الماسةوالدمعةحساسة @almasoaldmaahsas

عضوة نشيطة

ماضينا الجميل هل سيعود يوما ؟

كثير من الاحيان أجلس مع نفسي وأتذكر الماضي >>> أحلفي
من أيام الطفولة للمرحلة الأبتدائيه مرورا بالمتوسطه <<<ايه وبعدين
تصدقون بنات حياتنا زمان كانت حلوووه وتحسين انك عايشه مو مثل اللحين امس مثل اليوم , واليوم مثل بكره
أذكر زمان قبل لاادخل المدرسه كنت مرره مشاكسه ومزعجه حتى الجيران ماسلموا من شري كنت مسويه لي عصابه وانا رئستها كنت اجمع اخواني وبعض اطفال الجيران ونزعج خلق الله
اذكر جارتنا ام ماجد تجي وتشكي لجدي مني
زمان كانوا الجيران يعرفون بعض ويتزاورون ياالله وكنا نعرف اخبار بعض حتى اذكر الشيبان زمان يجبوون لهم فرشتهم ويجلسوون عند بيت واحد فيهم ويتقهوون بالشارع ومستانسيين
المنطقه الى كنا ساكنيين فيها بيوتهم شعبيه موطين لا اقصد السقف حق البيت مكشوف اتمنى فهمتوني والله كانت ايامنا حلوه كنا زمان نجتمع بالحوش واخوي يشوي لنا بالحوش ومتجمعين نسولف ونضحك ,,, حتى اذكر احيانا ماننام بالغرف بالمكيفات لا كنا نفرش بالحوش وننام ونصحى بدري الله يالجو يهبل واذا جاء العصر تجمعنا وتقهوينا تصدقون بنات زمان العيد كان شي ثاني تخيلوا الناس كانت تجي تعايد لليوم السادس من العيد وكنا نحس بطعم العيد كنا نصحى بدري ونلبس ولازم شنطتنا بيدنا كنا صغار بس الشنطه لحلاوه العيد كانوا الناس يجوون يعيدونا من الساعه 8 الصبح والى داخل والي طالع ,,,,,
حتى اذا كانت عندنا مناسبات مثل العزايم ماكنا نحطها بسترحات لا كانت بالبيت ونطبخها بالبيت كنا نستعد من بدري ويمتلي البيت من الحريم والاطفال صح اذا راحووا كانت امي واختي يتكسروون من الشغل بس كانوا مستانسيين بالحيل كانت الناس قلوبها بيضى وصافيه وايام الاجزات الصيفيه ماكنا نسافر كثيير بس والله كنا نحس بطعم الاجازه حتى اذكر كانت جارتنا صديقه امي وكنت انا واخوي الي اصغر مني بسنه نروح نقضي طول اليوم مع بنت وولد صديقه امي تخيلوا نتغدى عندهم ونلعب ومانرجع الا بالليل
واليوم الثاني كانو هم يجوون عندنا
زمان كان كل شي له طعم حتى اذا احد بزورنا يجوون بدون مايتصلوون وكنا نسانس واذا بيطلعوون نزعل نبيهم يجلسوون اكثر مو اللحين اذا جاء احد من غير مايتصل تضايقنا بنات مو قادره كيف اطلع لكم الي جوايه بس صدق زمان كنا عايششين حياة صح مو اللحين مدري ايش السبب سبحان الله احس كل ماتطورنا صرنا معقدين اكثر لاتقولون يتهى لك اشوف اخوني الصغار اللحين مو مثلنا اول اقصد صح عندهم اللعاب وقنوات اطفال بس اشوف اكثر وقتهم جالسيين عند التلفزوون احنا زمان ماكنا نعترف بشي اسمه تلفزيون كثير اصلا ماكان عندنا غير القناة الاولى اذكر كانت تجي افلام كرتون زورو اذا جت جلسنا عند التلفزيون طبعن لازم يكون المركى ورى ظهرنا واذا خلص زورو لازم نقلده نجيب لنا اي قماس ونخرمه من العيون ونلبسه ونلبس قبعات ونجيب اي شرشف ونخليه شال مثل زورو عاد شوف سيوفنا ايش ملعقه او عصى المكنسه بس كنا نفرح
مو اليوم بيوتنا كانها علبه كبريت ومانشم الهواء ولا نشوف الشمس
وتلاقين كلن لحاله الى ع النت والى ع التلفون & الجوال
والى نايم
بنات انا موكبيره عمري 25 سنه
بس جت فتره احن لذيك الايام تخيلوا صرت افتح اليوتوب واشوف اي برنامج يجي ذيك الايام مثل كرتون زورو & برنامج الحصن & ذاك البرنامج الى مقدمه الاصلع كنت نسميه الجوهره
زمان حتى البرامج الى تجي ع الاولى كانت هادفه وحلوه خاصة برامج الاطفال خاصة فوازير رمضان للصغار ايام ابهار الالمعي & ورشا العتيبي
بنات انتم مثلي والا انا بس الى غرقانه بذكريات الماضي
اااه بس يامضينا الجميل
ـــــــــــــــــــــــــــــــــــــــــــــــــــــ
بنات الميك لكم
أختكم الماسة

يلزم عليك تسجيل الدخول أولًا لكتابة تعليق.

تسجيل دخول

الماسةوالدمعةحساسة • 13 سنة

وينكم .....تهئ تهئ .....ماعجبكم موضوعي صح

الماسةوالدمعةحساسة • 13 سنة

بنات شاركوني بموضوعي كل وحده تقول لنا عن طفولتها وحياتها زمان

نجوله الامورة • 13 سنة

اي والله انك صاااااااااااااادقه والله انا كمان من كثر ماااحن على هذيك الايام احط مسلسل العائله القديم لا ومحملته عندي على الجهااااااااااااااااااااااز والله واللله كنا نحس بطعم الحياة بطعم الفرح نحس فيه الحين ابد ابد مانحس بشي والله احس الدنيا مالها طعم مثل اووووول الحين القلوب مو صااافيه مثل اول الحين الام والله تحسد بنتهاااااااااا الله يعين على هذي الدنيا

الشتاء3 • 13 سنة

آهـ ذكرتيني بفوازير رمضان والبنات اللي فيها عهود الدغيشم وخلود وصابرين
ويازين رمضان كانت أجواء باردة ممطرة تهبل ياريت ترجع الايام الحلوه هذي

اللهم إنا نعوذ بك من زوال نعمتك وتحول عافيتك وفجأة نقمتك وجميع سخطك

زماني اتعبني • 13 سنة

:44::06::( يالله اشتقت الي ذ يك الايام

قصيت نفسي اصيح ياربي

كنت اموت بسالي واحسبها صدق حتي كنت اقول الي اهلي سموني سالي
احلي شئ نومت الحوش وايام المطر كنا نلعب علي الطريق محد سلم منا كنا موذي مره
والحناء ليله العيد والمرجيح علي الشجر والله وناسه وملاعق العسكريم نسوي منها عريس كنا اذكيا كل شئ نستقله نخترع العاب

يوووووووه لو بهرج ملون سنه ما اخلص

نفسي ترجع الايام ورايييييييييييي كمان انا من نفس عمرك

تقبلي مروري