ماذا تتوقعين في النـــفـــــاس ... موضوع للي نسا واللي ماجرب..

السلام عليكم ..

بما اني في النفاس الثاني .. حبيت احط لكم الاشيا المشتركة تقريبا بين الحريم .. واللي نتوقعها بعد فرحة البيبي وتوتر الولادة .. والصريخ والنحيب .. :42:.. واللي عندها اشيا زيادة تضيفها (من ذوات الخبرة اقل شي ولادتين وفووق هههه ) ..
بسم الله الرحمن الرحيم ..

- اليوم الاول: احااسيس غريبة ماتعرفين انتي بحلم ولا بعلم الناس يكلمونك بس مافي تفاعلات منج . . تبين تشوفين البيبي وتطمنين اهم شي ..
-اول ماتقومين من الفراش بتحسين بدوخة وعدم توازن (طبيعي لأن الثقل راح ومركز الجاذبية في الجسم تغير) .. وطبعي تمشين خطوتين وتتسندين او تردين تقعدين مرة ثانية ..

-اول دخلة للحمام غيربة شوي ويمكن حد يساعدج فيها .. لأن الدم كثير من الولادة والجرح جديد ..وبتحسين بحرقة في البول من القسطرة .. وبتستمر الحرقة كم يوم وبيخففها المسكن والمضاد ..

- بتحتاجين ملينات للبطن لأن الامسااك بيبدا والجرح مايتحمل اي امسااك ..
- تمارين كيجل اللي تعودتي تسوينها يمكن ماتقدرين تتحكمين فيها ولا بتحسين بالعضلات الا بعد فترة من الولادة .. ناس بعد يوم ونااس بعد شهور .. على حسب قوتها وقدرتج وتدربج عليها ..

- الخيوط بتمسك المنطة المحظورة .. وبتحسين بشد فيها بالذات اذا طولتي في جلسة المرحااض ..

- في حريم خاصة البكريات بعضهم مابيقدرن يجلسون طبيعي بسبب الخيوط وألمها .. وبيحتاجون مخدة تحتهم او انهم يجلسون بطريقة ماتظغط عالجرح ..

- حلمات الثدي .. توقعي ألم فيهم واحمرار من الرضاعة ونصيحة داومي على كريمات تشقق الصدر بعد كل رضعة وغسلي الحلمة بماي بارد عشان تخفف الألم قبل وبعد كل رضعة .. وعادة الألم يكون اول ما البيبي يمص وخلال 30 ثانية تهون العملية ..

- البطن: بتنصدمين من شكله اول مرة .. مترهل .. لونه غير ... معتفس .. بس بيرجع طبيعي مع مرور الوقت والتمارين والمواظبة على ترطيبها..

- النفسية : يمكنتمرين بحالات تبين تبكين فيها وتحسسين من كل شي حتى لو حد نفخ بتتضايقين .. عادي .. اذا تأزمتي .. اذكري الله واطلعي اتمشي شوي رفهي عن نفسج ...

النـــــوم : >> اعشقه النوم .. مابتاخذين راحتج وايد .. لأن البيبي كل ساعتين او ساعتين ونص يجوع ويبي يرضع ويغير .. انتبهو ترا البيبي مو دايم يصيح عشان الجوع ... فيه كم سبب منها (الحر أو البرد والجوع و الملل و لفت الانتباه و طلب الحضن والحنان و تغير الحفاظ ) ..

نصيحة للي تبي تنام شويتين ع بعض .. رضعي البيبي من صدر ودسعيه (جشعي او كرعيه) .. وخليه شوي بيرجع يصحى رضعيه من الصدر الثاني وقومي بدليليه وكملي الرضعة لين يشبع وحطيه ونامي .. ودفيه عدل وخلي السرير قريب منج عشان يحس فيج ويطمن ..

على نهاية النفاس التهي بنفسج طبعا لل:arb: .. وتعدلي وتحني وروحي زيارة للدكتورة عشان تتفاهمون على نوع مانع الحمل وتطمن على مكان الجرح وتعطيج تحميلة تنظفين فيها المهبل والرحم وترجيعين بيتج ..

و كل نونو وانتي بخير ... :icon28:
دعواتكم لي وللخوات النفاس ان الله يهون نفاسنا ويساعدنا ويمرر الفترة ع خير ..
وطبعا هالمعلومات قد تختلف من شخص لأخر ,.. ومب ضروري تحصلج كل هالاشيا واللي عندها اي اضافات تفيدنا ..
:26: