اشكرك ياأخت ركايز على تفاعلك مع موضوعي بس أحب أوضح اني حاولت اخليه يشوف عياله عن طريق الاتصال بأهله عشان يشوف عياله مامنعته منهم لكن حتى لما راحو عياله لأهله ماشاف عياله ولاشافوه رغم ان عياله يبغو يشوفوه بس هوه موسائل وكمان كان رد اهله انه عيب عندهم ان الطليق يدخل بيت طليقته واذا يبغى يشوف عياله أروح مع عيالي لبيت أهله عشان يشوفهم بالله هذا معقول وش رأيك أبغى ردك بالأمانة

انا صديقتي مطلقه بس والله العظيم اني اتعاطف معها واحبها في الله ...وازعل اذا احد نظر لها بأنها مطلقه ع الرغم اني ماني مزوج

عزيزتي اكثري من قول اللهم اجرني في مصيبتي واخلف لي خيرامنها /قالت هذا الدعاء ام سلمه رضي الله عنها عندما توفي زوجها فعوضها الله بمن هو خير من زوجها وهو الرسول صلى الله عليه وسلم /اسأل الله لك ولجميع بنات المسلمين بالازواج الصالحين دعواتكم لي بالذريه الصالحه

اللي يهينون المطلقه ماااتوا

انا اسميهم البنات المنفصلات منطلقات

وانا وحده منهم (منطلقه) بكل فخر

وماعلي من احد كلام الناس تحت المداس

ورزقي ورزقكم على رب العباد

وفي الحديث (لاتشمت بأخيك فيعافيه الله ويبتليك)

انا مطلقة 15 سنة الله يفرح قلوبكم ادعولي اتزوج من يفرح قلبي وروحي واصير ام لاوالدة يارب

وعسى من دعت لي بقلب صادق ربي يحقق مناها

نجي للموضوع

في بدايت الطلاق تطلع اشاعات على المطلقة فيها وفيها رغم ان طليقي زكاني لكن ما سلمت لانه طلاق عشان هو عقيم

نظرت الناس صعبة في الفترة الولى بصراحة

في العرس العيون تأكلني اكل بس عطيتهم اشكل ولا هموني اكشخ والبس وارقص في العرس وابد ما احتقرت نفسي

في الجالس اذا جت سيرت مطلقة ايه فلانه كانهم يتنقصونها

ولو جميلة قالوا ايه اللي طلقها اعمى يعني فكة من كلامهم مافيه

ولو رحت عزيمة كاشخه ولابسه ومتزينه ومبسوطه وسلمت على وحدة من العجايز يحليلهم ايه فلانه الله يقوم حظك والله والنعم

ايه بس الظاهر الحظ لا طاح مافيه فايدة

لاوزيدكم من الشعر بيت زوج اختي لا عصب عليها روحي صفي مع اختك مطلقة

ولا وانت جالسه تسولفين وناسيه حسرة على من طول المدة وعندك بنت ماتزوجة قالت لا ان شاء الله يطلقني بعد ماشافني

وااااااااو ما اقلبها على نفس يلا جرح الله يعين اعيوني كم بكت من الكلام الجارح اللي مزقها تمزق

ولا بعد اذا احد عصب عليك في البيت قال بكل بساطة لو فيك خير ما رجعتي مطلقة حتى مع انهم عارفين سبب الطلاق

وبعد انت مطلقة لا تحلمين تخذين شاب مالك الا متزوج والا شايب وعسى يخذوك يارب وش ذنبي وهذا الكتوب لي على اللوح

وبعد القريبة تصيبنه حالة من الخوف على رجالهن لدرجة كل ماجاء واحد ارسلوا ينادونهم الله يعين صبري على اللهدة

وقريباتك المتزوجات يورون بعض اما انت لا تحسدينهم مطلقة

واذا قدمتي طبخ وكنت ماهرة به مايقولون تسلم ايدك تحسين بعونهم كلام ليش تطلقتي وانت طباخة وسنعه

واذا سنعه ايه بس حظك مو سنع

وكله كوم وحدة قالت لي فيه كفيف تزوجينه قلت لا ما اقدر اسعده قالت خذيه وش انفعك المبصر هذا هو طلقك قلت زوجيه بناتك

قوية ههههه قالت لا بناتي بنات ماهن مثلك ولا يبن الا شباب

وانا لا ماعندي احسس الله يعين من جد مواقف تبكي الروح والقلب

وفي البيت الكل يبك تشتغلين وبس مدامك في البيت حللي جلستك الله على ردات الحظ

واذا اهديت احد يوه الله يعافيك بس انت ما عليك شرهه ماانت متزوجه طيب وانا شفت ها الحاجة وشريتها لقربتي وبدل وماتقول

جزاك الله خير هذا ردها بس ما سكت لها قلت الله يعز ابو متعب يمكن حالي افضل من بعض المتزوجات على الاقل عندي

دخل شهري اصرف منه واتصدق منه واهدي منه

وفي الاعراس تحسين من دروا انك مطلقة يكشون منك

حتى مرة وحدة بعزيمة تمزح الاخت ع بالها قالت يوه انت ينخاف منك مطلقة قلت لاتخافين ماني ما اخذف رجلك لو مايبقى الاهو

وتخيلوو النت في بيتنا 11 سنه ولا اجية له رقم سري انا مطلقة ما يصير

وبعد كذا هم بنفوسهم جابوا لي لاب توب وسجلت عندكم من هذا التاريخ دخلت عالم النت

والجوال ماطب يدي الاقبل 5او 6 سنن يوم شافوا حتى البزران معهم ايه كم جنى علي الطلاق وتخلف المجتمع

والجارات حلوات وعسل معي ويوم تزوج اخوي اخذوا رقم مرت اخوي وصاروا يدقوا عليها هي تعالوا للعشاء للقهوة استغنوا عني

انا ماني متزوجه مثلهن يالله

بس اللهم لك الحمد انا اروح واجي واعامل الناس بكل خير واتحمل والصبر ونصر ربي قريب

وبعد لا شلت واحد من البزان حقين العايلة ويالله كم احب الاطفال الله يعوضني بشبابي اللي راح

قالوا خليه وش فهمك بالبزران يستكثرون على الضم طفل يارب فرجك

واذا رحنا مجلس قاموا يطرون الاعمار واللي كبري ماشاء الله اكتفت من العيال قالت لا خلاص جلسنا عن الولادة كبرنا وعينها

لي يعني كبرتي يافلانه خلاص يالله كم ظلمني المجتمع البتصرفات واقوال وافعال ربطوا حياتي بالزواج والزوج والله ما ارد لي


زوج يوم يريد ربي ما احد يمنعه


حتى ان وحدة قالت لو منك ما اتزوج اسبح واهلل وخلاص العمر راح


هذا غير اللي ينقطعون من العايلة وبعد فترة يتصلون اكون فرحانه بتصالهم بعد السلام وشويت كلام هاه فلانه مانخطبتي ولا جاك

نصيب 00 جرح الله يعين قلبي


وصادقة الاخت المطلقة بعض الناس ينظر لها انها مجرمه او خبله خربت بيتها


بس بقولكم شيء لو اكتب من هناء لا بكرة ماشرحت وش تعانيه المطلقة من نظرة ومن تجريح من اقرب الناس

خاصة اذا طولت على وضع الطلاق وتوقف نصيبها

وأسألكم بالله ادعولي تعب قلبي مما جاه من عذاب وملت مخدتي الدمع ماقد نمت بدون ما ابكي من شدة القهر والتحطيم

وردات النصيب

رغم اني مؤمنه بقضاء الله لكن المشاعر لها قدر احتمال معين ابكي واموت بكي بيني وبين نفسي بس ماقد بينت لأحد فيهم

ان الطلاق دمرني بلا ذنب فقط لان الله كتب على الطلاق


هذي رساله اوجهه لكل البشر ارحموا المطلاقات يكفي ما فيهم من جروح وعذاب

لاتسألونهم ولا تدعون لهم من قدامهم وهم في حالة فرح خلوهم يفرحون عمر الفرح في حياتهم دقايق قصيرة

ولا تسألونهم عن حياتهم الماضية ولا تدخلون بحياتهم

اعرف وحدة قالت يوه مطلقة وتنقصت من المراءة والله العظيم والمراءة المقصودة ماتعرف بعد فترة تزوجة بنتها وتطلقت ومعها

طفل شفتوا يا اخواتي والله مايدوم الا العمل الصالح لازوج ولا ولد ولاغيره

انا اتجهت لله وبعت ها الناس وفوضت امري اليه

تكفون ادعوا لي اكثر من 15 طلاق وعذاب وجرح من الوريد الى الوريد

وراح عمري وانا على ها الوضع يارب افرجها علي واحسن خاتمتي يارب