مالي بعد ربي الا انتم ...اتمنى منكم تعطوني من وقتكم

السلام عليكم ورحمة الله وبركاته...............


ترددت كثير قبل ما اكتب مشكلتي ماعرفت اذا احد بيرد علي ويعطيني حل او اذا فيه احد مثل مشكلتي...


على العموم انا بقول واتمنى منكم المساعده لاني بحاجه لكم بعد الله....



انا متزوجه من ست سنوات وعندي طفلين ساكنه في الرياض وحياتي عاديه مثل كل الناس مشاكل عاديه بين كل


زوجين وطول حياتي عايشتها اما لحالي مع اطفالي او مع اهلي اروح واجي معهم زوجي موجود ومو موجود بس عادي


بديت اتعود صحيح في البدايه كان صعب علي هالوضع زوجي اما بشغله او مسافر بس الشكوى لله حاولت اتاقلم و


اعود نفسي اني اعيش لحالي...


مهب هذي المشكله ..المشكله هي ان زوجي قرر قبل كم شهر ينتقل القصيم يعيش هناك....


هنا بدت المشاكل وضيقة الصدر وشلون اروح اعيش هناك وانا لا اهل لي ابدا ولا صديقات ولا قريبات والامر والاصعب


ما فيه زوج ولا حتى وظيفه يعني ما عندي ولا شي هناك ...حتى هناك ما فيه طلعات واسواق مثل الرياض...


كل وقتي ابعيش وحيده بين اربع جدران ....والله ابموت من القهر ...ليته يبي ينقل لسبب مثلا ان اهله بحاجته او هو


وحيدهم او بسبب شغله شي غصب عنه او لاي سبب مقنع...بس كذا مزاج..مل من زحمة الرياض وبعض اخوياه


نقلوا هناك فاعجبته الفكره...والي قاهرني انه ما قالي قبل الزواج ولا حتى لمح لكذا انه بيعيش برا الرياض...


واذا قلت له ما ابي اعيش هناك يقول لي الحرمه مالها راي الحرمه تتبع رجله....


والله ظلم اناني بس فكر بنفسه ووناسته وانا بالطقاق يعني هو هناك عنده اهله واصدقاءه وشغله عنده كل شي


على كل حال هو نقل وانا فيني فيني الروحه هناك صعبه اقعد عند اهلي مصيري اروح ...


يا ليت اذا فيه احد مر بمثل وضعي وتجربتي يفيدني ويساعدني ويقول لي وش اسوي ...


شكرا لكم لانكم عطيتوني من وقتكم.