ماعمرها تمت.. أحتاج ردودكم يا بنات جدًا 🫣💔

بنات بدخل بالموضوع على طول بدون مقدمات وباختصار..
أنا ماقد انخطبت ولا عمرها صارت خطبة رسمية حتى ولا مره أحد كلم أمي عني (أمي أحسها ماتكذب علي وتعلمني بكل شيء دايم) ولا قد قالت إني انخطبت

وصلت عمر ٢٥ وبديت أحس بنقص في نفسي حتى لما أشوف ترندات تيك توك بنات أصغر مني يذبون يقولون (شكلي وأنا أصرّف اللي يخطبون وأقول إني مخطوبة 😅) ذبة يعني بس يقولون كذا لأنهم ما يبون يتزوجون

أنا والله العظيم مابي أتزوج بالوقت الحالي لأني مشغوله بحياتي وعندي وظيفة الحمدلله وتو انقبلت ماجستير أبي أخلصه أول بعدين أفكر
لكن توني هذي أول سنة أتساااااائل عن نفسي !!!! مستغرررربه إني ماقد انخطبت، المشكلة لما اكون بأي مناسبة أشوف الناس يناظروني كأي بنت طبيعية يشوفونها ويعني بعضهم لما يجي يسلم يمدح لكن مايصير لا خطبة ولا شيء 😅😅

عندي سؤال محيرني هل اللي ينخطبون يكونون خارقات جمال؟ معقولة يكون جمالهم فاحش؟
أنا والله ما بمدح نفس لكن الحمدلله جسمي وشعري وملامحي زينه يعني أقصد مقبوله ومملوحه 😅 حتى أسلوبي كلن يمدحه وعلاقاتي كثير واجتماعيه بعد
صح لوني حنطي فاتح ومو باظا على قولتهم، قلت يمكن هذا السبب 🤣

الحين بتقولون لي متعلمة وتفكرين هالتفكير السقيم يا بنات إنتوا ما بتحسون بالشعور نفس ما أنا أكتب الحين، أقسم بالله إن هالشيء تقريبًا بدأ يدمر ثقتي بنفسي وصرت أطالع نفسي بالمراية وأقول أنا جميلة أو لا؟؟ رغم إنه ماينقصني شيء وأعوذ بالله من هالتعالي لكن وربي إني أقول الصدق

وش رأيكم بالله هل تفكيري غريب ولا أنا طبيعية وقاعده أشوف هالشيء يصير بكل البيوت إلا بيتنا وخصوصًا أنا !!

أحتاج ردكم جدًا :)