مانمت لمدة سنة بسبب بنتي ساعدوني بالله تعبت

عندي مشكلة الحمدلله مانمت منها سنة كاملة كل يوم أبكي قبل انام ونفسيتي تعبانة لااروح ولا أخرج وقلت مالي غير الحوائيات ساعدوني الله يفرجها عليكم..
انا بنتي بكريتي من يوم وعمرها سنة ونص وهي عندها ايباد كانت طول وقتها عليه يعني من يوم تصحى لين تنام وهي على مقاطع الاجانب بالانجليزي وتكلمت بدري ماشاء الله وكانت تكلمني بالانجليزي يعني مثلا تقول(مام اي ونت ووتر) وتسمي الجزمة(شوز) وتعرف الحيوانات بالانحليزي وكل محد شافها قلت بنتي تتكلم انحليزي فرحانة ويوم وصل عمرها ٤ ونص لاحظت ان بنتي غير على الايباد ومانتكلم معاها فورا منعت عنها الآيباد (((والطامة)))لاحظت ان كلامها غير مفهوم وماتربط بين الكلام بحروف الجر وجلست اتكلم معاها ٨ شهور واللهم لك الحمد اصبحت تتكلم عايدي وتربط بين الكلام بحروف الجر وهي الآن بالروضة تعرف جميع الحروف الهجائية ماشاء الله +وتقدر تقرأ اي كلمة من ٣ حروف بالفتحات+ وتعرف الاعداد الى ١٠ كتابة وقراءة +وحافظة السور القصيرة إلى العاديات يعني تاخذ في السورة اسبوع على ماتحفظها في الروضة + وتعرف الشكل المختلف لو اختبرتها ..الحمدلله حمدا كثيرا (((((ذهب نص الهم بقي النص الآخر الذي لايجعلني أنام وجعلني اشك فيها))))) وهو١- تبديلها لحروف بعض الكلمات في بعض الأحيان مثل صعبة تقول صبعة وجزمة تقول جمزة وهكذا.٢-ليس لديها تركيز في ذكر اسماء الاشياء مثل تسمي المخدة بطانية ولكن عندما اطلب منها المخدة تحضرها لي،وتسمي الكريم شامبو في بعض الاحيان وتسمي أحيانا حزام البنطال حبل وهكذا (يعني باختصار الأشياء المتشابهة تلخبط في اسمها ولا تركز أو تنساها )
ارجوكم رجاء اللي عندها اطفال او تحتك بأطفال تقولي هل هذا طبيعي ام لا