& ماعمري دخلته هالقسم هذا بصراحه بس ودي استشارتكم &

يا حاتي كلماتها معبره ما شاء الله عليها
بس انتبهي ما يجوز انك تفضلي اختها عليها مهما كان الفرق بينهم هي الان صغيره
بس تكبر راح تدور الحنان وين ما كان لا سمح الله ممكن تجد هذا الحنان والعاطفه عند صديقه وما تدرين عن اخلاقها
وما ودي اضرب لك امثله علشان ما اخوفك--المهم لازم تحتوين ابنتك واجلسي معها كثير وخليها تفضفض لك وانتي في
البدايه خليك مستمعه لين تكسبين ثقتها وبعدين حاولي بالنصح لان لو بديتي تنصحين من اول مره راح تنفر منك
ودايما استقبليها لما تجي من المدرسه وودعيها لما تروح وناقشيها وخذي رايها في كثير من الامور
وشجعيها على الكتابه ودايما قولي لها انا احس انه عندك موهبه فوريني وش تكتبين لاني احب اسلوبك
وابدي وجهيها والشي اللي فيه حب وعشق قولي انتبهي تخيلي لو ابوك قراه او معلمتك وش راح يفهمون
راح ياخذون عنك فكره مو زينه وهكذا
اعذريني ياقلبي طولت عليك والله يحفضها ويصلحها هي واخوانها يارب

جزاك الله خير ----- اللي مروا مرار الكرام لا رفع ولا دعاء لبنت

خليك معاها ونمي موهبنها وششجعيها
انا كنت مثلها بس للاسف مالقيت من ابوي الا انه شق دفتري

طيب اشجعها كيف اللي بيكتبوا كيف بدايتكم ايش الكتب المفيده لها

رجعتلك مره ثانيه
شوفي ابي اضربلك مثال
انا عندي بنت اختي اكتشفت انه عندها موهبه من يوم هي صغيره اشوفها تكتب كلمات مو بعمرها
وفعلا كل اكثر كتاباتها عن الفرااااق والحرمان -----ليش لان ابوها حرمها من بستها اللي هي مربيتها وكانت بالصف الثاني تقريبا
فلاحضت انها تكتب وترسم وتعبر عن معاناتها--ومن يومها قلت لها روعه رسوماتك وشعرك ابي اخذ منه نسخه ابيها ذكرى عندي
وتقوم تكتب وتقرالي اللي تكتبه وتعطيني نسخ منها وانا اشجع فيها
وهالحين هي متزوجه وعندها اطفال ولا زالت النسخ عندي ودايما اوريها ما تتخيلين كيف تفرح فيها
واصبحت كاتبه واسلوبها رووووووووووعه وشاعره والله لو اقولك بعض قصايدها في الولده روعه ورساااااااامه ما شاء الله عليها
اما الكتب والله ما ادري بس انصحك شوفي وشو ميولها هي تحب تكتب بالعامي او بالفصيح وروحي انتي ونقي لها شي حلو ومفيد مع انه بهالسن ما اعتقد انهم يهتمون بالكتب وخليها تقرا كتاب لا تحزن او مقتطفات من لانه ماراح تقدر تقراه كله
نمي مواهبها وبالذات لما يكون تحت اشرافك وتشجيعك
ناقشيها وخليها تقرالك كتاباتها وبطريقتها وقولي لي وش يصير معك وزي ما قلتلك في البدايه خليك مستمعه وبعدين قولي
انا لما اسمعلك لازم اقولك وش ملاحضاتي علشان انتي تصيرين مبدعه
الله يصلحها لك ويرزقك برها يارب