شلونكم ؟ ان شاء الله تكونون بخير. الله يسعدكم يارب. موضوعي اليوم عن مجموعة ماسكات للشعر التالف والباهت بسبب عوامل خارجيه مثل الاستشوار والتعرض للحراره او عوامل داخليه مثل نقص الفيتامينات والى اخره.
الماسكات خفيفه وما فيها رائحة ونتايجها فعاله جدا. ابي منكم الدعاء فقط( في ظهر الغيب)
في خطوه مهمه لازم تسوينها سواء سويتي هذي الماسكات او لا الا وهي تنظيف فروه الشعر. هذي الخلطه تستخدم مره شهريا لتنظيف فروة الراس من الرواسب والزيوت الي ما انغسلت. ما راح تشوفين اي تغير هي مجرد انعاش لفروة الراس لاستقبال فوائد الماسكات والحنا والزيوت او فقط لمجرد النظافه. المكونات سهله. راح اقولكم كيف. كل الي راح تحتاجونه
- ملعقة ونص كبيره سكر بني او سكر ابيض(اهم شي خشن مو ناعم)
- ملعقه كبيره بيكربونات الصوديوم (مو بيكنق صودا ما له بديل)
- ملحقتين الى ثلاث شامبو هيدانشولدرز او كليرز او اي نوع شامبو ثاني (ذكرت الاثنين هذي لانها مخصصه للقشره وتنظف بعمق بس اذا غير متوفره استخدمي الشامبو الي تستخدمينه بالعاده)
تخلط المكونات وتستخدم الخلطه اثناء الاستحمام والشعر مبلل وتفرك فروة الرأس ونسوي لها سكراب ومساج. تكرر مرتين الى ثلاث لين ما تخلص الكميه. فقط على فروة الرأس.
نجي للجزء الثاني من الماسكات
مهم جدا الشعر يكون نظيف لا زيوت ولا سيروم ولا اي شي حليه عشان يستفيد الشعر من الماسكات. راح اطرح قناعين للشعر. الي شعرهم تالف من الصبغات او الفرد تقدر تستخدمها مره بالاسبوع مع العنايه المتكامله بدل حمام الزيت. هنا موضوع العنايه بالشعر التالف
https://www.hawaaworld.com/ترميم_واعادة_الشعر_التالف_جدا_من_الفرد_الكيميائي_والصبغات_موضوع_متكامل-4759698/post/96408698/count/1/
الماسك الاول هو ماسك التفاح
مفيد جدا للشعر التالف والباهت راح يعيد لمعته وحيويته. وحتى الاستشوار بالمناسبات راح يفرق. جربوه وما بتندمون.
الي بتحتاجونه
- تفاحه او تفاحتين (حسب طول الشعر )
- اثنين الى ثلاثه ملاعق زيت ( اي زيت للشعر تستخدمينه + والكمية حسب درجة جفاف الشعر)
الطريقه تقطع التفاحه قطعتين ويسلق ( بقشوره) لمده ساعه ،ثم توضع بالخلاط مع شوي من الماء الي سلقناه فيه لان فيه فوائد التفاح. راح يصير قوامه كريمي اخلطي معاه الزيت وحطيه عالشعر ( هذا الماسك تجنبي الفروه لا يقربها) لمدة ساعتين واغسليه عادي كالمعتاد.
الماسك الثاني :
ماسك الباميه وهو عباره عن بذر الكتان وباميه. ماقدر اوصف لكم جمال القناع هذا. يخلي الشعر مرايه من اللمعه الي يسويها.
مكوناته :
بامية على قد اليد
ملعقتين كبار بذر الكتان
طريقته:
يغلون عالنار لمدة ١٠ دقايق او الى ان يتكون قوام الجل. يصفى وهو حار. ويوضع عالشعر لمده ساعه ويغسل عادي. راح تلاحظين الشعر لامع وقوي وتحسينه فرش.
الماسك الثالث:
ماسك حليب جوز الهند والنشا. يشيل النفشه ويخفف التقصف. ويرطب الشعر بعمق. ينفع لكل انواع الشعر.
مكوناته:
- كوب ونص حليب جوز الهند ( تقدرين تستبدلين بحليب كامل الدسم بس حليب جوز الهند افضل)
- ملعقتين كبار نشا
- عصير ليمونه
الطريقة يخلط الليمون والنشاء مع بعض وبعدين نضيف الحليب لها ونحطها على النار لين ما يصير القوام كريمي ونرفعه على طول. يوضع على الشعر لمده ساعه ونغسله. راح يعطي لمعه ورطوبه.
الماسكات هذي تستخدم مره اسبوعيا. وطبعا يمكن استخدامها للشعر المصبوغ
ان شاء الله انكم استفدتوا من الموضوع. اطرحوا تجاربكم اذا جربتوا احد الاقنعه. اتمنى لكم يوم سعيد.