ماني عارفه هل انا قاعده على راسهم ولا في بيت اهلي

مساء الخير الله يجعلكم بخير وعافيه وسعاده يارب العالمين : احتاج منكم دعوات من داخل قلوبكم
انا اتعرض شبه يومياً لأسئله محرجه جداً ونفس السؤال يتكرر على من سنتين تقريباً وتبون الصدق مليت وتعب قلبي والله الأسئله هي ( ليش ماتزوجتي عمرك كبير )
(اللي كبرك عيالهم بالمدارس) خلاص الله يخلف عليك فاتك القطار محد راح يجيك الا شيبان اعمارهم 80 💔
عمري 31 اقسم بجلال الله اني كل ماحضرت مناسبه او عزيمه اسمع هذا الكلام من الحريم الأربعينيات و الخمسينيات و الستينيات حتى اللي نفس عمري تكرار الأسئله و الأنتقاد سببت لي ازمه نفسيه والله : للحين ما جاء نصيبي ومحد تقدم لي في وحده توي قبل 4 ايام قابلتها بعزيمه كبيره: وسألتني ليش ماتزوجتي قلت لها نصيب بيد رب العالمين نطلع عند ربي يعني وش فيك انتي: سكتت قابلتها في ملكه بنت عمي مره ثانيه 🤮 والله العظيم يا اخواتي انه نفس السؤال سألتني ليش ماتزوجتي 🥺 تضايقت منهم خلاص تعبت وانا كل مره ارد عليهم نصيب نصيب نصيب نصيب العزيمه اللي رحتها ثلاث ارباعهم سألوني ليش ماتزوجتي ويوم ملكه بنت عمي نفس الشي انتي للحين محد خطبك انتي للحين ماتزوجتي اقسم بالله العظيم اني تحسبت عليهم من كل قلبي ويارب انتقم لي ناويه ارفع فيهم قضيه سمعت ان كل احد يسأل الثاني هذي الأسئله عادي ينرفع فيه قضيه وش رايكم انتم ترو صدق اقسم بالله ما ابالغ الكل يسألني ليش ماتزوجتي ويعيدون الكلام مليون مره حتى امي صارت تتضايق من اسئلتهم اللي كل شوي معقوله ماعندهم سالفه ثانيه او اسئله ثانيه غير زواجي وتأخر زواجي وش هذا التقديس للزواج لدرجه انهم يعبدون الزواج عباده ليش اذا وحده تأخر نصيبها ضايقوها واعتبروها شي غريب ليش التخلف هذا : المواقف اللي تصير لي خلاص معد اقدر اتحملها نفذ صبري هذي ثاني سنه اسمع هذي الأسئله طيب واذا تأخر نصيبي اكثر من كذا وش بيسوون ياكلوني بقشوري 🤕 الحمدلله انا حافظه القرأن كامل وملتزمه وموظفه وراتبي حلو الحمدلله ان جاء نصيب الحمدلله وان ماجاء نصيب الحمدلله كل شي من الله جميل