ماضي وسر اخت زوجي

بنات انا تزوجت قريب مالي الا شهر بشخص ماهو من جماعتنا وفيه وحده من خوات زوجي والله يابنات من اول جلسه معها على طول حبيتها واحاول اتقرب منها مع انها ماتقربت مني يعني بالعربي ماعطتني وجه لانها اول مره تشوفني
مرت الايام وقابلتها باكثر من مناسبه النظره لها ماتغيرت الكاريزما ماشالله عندها عالي حتى مره طلعنا اهلي واهله باستراحه والله يابنات ماكذب اهلي انهبلوا عليها من جمال الكاريزما اللي تمتلكها انجذبوا لها بشكل لدرجه يمدحون شكلها وهي عاديه
زوجي مايطلب الا منها اذ دخل بيتهم مع انها ماهي اكبر وحده اذ غابت عن جمعتنا يصير الاجتماع ماله طعم وسامج حتى زوجي اسلوبه يتغير معها يطلع فلاوي
انا قلت لازم اعرف السر بجاذبيه البنت وش القبول ذا اللي الاغلب متفق عليه رحت اسال زوجي بطريقه مباشره وبدون لف ودوران يعني مدحتها وكذا وقلت ماشالله عندها قبول من اول مره شفتها قالي ماهو انتي بس اللي تقولين الشي ذا قلت دخلت قلبي ع طول هي كذا شخصيتها قال اختي ذي من يوم يومها قلبها فيه رحمه غير عنا وماتعرف ترد احد يبغي منها حاجه يقول من رحمتها حتى الحيوانات تعاملهم مثل الانسان هم عندهم دجاج ببيتهم يقول وقت البرد تحط بطانيات عشان مايحسون بالبرد واذ اجتمعنا باستراحه تطق سوالف مع الخدم وتعطيهم بطاقات شحن بالعيد يعني دايم اللي اضعف منها ترفعه اكثر شي لفت انتباهي بكلامه عنها انها راعيه صدقه وتخفي يقول زوجي انها توصيني بالسر بكرتون ماء وعصير بارد تقول اذ شفت عمال يشتغلون بالحر اعطيهم ولا تعلم
وربي مبارك لها بفلوسها زوجي يقول نتسلف منها ماشالله ومع هذا انا شفت لها موقف نغزوها البنات بكلام من باب المزح ردت بقوه عليهم بنفس الجلسه يعني مافيها ضعف مدري كيف جامعه قوه ورحمه وقلب حنون والله يابنات اني من عرفت السر قلت لازم اعلم بنات حواء عن سر الصدقه واثرها لاني اقسم بالله يابنات اول مره احب بنت من اول جلسه دايما اخذ وقت عشان اتقبل واعرف شخصيه اللي حولي الله يزيدها يارب ويجعلني مثلها واحسن لاني صراحه افتقد هالشي