مساكم \ صبحكم الله بالخير والرضاء والسعادة ،،
اليوم قمت أفكر بأشيائات كثيرة
قلت وش بلا ما اكتب الموضوع أللذي هو قاهرني وبااط(ن) تسبيدتي ؟
ونناقشه سوا وكل نفر يكتب وجهة نظرة أو موقفة ونشوف هو الغلط منا ولا من الناس اللي عقولهم نص سانتي ، أساسا حسافه نقول إن عندهم عقل
< ترى ابد ما خلصت من هذا الكلام قبل شهرين ومخليتهن ذكريات بجهازي بس زيين صمللت اليووم وسدحتوا عندكم
فا بقولك يا قارئي الحبيب ،،
لا تنقد علي واجد ! لأن هذي أول محاولة لي بالكتابة
المقصود ان كل ذا الكلام قصص صايرتن لي ومهنا مضمون قوة .. بس أشياء رفعت ضغطي وقلت غيري موب أحسن مني بكتب زيهم !
ممكن ابدي بسؤال شااطح يسدح نفسوه؟
إلى متى وتفكير الناس متخلف ؟ <= بداية بعنف
وإلى متى بيصير سطحي كذا ؟ <= عنف مرة ثانية
ومتى باللهي بيرتقوون ؟
فيه أشياء حسيتها منتشرة بكثرة .. ومفهوم الناس عنها غلط
ببدى بأول شئ وهو أشهر شئ تقريبا اللي هي
" الميانة "
وشسمه تدرون وش آخر ما توصلوا له من مفهوم الميانة ..!
إن إلي يمون عليك يلعن جدك الخامس وأنت تضحك والوضع عندك عادي !
كذا أنت كووول بنظرهم ؟
ما صار فيه شئ أسمة احترام !لا لصغير ولا لكبير
عندهم إني أمون عليك لو اجدع عليك كلام من هنا إللى الهند لاتزعل ابد بحجة هالموانة اللي مدري وش تبي ..
اذكر قريب وحدة زودتها من هالكلام الزين مرررة .. قلت لها يا بنت الحلال ورى كلامتس صاير(ن) وع تسذا ؟
قالت عادي ياوخيتي أمون ! <
قلت لا يا بعدي إذا ذي ميانتس لا تمونين معليش ؟
مدري وش فايدة إلي يمون وما بيني وبينه أي احترام ؟
انتفخت أم الشباب علي ،،
قلت لة طيب عادي أنا مثلا أقولك كذا عشاني أمون خخخ
يعني صارت اغلب الميانة مرتبطة بذاك الأسلوب الاستفزازي للافس الشديد
وإذا صرتوا تمونون و كلامكم زين ،، يقولون مسوين فيها أخلاق ؟ ،، لا يا شييخ ! عسى مااشر ؟! يعني عشان أمون لازم أصير ذبيبة مثلا؟
وحدث ولا حرج عن مفهوم الميانة
سمعت وحدة تقول إني باخذ من خويتي وصف لطريق ،، وإنا مالي بالتوصيف ! عطيتها اخوي اللي كبري توصف له "
لا يا عمتي قسمن با لله انتس شاطرة ؟ حطي على جبهتس نجمة بس
خير خيير اخوتس محرم لها يصير لها تصير له يا لحبيبة ؟
وتقولي عادي خويتي تمون علي ،!
شرايكم باللهي
تمون عليتس هاه ،، من جد شئ ينررررررفز
المرة الثانيه خليها توصف لأبو جيرانكم مرة وحدة !
مدري حرام هي توصف لآخوها مثلا من وصف خويتها ،!
يعني لآ تستغربون بكرى تتمشى معة بالسوق ، وتقول لكم عادي هو اخو خويتي وش خصكم !
تلاحظوون دخلت بالبنت
يالله أن تحفظنا بص،،
أدري بتقولون عادي خلتس فري وراتس جدية كذا ؟
خلي اللي يعرفونك يمونون عليك حلالهم؟
بقولكم ما اختلفنا بس ترىآ ماتوا من زمااان إلي يمونون عليكم بعد مدة طويلة من معرفتكم فيهم
الحين الواحد صار يستظرف نفسه وآنت أول مرة تكلمه ..
تحس تعابير وجهك تقوله وش تحس فيه يا الحبيب
وهو مسوي يعني تراني أنا طيوب و اجتماعي وادخل مع الناس بسرعة ويعني آنا دمي خفيف واجدع عليك كلام عشان تضحك ..
يآربية اجل أنت نكوتي وتمون ! أهنيك صراحتن على ذا التخلف
إلى على طاري نكوتي
ترى قسمن من أكثر الأشياء اللي رافعتن ضغطي بهذا الوقت خفة الدم واستظراف الطينة اللي مالها دااعي أحس لآآآآآ تعليق من جد
نجي لخفة الدم واستخفاف الطينة ،،
بس سؤال قبل لا اخووش بعنف زي تو
ما تلاحظون الحين كثروا الناس الماصله ؟!!!!
و إنها منتشرة المصالة بشكل ملحوظ وملفت بعد
وين ما ترووح تلقى ناااس مستظرفين أنفسهم .. بالمدرسة ، بالجامعة ، بالسوق ، بالشارع ، بالأهل بكل شئ بالحياااة وأحيان تحس نفسك مستظرف بعد ::
يعني كااثره مارا وش السبب ياتورى
فيه ناس ننصدم فيهم ما نتوقع تطلع هالسماجه منهم صراحة
وخص أذا رسمت في بالك انه رزه وثقل وفجاه صاار مااصل
ودك تقوول لا يرحم اممممك
وخفة الدم والتميصل لو أقعد عمري كله أتكلم فيها ما كفى صراحتن ،،
أحس صاار الحين شئ رووتيني غطا على المياانه بعنف
وككله بكووم والي لاعبين على أنفسهم أنهم خفيفين دم بكوووووووم
مدري وش يحسون فية والهي ..
يتوقعون أن اللي فاتحن خشتة طول الوقت أنة إنسان ظريف !
ولا اللي وأنت معصب ي***ر قدامك ؟
أساسا أحس إن ها لشخص ما عنده إي إحساس مع احترامي يعني لابد أنة يراعي شعور الأوادم اللي حوله
ولا اللي يعلقون تعليقات ماصلة وغصب اضحكوا ؟ <= يا كرهي كرهاة لذا الحركة
و والله المواقف تطول من هذي الناحية ..
يعني أحس فيه نااس مساكين تتعب غصب بتضحك اللي قدامها ،،
وما تدري إن هذا الشئ فطري !
وانا اساااسا مااعتبر اللي قول عن نفسه انا خفيف دم ان هذي الصفة فيه ،، بالعككس يتمناها ــ ليه !
لان مستحييل اللي دمه خفيف يحس بهذا الشئ ،، اعرف نااس وااااجد يمزعوون تسبدي من الضحك ولا عمرهم اعترفوا بذا الشئ لانه يحسوونه شئ عاادي بالنسبه لهم
يعني ما قلنا شئ تمييصلو مره مرتيين اللف بس لا تاخذوون حياتكم كلها مصاله ،، <= نصيحه محشش
والكلام يطوول من ها لناحيه ،، نااس تتسيخف علينا وهي ما تعرفنا مسويه تضحكنا ،، وما تدري إننا نسلك لها
نااس ودك ما تتكلم لان كلامهم ما منه مضمون نهائيا ،، كله سخافة بسخافة
وصار الناس اللي تحتسي زيين وعيين !
طبعا بغض النضر اللي تحسوون انهم متقطعيييييين على بال ما تطلع كلمه زينه
لا أتكلم عن الناس اللي لسانهم يقوووطر عسل
آخر العمر صاروا ما ينبغون ومسوين طيبين <= هذي نظره المتخلفين لهم
يعني تجيني حالات ودي احتسي زيين بس ادري انها لو بتطلع مني بااين اني ماتعودت عليها وفييها تكلف .. من شاان هيتس اسكت
اذكر تصير مواقف غصب نرد بشي زين
،، بس نتحطم من رده فعل اللي قدامنا
مرره من المررير اللي مرت بي <= مشوار
قلت لوحده منيب اعرفه واجد عطين شنيطتي بجنبتس ياحبي لتس
قالت يوو مسويه أخلاق قولي عطيني وبس
أنا وجهي (:44:)
تعلمني شقوول ! وأشوف وجه البنت !! جااده ام الشباب ؟؟؟؟؟؟؟
صار " الحين اللي يقولون كذا ضعوف ما دريتوا !
هذا وانأ قايلة يا حبي لك لو إني قايلة يا عمري ولا يا بعد تسلاويي أتوقع أصير مريضة خالصة !؟
يعني كنهم يقولون لا تتكلمون زين ابد !
سؤال يسدح نفسه متي بالله آخر مرة تليوقتوا ومحد علق عليكم ؟
وإذا تليوقت وخلاص ابعدوا عن طريقي ،،
بيصير وحدة من ثنتين
يا أنهم يمسكون الكلمة عليك .. أو يهايطون ويذبون عليك وأنت تقولها ،، يعني ابد ما فيه سلامه اسالو مجررب
الحين صار من الصعب على الواحد يتكلم إذا بيشكر احد أو عشان يخلص أشغالة <= بدى شغل التمصلح
لكن عادي جدا يمون علية من أول مرة <= من قال إني أذب
ما ابري نفسي بعد انا كذا
أذكر مرة وحدة سوت لي شي كبير
قلت لها ليش كذا الله يا خدتس <= و لك وجه تتكلمين عن اللواقة بعد
و دايم تصير لي ولغيري .. تتضاارب المشاعر ثمين يطلع كلام يفشل !
حتى هذي المشاعر يبيلها من يكفخها .. صارت متخلفة ما تعرف شلون تطلع <= بديت اتميصل
بس من جد فية أحيان كثيرة تحس انك تقول كلام موب بمكانة أو تسمع كلام موب بمكانة
وصار أطلق شي الحين المهايط والذب ورآآح سوق الكلام الزين
المشكلة الحين إذا جدعوا عليك كلمة كبر الجبل ، وضايقتك تدرون شلون يبرؤون أنفسهم
يقولون انك ما تحب الصراحة
طيب دقيقة تعال شوي وشي الصراحة اللي أنت تعرفها يا أبو العريف
أجي أقولكم بالأول وش المفهوم
"الصراحة "
الصراحة اني اطلع كل اللي بقلبي بردة فعل غبية وطبعا أنا من جوا سميها صراحة ،،
هذا المفهوم الغبي
لكن المفهوم الأصلي للأسف للحين ما أنعرف
الناس الحين إذا بتصارحك اقصد بتهزاك معناتة بتسبك وأنت انثبر لأني أقول الصدق
لكن ماتوا الناس اللي يجونك ويقولون بصرراحة أنا عاجبني هذا الشي فيك أو شئ مثل هييك
أصلا ذولا ضعوف نسينا !
يعني الحين
صراحة = آي شي شين
طيب يلا نقول خلاص صارحوا بشي شين ما قلنا شي ، بس أهم أهم أهم شئ الأسلوب
يعني أول شي لا تصارح وأنت منفعل وثاني شي لا يصير كل كلامك او صراحتك وخنبقتك مع المسكين اللي قدامك سلبية !
جيب له شي إيجابي تطلعه من حالة الذهل اللي يمر فيها عقب ما سمع منك كلامك .. وصدقوني راح يتغير فيه شي من جوا ..
وعشان تصير صراحتك تفيده بتغير بسيط .! انا مجربه
بتقولون كيف ؟
مثلا قدامك إنسان ينفعل بسرعة خلاص ،، وأكيد أنها مضايقتك وتعبت تلمح له بس ما فاد فقلت انك بتصارح أو بتوضح له أن هذا الشئ مضايقك اوكي
الحين أنت وش تسوي؟
حط في بالك شئ فيه زين لو أنة موب لم السالفة اوكي
فا لنفرض أنة طيب
لا تقول أنت تراك رافعـ(ن) ضغطي ورآك تنفعل بسرعة ؟
كذا تراك بتضارب منتب تصارح .. وكأنك خليته كله غلط بغلط
لا الصح أنة مع السوالف أو الأفضل أنة يكون بنفس الوقت قايل لك هو شي عن نفسك ،
فالأفضل انك تقول أنت متسرع ومتهور في بعض الأمور بس اللي يغفر لهذا طيبتك ، يعني من جد أحيانن تسوي أشياء أحس إني اتنرفز منها بس أتذكر وش بقلبك وأمشي <=
ترى نفس الكلام بس جينا من ناحية ثانية ،،
و نصيحة لوجه الله أحسن شئ تكون الصراحة بالتلميح ما تكون جدية مرة ،،،،،،
الحين بعد ما تكلمت وبربرت عليكم بذا الحتسي ،،
خليني اقول ما يستفاد ،،
1- الميانة إذا ما كانت قائمة على الاحترام عمرها ما تكون ميانة ..
2- صير خفيف دم بس موب دايم ولا تصير كل أبو حياتك مصالة
3- ترى مو الشخص اللي يحكم على نفسه هل هو نكوتي ولا لا ،، يخلي أللحكم للي حولوا احسن
4- ترى موب كل من فتح فمه 24 ساعة إنسان مرح ! هذا مريض مع احترامي
5- ترى يجوز نصارح بالأشياء اللي تعجبنا مو دايم نصارح بالأشياء ألشينه !
6- و بالنهاية قبل لا أضف عفشي خلو صراحتكم دائم دائم ما تكون جدية
حطوا جانب إيجابي
إذا كانت كل صراحتكم سلبية
آسفة على الإطالة
بس يا ليت لو كل وحد ه تكتب راية وموقف صار له عن
الميانة الغبية ، استخفاف الطينة ، اللواقة ، الصراحة
وللأسف مشكلتي موب ان هذا الشي بشخص معين او بناس محددة المشكلة انو هذي العادات منتشرة بالمجتمع والمحيط اللي نحيط فيه كله <= اخص يا محيط
بس صدقوني إذا أنا وأنتي قدرنا نتغير و فهمتوا وش اقصد أنا بالضبط بنأثر بناس كثار ..
وبس
استنا ردودكم:time: