السلام عليكم ورحمة الله وبركاته
اسمحولي فالبدايه....
اعلمكم عن بيتي...انا يا اخوات شطبت بيتي
علي مزاجي...كل شي حطيته فيه كنت مقتنعه
فيه ميه فالميه ولله الحمد....
خذيت وقتي وفريت كل المحلات....
اي جزء فيه لو صغير اعرف من وين انجاب
وكيف....
النتيجه كانت مرضيه ولله الحمد...
(الكمال لله وحده)....
ولكن بالنسبه لمساحته كان شي مبهر...
مافي احد انتقده ولا طلع فيه اي عذروب
وكان الكل يقول وش تنتظرون اسكنوا انا لو منكم
انزل علي طول لو احط فرشه واقعد عليها....
المهم ربي يسرلنا ولله الحمد....
ونزلنا بيتنا وكنا فرحانين....
بس وشصار....
كنا نحس اننا مخنوقين وضايقه صدورنا....
والله من شدة الضيقه كان يذكري فالقبر
وودنا نهرب منه....
رغم انه شرح...واي احد يسير علينا
ينبسط ويقول الله يباركلكم فيه بيت مريح
كنا اذا رحنا لاهله او اهلي ياسلام نرتاح
وما ودنا نرجع لبيتنا...نحس بدفا والفه للبيوتهم
رغم انه ما يتقارن ببيتنا اللي تعبنا فيه
حنا الاثنين....
طبعا كنا عارفين السبب انه منزل جديد
ما تعودنا عليه...لاحظوا انا ورجلي متعودين
علي بعض...بس الغريب الجدران والمكان...
وشوي شوي...تعودنا عليه وحبيناه
وصرنا مانرتاح الا فيه....
واذا بعدنا عنه احلي نومه نرتاح فيها تكون
الليله اللي نرجع فيها له....
حتي بناتي اذا سافرنا يقولون اشتقنا لبيتنا....
فالسنوات الاولي...
للزواج يحصل نفس الشي مكان وانسان
وعايله...وكل شي جديد عليك
حتي لوحبيتيه يبقي فيه شوي تشنج فالحياة
دايما اذا رحتي لاهلك تحسين روحك والحياة
ترجعلك ودك ترجعين تعيشين معاهم
طبعا عند الاهل تاخذين حريتك وتتصرفين علي
طبيعتك....
فاي زله تحصل من الزوج او من المحيطين
فيه تتضخم فالنفس لانها توافق رغبه داخليه
وان كنتي بعقلك تقولين لازم اعيش هذا بيتي
بس يبقي صراع داخلي....
مافي داعي للشرح الكثير لانها امور معروفه
اللي تواجه الازواج....
المفروض يا اخوات اننا نعطي انفسنا فرصه
نتعود علي بعض بشئ من الصبر واللجوء لله....
لانه سبحانه نعم المعين....
مافي داعي للحسابات بحياتنا بمعني اني اعد كم خطأ تحملته
وغفرته له.....
العشره ياحبايبي تقرب الزوجين وتمزجهم مع بعض
الحياة تصير اجمل واسهل....
يتولد الاستقرار والخصوصيه مع العشره....
في وحده تسولف علي تقول تصدقين
اني كنت احس لمسات رجلي لي كانها حيه تلسعني
تحلف بالله ان هذا كان احساسها....
اذا سمعت صوت الباب يجيها اكتئاب
انه رجع....
وتقول كنت اضغط علي نفسي....
واقول ربي ما رزقني اياه الا لانه الاصلح لي
واذا شافت ما تكره منه ما تترك عقلها يكبره
تقول انها كانت تواجه نفسها وتكلمها بحزم
كانها تكلم شخص ثاني....تقول خطاه عادي
بس انتي تضخمينه لانك ما تبينه
مشتاقه لاهلك صح....او ما تبين المسؤوليه او او
وبعد العشره تحلف ايمان مغلظه انها ما تبدل فيه
افضل رجال الدنيا....وانها ما ترتاح الا اذا كانت معه
انا يا حبايبي ما اقول اقبليه علي علاته
وموتي ولا تتطلقين انا اقول حاولي واعطي
نفسك فرصه..وفكري بعقلك
اذا تطلقتي....
ياتري بيجيك غيره....
وان جاك ياتري بيكون احسن منه
فالزواج الثاني دايما الوحده تتحمل اكثر
وتحاول اكثر تصبر وتصلح من زوجها
عشان ما تحمل لقب مطلقه مرتين
(انا ما اقول بخواتي المطلقات اي شي معيب)
وقد تكون انحطت بهالوضع غصبن عليها
او ظلمت بزوج حقير...
لكن كم موضوع كتبت صاحبته انا صابره
ومستحمله عشان ما اتطلق لانه بيكون طلاقي الثاني
حتي الرجل اذا رحتي تخطبين له وهو مطلق مرتين
كثير اللي يترددون بتزويجه.... ولو كان احسن الرجال
يا اخوات هذي حياتنا ومستقبلنا اذا ما تعبنا عشان
نصلحها ونبنيها ما حد بيتعبلنا....
ادعوا الكريم المنان ان يصلح حياتي وحياتكم
ويقدرنا ان نعمر بيوت مستقره وبنزل سكينته علينا
تم بحمد الله....
انا معك بكل كلمة الله يجزاك خير ويجعلها بميزان حسناتك
الزواج تعايش
والمرة مو كل يوم لها رجال