ماني مصدقه-- من جد ماينعطو وجه ابدا ابدا--عيالنا والانترنت

السلام عليكم
اخواتي بنات عالم حواء
اتمنى من كل اخت عندها ابناء في مرحلة المراهقه سواء بنات او اولاد تشاركني موضوعي هذا وتخبرني كيف اتصرف
اولا انا بناتي ثنتين وحده عمرها 11 ووحده 12 بينهم سنه وحده بس
كنت اتصور انهم لسى اطفال بس حذره معاهم جدا لأن وانا في سنهم كنت هبله مااعرف شي بس في نفس الوقت كان عندي صاحبات في المدرسه يعرفو كل شي لدرجة انهم يتكلمو في اشياء مره عميقه ووقحه وقذره
انا بناتي في مدرسه خاصه واغلب البنات معاهم جميعهم مثقفات وبنات عائلات محترمه واهاليهم دكاتره ومهندسين وبعضهم لا والله انهم علشان اجانب بس دفعو فلوس ودخلو بناتهم مدارس خاصه
بناتي لهم سنه تقريبا من ساعة مابدأو يفكرو في اللاب توب لأن يشوفو اغلب الناس حتى الصغار عندهم لاب توب
وعمري ماتصورت اجبلهم لاب توب ولكن الكمبيوتر ضروري عشان دراستهم ويعملو دروس كثيره عليه ويطلبو منهم عمل دروس كثيره عليه
انا ماكان عندي مانع لكن بدون نت
ومن خوفي وحذري ماجبت خط هاتف في شقتي تصورو؟؟ والله اني اشتغل على مودم موبايلي الكونكت الصغير
قبل سته شهور تقريبا رحنا نبات عند اهلي وشافو اختي قاعده على النت واختي في الجامعه -- قعدو معاها وجلسو يضحكو ويكتبو اشياء في قوقل تافهه واشياء مضحكه وكانو ينبهرو بانه كل ماكتبو شي يطلع لهم -- عجبتهم الشغله ومن هنا بدأ تعلقهم بالنت ورغبتهم فيه -- جلسو يزنو عليه وسبحان الله اراد الله وخرب الكمبيوتر المكتبي واضطريت اجيب لاب توب مخفض من جرير اقل سعر عشان يدرسو عليه وبرضو من غير نت
وفي يوم وبعد فتره من شراءه طلبو النت مني-- قلت لهم مااعطيكم لأنه غير مهم بالنسبه لكم ولا فيه شي يفيدكم الآن وبعدين يخلص الاتصال بسرعه في الكونكت واذا بعطيكم بجلس معاكم عليه --- قالو طيب
صرت اعطيهم واجلس معاهم واخذه منهم بعد ساعه او نص ساعه وهم يبكو يقولو ماشبعنا منه
قلت لهم انتو كل شي تكتبوه تافه ماتستفيدو من النت في العاب ذكاء او تصفح مواقع مفيده -- تضيعو الوقت في كتابة وحفظ صور بايخه لمايلي واشلي وهانا مونتانا وهاي سكول ومهند ونور وآدي وسبونج بوب ومعرف مين -- وهذولا كلهم يجو في التلفزيون


وسبحان الله

يومين ثلاث بعد هذا الكلام صار كل همهم النت ويقولو ليه لازم تقعدي معانا عادي كل الناس عندهم نت زميلاتنا كل وحده عندها ايميل ونت مفتوح ودي اس ال وانتي مودم صغير من موبايلي ومسويتلنا مشكله
قلت اعطيهم ثقه شويه واتركهم بمفردهم كل مره ساعه يشتغلو عليه
قالو لا--- كل وحده تجلس عليه ساعه لوحدها وبعدين تاخذيه-- يعني كل وحده منهم ساعه
قلت طيب
وبعد ماتخلص ساعة كل وحده اجي اخذه والاقيها تعطيني بالقوه من غير نفس واحيانا ببكاء ومضاربه وتوتر وانفعال
انا اعرف انه بداية كل انسان مع النت تكون ادمان وبعدين الوضع يقل --- لكن والله اعرف كمان ان الادمان ممكن يطول لفتره طويله
لكن مااتصور ابدا ابدا انه بمجرد مااتركهم شويه لوحدهم يفتحو مواقع وسخه ولا اتصور انه في هذي السن يتجرأو على كتابة كلام زي هذا في قوقل واليو تيوب --- واتفاجئت كمان ان بناتي عندهم مصطلحات ماكنت ادري انها عندهم ويعرفوها -- من جد احنا اللي مساكين وهبل مو هم -- وانه فعلا ماينعطو ثقه ابدا -- هم مايعرفو ابدا اني افتح اللاب توب من وراهم واعرف عن طريق المحفوظات اطلع كل البلاوي اللي فتحوها --- هم صحيح يتظاهرو بالبراءه عن طريق حفظ الصور البناتيه والقطط والاشياء التافهه حقة البنات --- لكن انا افتح المحفوظات والملفات اللي تم فتحها في النت -- والله ثم والله اتفاجئت وكرهتهم وكرهت نفسي--- مش معقول ساعه اتركهم على النت وبعد ثقتي فيهم يفتحو هذي الاشياء --- المشكله انا مااتصور ان بناتي شافو هذي الاشياء ابدا -- طبعا اول انطباع اخذته بعد ماشفت هذي الاشياء راح اخذ اللاب توب واحذ كل شي فيه واعيد تنظيفه من كل شي--- ماعاد فيه شي اسمه نت ابدا لو يموتو من الزن --- ثالثا حقعدهم جنب بعض واقولهم اني شفت كل شي وانهم من بداية استخدامهم للنت اسائو التصرف واساو استخدامه وهذا حيحرمهم من النت حتى يكبرو ويعتمدو على انفسهم او حتى ينقلعو ويتزوجو ويروحو بيوتهم ويصيرو مسؤولين عن انفسهم بعيد عني --- واني اعرف ايش يفتحو وماحخبرهم كيف اعرف عشان مايعرفو ياخذو احتياطاتهم مهما صار --- وحقولهم اني ماعاد اثق فيهم ابدا وهذا الشي حرمهم من النت نهائيا --- عارفه انهم ماحيصدقو وحيحرجو جدا لأن هم مو متوقعين اني اراقبهم من وراهم واني اعرف شي
وعلى فكره والدهم متوفي وعشان كذا احس بضغط شديد في تربيتهم واستقامتهم مع انهم مايشوفو غير صاحبات المدرسه واغلب الوقت عندي ومانخرج كثير
انا طبعا عارفه انه بناتي مو صغار بس برضو ماتخيلت انهم لهذي الدرجه كبار -- والله احس انه البنات المفروض نزوجهم اسرع من بنات زمان بسبب الانفتاح اللي هم فيه ومع ذلك تقعدي خايفه انه بنتك ماتعرف تكون مسؤووله عن بيت واطفال
بناتي لسى مابلغو ولكنهم على مشارف البلوغ وطبعا عندهم خلفيه عن البلوغ والدوره الشهريه
لكن الآن تأكدت انه عندهم خلفيه عن اشياء كثير غير الدوره والبلوغ والله اعلم من مين
مع اننا زي الصاحبات في البيت بس برضو مش معقول نتكلم بمصطلحات زي اللي شفتهم يكتبوها في النت وفي قوقل --- انا ابغى اسألكم مين صار معاها كذا واكتشفت ان ولدها او بنتها يدور على هذي الامور وهو لسى صغير --- وكيف اتصرفت معاه -- وهل اللي راح اسويه صحيح
وعلى فكره-- اغلبكم ممكن يقول اقعدي مع بناتك وكلميهم بحنان ولطف ومعرف ايه--- وربي لو وحده مكاني وانا في هذي الحاله انه نفسها تحرمهم وتعاقبهم بكل اللي تقدر عليه علشان يتوبو ويتأدبو ويحترمو انفسهم ويعرفو اننا مو مغفلين ولا هبل وانه هذا عيب وحرام وقلة ادب وتوصل الانسان لمشاكل كثيره
ايش هذا ؟؟ اذا في سن11 سنه وتفتح صور زي هذي اجل لو عشرين سنه ايش تسوي ؟؟ وتلومو بعض الحريم ليه يزوجو بناتهم بدري؟؟ من اللي نشوفه من تصرفاتهم
المشكله اننا من عائله محافظه وكل اللي حوالينا محافظين ومؤدبين ومع ذلك نتناقش بشكل مستمر في كل مجالات الحياه ويعتبروني زي صاحبتهم طول الوقت-- والآن عرفت اني صاحبتهم بس في الامور السطحيه -- اما الامور العميقه يتعلموها من صاحباتهم مع انه حتى صاحباتهم صغار في السن واللي يشوفهم مايقول يعرفو شي لكن ياما تحت السواهي دواهي
انتبهو لعيالكم والله ماعاد فيه احد صغير الحين
حسبي الله ونعم الوكيل اكلمكم وانا متوتره جدا :angry::angry::angry: