ماكتبت لكم الا بعد مادخلني الاحباط والياس احتاج مشورتكم

صباح الخير اخواتي

انا من المتابعين للمنتدى من زمااااااااان وخااصة هالقسم وابي انزل مشكلتي من زمان بس ماكان

يقبل مني التسجيل والله لي اشهر وانا احاول المهم ماعلينا السالفة يا اخوات اني تعبت من حالتي

انا علي مشارف الثلاثين زين من يوم تخرجت ونا ادور علي وظيفة للان ماخليت مكان ما رحته

وحطيت اوراقي فيه اقدم انا وخوياتي سوا يقبلون خويتي ونا لا مع اننا نفس التقدير ونفس الشهادات

صابني ياس والله اكثر من ست سنوات ونا ادوور علي وظيفة ولا تحصلت علي شي .. يمكن تقولون

كثير بنات مثلك ماهم محصلين وجالسين بالبيوت .. انا عن نفسي كل خواني وخواتي مزوجين من زمان

يعني انا لحالي بالبيت تصيبني ضيقة مدري وش اسوي ووين اروح خاصة ان ولا احد من اخواني او

اخواتي يوقف بجنبي او يواسيني كلن مشغول ببيته وعياله وانا تعدي شههور قسم بالله مااخرج من

البيت محدن جاب خبري وازيدكم من الشعر بيت مافي ابن حلال تقدم لي مع العلم اني كبيرة وواعية

وما ينقصني شي ،استفدت كثير من قرائتي لبعض وصرت اقوم الليل واقرا سورة البقرة وسورة يس

واستغفر من اشهر

الحين يعني اغسل يدي من الوظيفة والزواج طيب وش اسوي ونا باقيلي اشهر قليلة وادخل الثلاثين

حتي عند القرايب بطلت اروح من نظرات الناس والذب بالكلام ، واشيل هم اذا بيجونا ضيوف الود ودي

ما اقابلهم نفسيتي صايرة مو شي ابد اطالع الناس اللي ما توظفت مشغولة ببيتها وعيالها و هاذي

للعلم تكون اصغر مني باربع او خمس سنوات واللي ما تزوجت جتها الوظيفة يعني حصلت شي يشغلها

انا لا ذا ولا ذااا بتقولون رززق ونا والله اؤمن بمسالة الارزاق والنصيب وانه ما يصير لنا غير اللي

كاتبه ربي ،،، بس والله تعبت وملني الصبر مو شهر ولا شهرين سنوات مدري وش اسوي بعيشتي

تكفوون ياخواات اللي عندها رأي او وجهة نظر تصبرني لا تبخل علي فيها مالي غيركم يفهم وضعي

ويقدره الله يجزاكم خير