.....لولو..... @lolo_20

عضوة

مالي بالدنيا احد غيركم ساعدوني

بسم الله الرحمن الرحيم

السلام عليكم ورحمة الله وبركاته

كيفكم بنات ان شاء الله كلكم بخير وعلى احسن مايكون

مع اني ماعتقد اكيد كل وحده فيها هموم وش كثرها :(

اتمنى تساعدوني تكفون وتكتبون ارائكم بالموضوع واللي تبي تتهزا لا ترد

بنات انا لي متزوجه سنه ونص عمري 20 سنه

ماعندي ام ولا عندي خوات الا من ابوي وحده مالي علاقه فيها

والثانيه كبري يعني توها ماعندها خبره بالحياة

بنات انا توني متهاوشه مع زوجي :(

وبدون سبب تقريبا

انا مادري وش فيني عليه ماني طايقته ومو اول مره وانا كذا

دايما تجيني فتره تقريبا كل شهر هالحاله

واللحين مو موعد الدوره على شان تخرب النفسيه

انا احبه وهو انسان حبوب ومافيه عيب عيوبه مو مضايقتني

بس كذا ماودي اشوفه ولا ودي اقعد معاه ولا اكلمه

مابي اسولف معاه ولا شي اذا شفته انكتم مابي اكلمه

وهو دق علي ومارديت اصلا انا مادري مين دق وكنت متضايقه ولا رحت اشوف مين قلت بعدين اشوف مين وادق عليه

وكنت متوقعته هو

ولا رديت عليه وجا وقالي ليه ماتردين قلت بس

وبعدين قعد شوي ولما جا يطلع قال اذا دقيت ردي وسكت

وقال ليه ماتردين قلت طيب

وقام يتكلم قلت طيب انت وش كنت تبي لما دقيت قال بطمن عليك

وقام يهاوش ويتهزا فيني ويعصب علي وبعدين قالي طسي

وانا اصلا ساااااااكته ولا كلمه ولا كاني اسمع احد يتكلم

وتقريبا تتكرر هالحاله كل شهر

مرات اقول ماقدر اتحمله وتجيني افكار ووساوس:(

بس مابي اقول شي اذا جت منه بس انا مابي اقول شي

وهذي من بداية زواجنا وانا ماني قادره اضغط على نفسي

احس اذا طلع انبسط ماقوله ارجع بدري او شي مايهمني

بالعكس انبسط لما يطلع واستانس واذا قرب يجي يضيق صدري

مدري ليه انا كذا بنات انتو زيي والا انا وش فيني

الله يخليكم كل وحده تكتب نصيحتها لي وايش تتوقع اللي فيني

لاني مررره ماني قادره اتعايش مع زوجي وماني قادره ابلعه

مع اني احبه واموت فيه وهو مافيه شي وعاجبني

بس مدري ليه انا كذا :( ماحب اسولف معاه ولا احب اقعد معاه

بس فتره من كل شهر والايام الثانيه اكون عادي..

الله يهديني :( ويفرج همي

يلزم عليك تسجيل الدخول أولًا لكتابة تعليق.

تسجيل دخول

.....لولو..... • 15 سنة

للرفع :(

بنات انتو مثلي اذا طبختوا ماتقدرون تاكلون انا من تزوجت نحفت 12 كيلو بشهر تقريبا كل ماطبخت ماتعجبني الطبخه ولا اقدر اكل

وزوجي الحمدلله سمن وكل ماطبخت يعجبه مايقول شي مدري يجامل والا جد بس انا مايعجبني الاكل ولا اقدر اكل بس اكل لقمتين اسد جوعي وحتى لو جبنا من برى صرت نفس الحاله ماكل انسدت نفسيتي على الاكل .. بنات اذا فيه احد زيي يقولي :(

اماني حلوه • 15 سنة

حالتك صعبه يمكن من هرمونات الدوره الشهريه تراها مب سهله واذا مو منها روحي لشيخ يقرا عليك

.....لولو..... • 15 سنة

الله يعطيكم الف عافيه على مشاركاتكم

انا ودي اروح لشيخ يقرا علي بحاول وان شاء الله اتغير للأحسن واختي سحر الحلا الله يفرج همنا يارب :(

кą®ёzмa • 15 سنة

لا حول ولاقوة إلا بالله ......

الله يفرج همك ويشفيك مما فيك ......

حبيبتي .... نصيحه (( لوجه الله )) ..... الرقيه الشرعيه ثم الرقيه الشرعيه ثم الرقيه الشرعيه ..... << ترا إذا أهملتي نفسك تتأزم حالتك الله لا يقدِر ....

ثانياً : أذكار الصباح والمساء ضروري جداً ... من كتاب حصن المسلم أبو ريال << بس قبل تقرين إنوي بقلبك قولي اللهم إني نويت أن أقرأ الأذكار علي وعلى زوجي

ثالثاً : اقري سورة البقره في بيتكم .... أو شغليها مدة 40 يوم أو كل يوم إلى الأبد ....<< أخذها بركه وتركها حسره

عيوني أحس اللي فيك مو طبيعي بس ماودي أتفاول عليك ...... مابك إلا كل خير وكل عافيه

شوفي ياقلبي ..... لا تقولين مالي خلق وإلا بعدين أبدأ ....... (( انتبهي ))

هذا إذا كنتي تبين تكونين طبيعيه ...... وتحافظين على زوجك وحياتك الزوجيه

** فيه طريقه حلللللوه سبحان الله أبسط شي من فوايده إنه تجيب إنشراح الصدر هذا غير الأشياء اللي لا تعد ولا تحصى **

استغفري ..... سوي هالطريقه والله خفيفه

((( أصابع يدك عشر كل اصبع فيه 3 أنملات أو أجزاء بكل أنمله أو جزء استغفري 5 مرات ..... إذا خلصتي من جميع أجزاء أصابعك العشر مره وحده تكونين استغفرتي بهالمره الوحده 150 مره ....... كرري هالطريقه 7 مرات تصيرين استغفرتي أكثر من 1000 مره باليوم .... يعني الصبح استغفري 150 مره الظهر 150 مره المغرب العشاء ..... جزئي هالطريقه قدر المستطاع ..... وراح تدمنين هالطريقه ...... ))) ... الله يسهل عليك

>> إذا بغيتي طريقة الرقيه الشرعيه خبريني وأعطيك رابط له <<

.....لولو..... • 15 سنة

صادقه اختي تعيش بصمت المفروض اشغل البقره يوميا مشكوره على مشاركتك الله يجزاك خير يارب