ماعندي غرفة غيرها أنام فيها وهي معذبتني بإزعاجها

إزعاج لايطاق وربي اكتب لكم والصداع براسي كنه مطرقه تدرون وش السبب ؟
مرت اخوي مطبخها فوق غرفتي وانوااااع الإزعاج منها (تسحيب طاوله وكراسي , تدحرج اسطوانة الغاز , تسحيب كراتين , ..... حتى الملعقة اذا طاحت منها اسمعها كل شي فوق راسي وربي خطواتها اسمعها كنها موسيقى الجاز دج دج دج ....)
كلمتها بالوضع .. كذا مره وللأسف يكون جوابها : طيب وش اسوي ؟ قلت لها : حطي ببالك تحت اوادم وبالهون كل شي ..حبه حبه .. انتي لو إستحضرتي ببالك هالشي دايركت ماراح يصدر ازعاج ماكأني أكلم الا الجدار
الوضع يرجع أردى وربي كأنها تعاند .. أما لو كان اللي تحتها اهلها ماراح تسوي هالازعاجات ..ماطلبت منها الا التخفيف تخفف شوي بس
حتى عيالي وربي يتروعون وهم نايمين ... ساعات يقولون : ماما هذا صوت رعد ؟ اقول : الرعد نستفيد يجي وراه مطر وخير .. لكن هالازعاج مايجي منه الا القولون والصداع
أمي لمحت لها بالموضوع .. قالت نحاول طيب .. يومين خففت ازعاج نوعا ما .. بعدها رجعت اردى من قبل
كلمت أخوي ماعنده سالفه ابد كعادته يضحك ضحكات مصطنعه ردة فعله سلبيه للغايه مايقدر يوقفها عند حدها
وربي لو عندي صاله اروح انام فيها بس مافي مكان اصرف حالي فيه !
ومستحيل يفرشون المطبخ من شان خاطري ابد ابد
هي قبل ماتسكن في بيت اخوي انا كنت ساكنه فيه أهلي ماتأذوا مني مثلها
سبحان الله يااخوات وربي مشيتها بقوه تهز الارض هز احس اني امشي بالهون بس هي خلاف بكل شي
تذكرت قول الله (ولاتمش في الارض مرحا انك لن تخرق الارض ولن تبلغ الجبال طولا)
لاتقولون انقلي من البيت ماباليد حيله مطلقه زي ماانتو عارفين ولو كنت متزوجه اسكن بديره بعيد عنها وعن ازعاجها
وانا عاطله بأي وقت اصحى جدولي مو منتظم ممكن اسهر الليل كله انام بعد الفجر وساعات يتغير حسب القولون والاكتئاب اللي اعانيه مااقدر امشي جدولي على كيفي وهي ازعاجها بأي وقت يجي على مزاجها مره الساعه 12 بالليل مره 4 الفجر مره الظهر ماتراعي تقول ممكن الناس نايمه الحين ابد ولاهمها
وربي كلمتها بأسلوب مزح ودعابه .. مره ارسلت لها ( تبيني اساعدك) من شان الطف لها الكلام وبنفس الوقت تفهمها وهي طايره برضوا مافي فايده.. كذا مره اصحى من نومي مصدددددعه بنص الليل
لما كانت تقابلني كانت تقولي : هاه ازعجناك ؟ مدري وش ارد عليها استحيت من كثر مااكلمها صرت ارد بإبتسامه من شان ماتزيد لاني لاحظت كل ماكلمتها تزييييد
هالحين لها شهرين ماشفتها ولاشافتني وانا كذا مرتاحه ولاتتصل علي ولاترسل .. بس هالازعاج مو عارفه كيف اخلص نفسي منه
حسيت ماقدامي الا اني ادعي ان ربي يرد كيدها بنحرها ولايوليها على ضعيف الله يسلط عليها اللي اقوى منها
ساعات من شدة ازعاجها اتوجه للقبله واقول : ياحي ياقيوم ارزقها بـ طبينه ترد لها ازعاجها اضعاف مضاعفه ولاتخليها تذوق النوم لاليل ولانهار يامن هو اعلم بحالي إن كانت متعمدة ازعاجي فسلط عليها من هو اقوى منها ...)
لو كنت مكانها احاول اخفف نسبه الازعاج او ع الاقل مابشتغل بالليل واوقات الفجريه على أوقات نوم الناس المعتاده
حسيت باللي يسكنون بالادوار الارضيه يعاااانون بالحيل بالذات اذا كان البيت شعبي الصوت يصل بسرعه
وهذه رساله اقدمها لكل من تسكن بدور ثاني اوثالث الرفق الرفق .. مااجمل الهون والهدوء وعدم ازعاج الاخرين
بنات تكفون ماابي منكم الا الدعاء ان ربي يريحني من هالحياة عاجلاً غير آجل