مارأيكم بالمناهج المطورة

السلام عليكم ورحمة الله وبركاته
كيف الحال أخواتي وكيف وضعكم مع المناهج المطورة سواء المعلمة اللي تدرس منهج مطور او الامهات اللي يدرسون عيالهم
ودي اعرف المؤيد والمعارض منكم عليها لاني اشوف اغلب الناس يشكون من كثرت الكتب وصعوبتها

مع العلم انها مناهج رائعه والدولة ادخلتها عشان تطلع عقول صح فاهمه يتخرجون وعندهم معلومات وثقافه مش حفيظه بس المشكله مو فيها المشكلة في المدرسات اللي يعطونها صراحه انا ماقول كل المعلمات لكن والله فيه معلمات ماعندهم ذمه وضمير ومادري وشلون يحللون رواتبهم اغلب الكتاب يكون واجب وتلاقينها تطلع قبل ماتنتهي الحصه المنهج المطور يبغاله مجهود كبير من المعلمة اكثر من الاهل والمفروض من المعلمة ان كتاب النشاط يكون معها عشان ماتثقل على الطالبه اولا وثانيا في نهاية الاسبوع تعطيه الطالبه عشان يطلعون عليه الاهل
للاسف الدولة طورت المناهج لكن ماتقدر تطور العقول اللي تدرسها ليش ماينزلوا في ايام العودة دورات تدريبيه مو بعد الدراسة بشهر يسون دورة ومدتها يومين وغير اجباريه اللي حضرها بيشرح زين واللي ماحضرها يشرح من راسه
غرضي من كتابة الموضوع صراحه هو تنبيه المعلمات اللي يشرحون اي كلام واللي تخطط الكتاب من غير شرح كيف تحللين راتبك وكيف ترتاحين وانتي راجعه على بيتك ماتخافي من الله لا يعاقبك بسبب هالطالبات

صراحه مر علي عينات كثيره من هالنوع الله يهديهم بس تخيلي لو تجيك دعوه من طالبه او من امها والله بعذرها ياليت الوزارة ترجع حضور الموجهه اكثر من مره في السنه ويكون من غير ماتعلم المعلمه عشان ينضبطون المعلمات من اول السنة
بس هذا مايعني ان كل المعلمات سيئات فيه معلمات ماشاء الله عليهم ماتطلع من حصتها وشرحها ووسائلهاتفتح النفس وتبذل مجهود كبير مع الطالبات ودائما تشوفي دفاتر الطالبات على مكتبها وتصحح طبعا هذه الظاهرة والوسائل للاسف ماشوفها في مدرستنا الله المستعان بس
ومعرفة رايكم وين المشكله بالضبط بالمنهج والا في المعلمات والا في الاشراف اللي ماهيأ كوادر ناجحه

واسفه على الاطاله