ماهي علامات الحمل الأوليه ؟

الصفحة اللي بعدها بنزل لكم العلامات وهنا بحط مقدمة .


كثير اشوف مواضيع هل انا حامل او لا و جاني دم او ماجاني شي ، تتوقعون اني حامل أو لا ؟
كثير يسوون حقن او حمل عادي ويراقبون مراقبة شديدة لأنفسهم وهالمراقبة والتحريات الزايدة ممكن تخلق لك أعراض وهمية أو تخليك تتخيلين انك حامل وبالواقع انك ماحملتِ .

.
أنا بكتب لكم بعض العلامات الأولية وأتمنى كل من جاها علامات تكتبها هنا ومتى جتها عشان اللي يراقبون حالهم يهدأون مع ان ولله ماراح يهدأون غير بالتحليل يوم يعطيهم ايجابي او سلبي.

أنا صرت أكره المراقبة والتحري لأنه ممكن يدخلك بحالة صدمة وممكن تبكين اذا كنت تتحرين واجد ويجيك ضيقة صدر ، مو متخيلين إن نسبة الحمل ببعض المحاولات عند البعض ماتتجاوز ٢٠٪؜ ولكن هم الله يهديهم يكونون حاطين ببالهم وقت المحاولة انهم بيحملون بنسبة اكثر من ٩٠٪؜ ويوم مايحملون يكتئبون ويتحطمون ..
.
لهالسبب امشوا عالواقع ولاتحطون نتايج نجاح مرتفعه عشان ان طلعت النتايج سلبيه ماتنصدمون وتبكون وتصيق صدوركم ويجيكم ردود أفعال من الشيطان ..
.
صح خليكم متفاءلات فالله عند ظن عباده وهالشي مايمنع انه من التفاءل انك تحسنين الظن بالله بانه ماراح يجيك الا الخير سواء حملت او ماحملتِ . وترضين بالمكتوب.
.
لابد اول شي انكم تعرفون شي مهم وهو انه انتم وش هو الشي اللي يظهر بالتحليل انكم حوامل ؟

فيه هرمون خاص بالحمل اذا تم التحليل بالبول او الدم وتم الكشف عن هالهرمون بكمية واضحة يعطينا نتيجة حمل ايجابية(موجب او سالب) او التحليل الرقمي اللي يعطينا رقم ..
.
ومن هنا لازم تعرفون وتستوعبون انه ببداية الحمل اول الايام يكون الهرمون مانزل بالدم ولا البول والسبب انه بالبداية يحصل تلقيح البويضة (هجوم المنوي على البويضة واختراقها ) والتلقيح مايكون بدقيقة فهو يحتاج وقت شوي سواء بالمختبر او داخل الرحم ويكون بعد ماتتلقح البويضة يتكون الجنين ، وبعد مايتكون الجنين يبدا الهرمون يظهر(يعني بالبداية وقت التلقيح مايكون فيه هرمون ) فبعد التلقيح مايتم يبدا هالهرمون انه يزيد ويفرز بالدم ويطلع بالبول ومجرد مايزيد الهرمون يكون نقدر نكشف عليه ..
يعني تجين تقولين انا مع زوجي امس هل تتوقعون اني حامل اليوم ، اتق الله يابنت حتى جسمك نفسه مايدري هل الاخصاب بينجح او لا ( مازالت الحرب قائمة بين البويضة والمنوي هههه ) وأنت تبين احنا والمستشفيات ندري عن النتيجة .. شوي منطق يابنات .. اقدر حماسكم وحرصكم لكن لابد تصبرين الا ماترتفع اعلام الانتصار او تبين الارقام بالنتيجة ..
.
.
طيب بعد اخصاب البويضة بيتكون الجنين وبعد مايتكون الجنين بيحصل افراز للهرمون بكميات قليلة وثم تبدا الكمية تزيد وتوضح بالدم 🔹 من بعد اليوم الثامن عند البعض والبعض توضح النتيجة عندهم من بعد ١١ يوم والبعض من بعد ١٢ يوم والبعض بعد اسبوعين والبعض يعدي موعد الدوره وزيادة ثم تظهر النتيجة ، فسرعة ظهور النتيجة مختلفة من حمل لحمل لتفس الشخص مابالكم لو كان الأشخاص مختلفين .. لهالسبب الأطباء دايم يقولون حللوا بعد ١٤ يوم او بعد مايعدي وقت الدورة لأنه يبون يضمنون ان الهرمون وضح ويعطون فرصة للحمل المتأخر ..
.
الحين اتفقنا انه التحليل بعد الجماع مباشرة مستحيل يعطيك نتيجة صحيحه وانه لابد من انتظار أيام حتى يتم افراز الهرمون وثم يبين بالدم والبول …
.
.

الحين ننتقل للصفحة التالية وأبي منكم ذكر العلامات اللي جتكم قبل تعرفون انكم حوامل ، لأجل الكل يستفيد ، وأمهات التوائم هل ممكن تفيدونا بنسبة التحليل الهرموني .
.
يلله بنتقل للصفحة الثانية