مادري زوجه حماي تغار مني ولا انا اتوهم ؟!

اهلين كيفكم بنات ..

حبيت اطرح مشكلتي مع زوجه حماي دايم افكر في تصرفاتها.. ولا ابي اظلمها ..لذلك بخاطري اسمع راي اخر وتبرير لبعض تصرفاتها معي .. علما ان ماعندي سلفه غيرها واليكم عده مواقف دايم تحصل معي بخليها على شكل نقاط :


1- من كنت عروس ما اعرف جماعه زوجي فاول مابدوا يرحبوا فيني بمجالسهم .. كانت تجلس بعيد عني وتغوص بين الحريم وممكن تجلس باي محل الا المحل الي يكون جنبي ( وهذا الى الان يحصل ) بس لما كنت عروس ما كنت اعرف احد حسيت فيني جرب بسم الله علي هههههه محد يبي يقرب مني يفهمني السالفه جالسه بكنبه لحالي .. بس مالوم الغرب بس هي المفروض محل اختي تعرفني على العالم الي مسيرين .




2- دايم بالمجالس اذا جيت جنبها بعد خمس دقايق توخر عني و تحاول تتقرب من البنات يكونون شوي مغرورات تحب كذا اما الي يجي يدلق نفسه توخر عنه .




3- اذا كنت انا معها عند خالتي ام زوجي ماغير 24 سالفه ورى سالفه تسولف مع خالتي وانا ولا هنا .. ماتطالع فيني .. و اذا طلعت ام زوجي من الغرفه يصير الوضع احراج .. مافي شي نقوله لبعض !


4- دايم تحاول تسوي نفسها الفاهمه بنات تفرض نصايحها علي وانا ماطلبتها !! يقهرني اسلوبها وتقهرني ذرابتي معها اكثر .. ودي اوقفها ساعات .. يعني مثلا تبي تعلمني كيف اربي ولدي .. واي نقد تقولها ام زوجي مش فصالحي تكبرها وتاكدها .

5- دايم تسالني وش بلبس للمناسبه الفلانيه اي لون وستايل الفستان وانا من طيب قلبي وصراحتي اعلمها .. وهي يالله ماتصدقون كيف تخبئ بطريقه مستحيله ..
و ساعات تقولي لا تلبسين فستانك الفلاني الي بزواج فلان لاني بلبس واحد زيه !! وبالاخير ماتلبس فستانها الي يشبه فستاني .. بس ماتبي البس فستاني والله اعلم لانها تدري ان كلمن عجب فيه قبل !!


6- وايضا مره تتكتم على اخبارها وما تعلمني انا بذات و تسال كثير عن اخباري بتفاصيل !!

7- اي شي اسويه لما يجونا ضيوف تقلدني يعني لو جالسه سنه ماتحركت اذا انا قمت اضيف واقهوي راحت تقدم حلا وكذا !! و يبين انها تبي تثبت انها سنعه بطريقه طفوليه صراحه وينها من اول ماتحس بالعالم ليه لما تشوفني اتحرك قلدت !!

8- ساعات تحقد علي وتفسر اشياء من كيفها لدرجه تخاصم بدون سبب وانا مو متعوده اتعامل بسلوب كذا ..:44:

9- اشوفها كيف تحاول مع اهل زوجي وتسوي لهم حركات وتتمصلح وانا ماتسوي ربع الربع ؟ مادري ليه ؟

10 -ساعات تحذفني من قائمه الاتصال عندها متى ما اشتهت وجاء ببالها .. ومره كانت حاذفتني لها شهرين يمكن ولما سالوها عني قالت اني محذوفه من قائمتها ولا علمتهم انها هي الي حذفتني !! من جد قمه الظلم والافتراء .. وحذفتني بسبب انها تخاصمت مع بنت خالتي !! وانا وش دخلني من جد عيب انا زوجه حماها مافي احترام !كنها ماصدقت تحصل سبب تطلع حقدها :16:


بنات والله الحكي واجد وحركاتها مره تنرفزني .. وربي اني طيبه وهاديه ولا ادور ازعج احد وكلن يثني على باخلاقي .. لكن الانسانه هذي بذات تعاملها غريب معي .. اغلب الناس الي تجيها بطيب ترد لك بطيب .. بس هي مايثمر معها والله مايثمر !! انصحوني بالله ؟؟ وش اسوي معها ؟؟