ماذا حصل لي ليلة العيد ؟؟؟

السلام عليكم من العايدين اول وكل عام وانتم بخير

يا بنات حوى يا اعز بنات على قلبي اسمعوني واتركوني افضفض لكم الي بقلبي وابي ردودكم وتعليقياتكم لا اتطنشوني تكفون جى دوري بمنتدى المشاكل وش اسوي الدنيا يوم لك ويوم عليك

اقول لكم سالفتي

انا عايشه بمدينه بعيده على حدود المملكه انا وامي وابوي بس
قصة حياتنا قصه سحبتنا من الرياض وجابتنا هنا

لي ثلاث اخوان كل واحد منهم بمدينه
ولي اربع خوات ثلاث منهن متزوجات ثنتين بنفس مدينتنا ووحده بمدينه بعيده ووحده اصغر مني تدرس بالجامعه بالرياض

المهم تمر علي السنه كامله وحيده وحزينه اشتاق الى جية اخواني الي ما يجون الا بالعيد
وهذي السنه فرصه كلهم قرروا يجون بالعيد مع بعض

وين المشكله ؟
المشكله اني حساسه جداً وأحس بالضعف من داخلي ما ادري ليش
حتى ان الي يغلط علي ما اقدر ارد عليه

كنت حاجزه للعمره بليلة الخمس والعشرين انا وامي و واثنين من خواتي وصرفت كل راتبي بالعمره وخليت مبلغ سبع ميه قلت اذا رجعنا من العمره بشتري لي اي شيء للعيد
رحنا للعمره وانبسطنا وادينا المناسك الحمد لله
وجينا ولقينا كل اخواني واصلين عندنا والله يعلم وش كثر افرح بجية اخواني والله يعلم انه يمر علي ايام وليالي ابكي فيها من كثر شوقي لهم وامنياتي انهم يكونون قريبين وخصوصاً بعد مرض والدي وضعفه الشديد

كنت طول فترة غيابهم مؤديه ادوارهم وانا بنت انا كل شيءاسويه وكل شيءاجيبه وساكته ولا عمري شكيت لهم
المهم لما اعلنوا للعيد تذكرت اني ما اشتريت شيء للعيد

والله يا بنات ما همني اللبس ولا عمري اهتميت
لكن الدنيا عيد والإنسان يبي يفرح مع الناس

طلعت ليلة العيد كانت الدنيا زحمه والسيارات على بعضها
قلت لاخوي نزلني عند احد صرافات الراجحي انا وبنت اختي عمرها عشر سنوات

وفعلاً نزلنا عندها وراح اخوي كان عنده شغل والصرافه بجنب السوق قال روحي اصرفي واشتري واذا خلصتي دقي علي لانه ماكان قادر يدخل بسيارته بالزحمه

المهم انا شفت الصرافه زحمه مره مليانه رجال اعداد مهوله
غلبني حيائي عن مزاحمة الرجال
والا اشوف واحد ولد يمكن عمره عشرين سنه واقف قدام الصرافه قلت هذا ممكن اتجرا عليه واطلبه يدخل بالزحمه ويصرف لي ويرحمني لاني أمرأه

قلت له : تكفى يا اخوي الصرافه زحمه ومليانه ارجال ونا استحيت لا ادخل بينهم ممكن تصرف لي
قال : ابشري كم الرقم السري
قلت الرقم السري ....كذا كذا تكفى يا اخوي اصرف لي

المهم دخل الولد بالزحمه
ما كنت قادره اميز هو صرف والا لا
ورجع وقال لي بصراحه ما قدرت اصرف لك صفيت طابور وانا عندي موعد
قلت ماهي مشكله
مشكور وجزاك الله خير

وبالزحمه اشوف اخوي
واعطيه البطاقه
وهو يدخل بالزحمه قال مافيه ولا ريال بحسابك
اثاري الأخ الحيوان الحرامي صرف كل الي بالحساب وراح

انا انصدمت انقهرت صرت ما اشوف الطريق

الحيوان استغل ضعفي وحيائي ونخوتي له واخذ فلوسي وراح

والله اني سكت واحتسبت كل هذا لوجه الله وصبرت مع اني كنت مقهوره واتقطع من داخلي

مدري هو غباء مني اني استحيت ادخل بين الرجال
والا هو الولد ابن حرام ولا عنده نخوه ولا شهامه
رجعت للبيت
وبدأت المشاكل
كلهم حطو اللوم علي وصارت مشاده كلاميه بيني وبين أخوي الكبير قال لي كلام جارح ما قدرت أتحمله

أنا الي أتحرى جيت أخواني على أحر من الجمر يصير بيني وبينهم كذا

والله إني طحت مريضه
ولا قمت من فراشي صبح العيد
والي زاد الطين بله
كل خواتي حطوا اللوم علي
واجلسوا يقولون لي من الكلام الجارح الي مافيه احد يقدر يتحمله
كل هذا ويبوني اقوم واطلع والبس واتكشخ قدام الناس
بالله عليكم
انا اخطيت لاني زعلت منهم
مافيه احد قال معاك حق تزعلين
او تعالي نراضيك

بالعكس خواتي قاموا زودوا المشكله وخلوا امي اتهاوشني وخلوني نكديه واني ما احب اخواني واكره لمتهم
اشيـــــــــــــــــــــــاء كثيره اجرحت مشاعري

حتى انهم عايروني اني ما تزوجت للحين

كلامهم كان قاتل
وجارح
ذبحني
موتني
خلاني لا حسيت بالعيد
ولا حسيت بالفرح
ولا ادري وش هو

مدري وشلون اطلع من هالمشكله


وشلون
؟