله مالقيته..طلعت برا لقيت سيارته مو بالكراج وعرفت انه طلع لمكان لايعلمه الا الله..ليلتها جلست اصيح لما ارتحت واستغفرت وتعوذت من ابليس ونمت.. قمت بعد الظهر لاني مانمت الا متأخره واتصل على جواله والقاه مقفل..وجلست اجرب للعصر ومافيه فايده..سئلت السواق وقال اني ماجا اليوم خير شر..اتصلت على المكتب حقه ورد علي واحد وقال اني سافر دمشق شغل ضروري.. انا هنا فقدت اعصابي وحسيت الدموع تتجمع مره ثانيه بعيوني وحسيت قلبي ينعصر والم رهيب في راسي.. ماتتخيلون القهر اللي حسيت فيه ..ملطشه في هالبيت يروح ويجي ويسافر على كيفه ولا حتى يعبر هالادميه اللي جالسه قدامه.. جلست اتصل على جواله لما شبك حوالي العشا وسئلته وصوتي يرتعش وين وكيف وليش ماتقولي...تخيلو رد بكل برود ومن متى انا متعود اقولك عن سفراتي ولا رداتي.. انا هنا هانت على نفسي سكرت الخط بهدوء وجمعت كم غرض لي ولاولادي وطلعت بيت اهلي..
جلست اسبوع في بيت اهلي لاحس ولا خبر منه ماعدا امي اللي تهزئني على الطالعه والنازله ورغم كذا كنت اقولها لازم يعرف يقدر بيته وزوجته وعياله..بعد اسبوع بالضبط دخلت امي على مستبشره وفرحانه "رجلك جا رجلك جا" التفت وقلت يعني؟ وش مفروض اسوي اقوم اطير اسلم عليه ولا ايش؟ من الفرحه امي حتى ماهتمت ترد علي وطلعت من الغرفه.. بعد شوي جا ابوي وقالي رجلك يبي يشوفك..وانا بعناد الاطفال قلت مابي وجلس ابوي يقنع فيني وانا رافضه ومصره..يئس ونزل..شوي وسمعت نحنحه والا اشوف زوجي داخل علي ومسكر الباب...
هذيك الساعه حسيت كل مشاعري اللي علبتها في بيت اهلي انطلقت واجلست بس اصيح وانهنه والقهر ياكلني..
قرب مني وباس راسي وقال حقك علي ومالك الا طيبة الخاطر.. ماقدرت اقاوم لاني كنت مشتاقه له لاقصى درجه ورجعت البيت وانا امني النفس بكل انواع الحب والحنان..
طبعا هالحب والحنان دام يومين بس ورجعت ريمه لعادتها القديمه..انا قررت عشان راحة بالي اني اطنش واكمل حياتي مثل اول .. اجتماعيات وبس والزوج يحتل جزء صغير فيها
استمريت على هالحال مده وانا كل مالي اشوفه يبعد اكثر واكثر..لدرجة صار كل كلامنا صباح الخير وتمسون على خير وفمان الله!!!!!
قبل سنتين دخل علي ووجه مكشر وصلف وقال اسمعي تراني بتزوج كوليت (اسم السكرتيره) كذا والله يابنات بدون مقدمات ولا احم ولا دستور..قالها وطلع وانا تجمدت... ماادري متى تحركت وقمت واتصلت على امي وانهرت في التليفون لدرجة انها جتني طايره للبيت تحسب صايره شي لانها مافهمت مني اي شي على التليفون..
بعد ماهديت قلت لها كل السالفه .. تنرفزت الى اقصى درجة واتصلت على امه وقالت لها كل شي (وخالتي تغليني كثير بحكم اني مرة ولدها الوحيد وتعتبرني زي بناتها بالضبط..الله يطول بعمرها *****الله) جت خالتي معصبه وغضبانه وانتظرناه كلنا لما رجع اخر الليل...طالع فينا وقال بكل استهزاء مشاءالله مجمعه حريم العيله كلهم ورا ماناديتي عماتي وخالاتي بعد ونخلي السهره صباحي!!!! هنا امه عصبت وتكلمت بما معناه ان هاللبنانيه ساحرتك وانت وشلون ترضى تاخذ مثلها وانها حتى مو مسلمه.. تخيلوا انه مارد عليها حتى بس جالس ويطالع وتكلمت وامي ماقصرت .. في النهايه قال انا ماخذها ماخذها ووفروا الحكي اللي ماله سنع.. امي قامت وقالت مشينا مالك قعده في هالبيت..تخيلوا وش قالي؟! عيالي خليهم وانتي مع امك مع الف سلامه.. هنا حسيت بزي الخدر اللي يمشي بجسمي وحسيت لساني انعقد لكن امي انقذت الموقف وقالت عيالك كبار والشيخ بيخيرهم بين بنتي وبينك.. رد ثانيه لك استخفاف ليش ناووين تطلبون الطلاق..ابركها ساعه !!!!
انا هنا انهرت وجلست اصيح واقول حرام عليك وش سويت بيتك ومئمنته ونفسي وحافظتها وش تبي اكثر.. قال انتي ماقصرتي بس انا احبها وبتزوجها..
طلعت مع امي لبيتنا وتركت اولادي لاني مابغيت اسوي مشكله واروعهم من بكره جا ابو زوجي بنفسه والله استحيت منه وحب راسي وقال والله هي الطالعه وانتي الداخله وماعاش اللي يسوي فيك كذا بس انا رجيتك ترجعين لعيالك وبيتك..
استحيت منه مره ورجعت عشان خاطره بس.. لقيت عيالي مكتئبين وحالتهم حاله وتفتت قلبي عليهم.. يعلم الله اني مارجعت الا عشان خالي وعيالي ولا هو عافه الخاطر وكرهته..
صارت مشاكل وكلمه ابوه لكن مافي فايده كان راكب راسه ومعاند الى ابعد حد.. تزوجها يابنات في لبنان وسوو زواج هناك والله اني ليلة الزواج كنت احس اني مريضه ومرهقه وزي المحمومه وخالتي ام زوجي فوق راسي تقرا علي وتهديني وانا القهر ياكل مني اكل..
طلعوا شهر العسل ولا فكر حتى يتصل .. بعد شهرين بالضبط رجع البيت بدون حتى مايقول سلم سلام عابر وراح لمكتبه على طول.. ادري اني طولت عليكم بس حبيت اشارككم قصتي واستخلص منها العبر اللي ممكن تفيد اي وحده..
ادري اني اللي صارلي هو ماجنته يداي.. على قولة المثل جنت على نفسها براقش..
زوجي صار بالاسم بس مايجمعنا الا هالولدين وكل كلامنا يدور في فلكهم... تخيلو من تزوج ما لمسني زوجي ابد وكأن فيني وباء او مرض معدي.. ماتتخيلون هالشي كيف مأثر على نفسيتي رغم اني مهتمه بنفسي الا اقصى درجة والكل يشهد بجمالي واناقتي لكن معه احس اني شينه وبشعه وانسانه مايتقبلها مخلوق..
انا تعبت من الحياة معه معلقه لازوجه ولا مطلقه.. والادهى والامر اني كل ماجبت طاري الطلاق امي زوجي تحلف علي وتقول والله مايطلقك الا يطلق هالسربوته اللي لعبت عليه.. يابنات انا والله مو جالسه معه الا اخاف من شماتة الناس وتشفيهم واخاف ان اولادي يتشتتون لان الحياة مع ام مطلقه صعبه جدا..
الحيرة تاكلني الكل والهم مو مخليني .. كل يوم اقول بيعقل ويرجع لي لكن كل مالي اشوفه يبعد ويجافيني اكثر..
ادري ان الفاس وقعت بالراس خلاص لكني ادعي كل يوم ان ربي يرده لي ردا جميلا وانه يخلصه من براثن هالمسيحيه اللي ماتخاف ربها..
يااااارب اشرح لي صدري ويسر لي امري ياارب يااكرم الاكرمين..
واسفه اذا طولت عليكم..
دمتم بود اخواتي الحوائيات
فــــريال @fryal_7
عضوة جديدة
يلزم عليك تسجيل الدخول أولًا لكتابة تعليق.
فيافي999
•
الله يصبرك ويعوضك ان شاءالله
الله يكتبلك الخيره ومرده لك بس المشكله متى بعد ماعافه الخاطر وكسر نفسك انتي انسيييه بالمره واهتمي بحالك وبعيالك والله يرده عاجلآ غير آجل وكم صارله متزوج
الله يفرجها علينا وعليك عليك ياختي بالصبر واحتسبي الاجر بتربيه ابناءك
اما زوجك صدقيني بيجي يوم ويعرف قدرك
اوصيك ياختي بالاستغفار والدعاء وسهام الليل لا تخطئ
اما زوجك صدقيني بيجي يوم ويعرف قدرك
اوصيك ياختي بالاستغفار والدعاء وسهام الليل لا تخطئ
سهااار
•
والله ماادري ايش اقولك
وليش !!!! تقولين انك انتي اللي جنيتي
إنتي حافظتي على نفسك واولادك وبيتك
كم عمر اولادك
الله يفك ضيقتك
والزمي الإستغفاار بنية إنو زوجك يرجعلك
وليش !!!! تقولين انك انتي اللي جنيتي
إنتي حافظتي على نفسك واولادك وبيتك
كم عمر اولادك
الله يفك ضيقتك
والزمي الإستغفاار بنية إنو زوجك يرجعلك
الصفحة الأخيرة