ماودي لو قلت كذا استكثرتها من نفسي

السلام عليكم ورحمة الله وبركاته
الموضوع ومافيه انه أنا بنتي عمرها7 سنوات
وعندي قريبتي بنت عمتي وسلفتي بنفس الوقت عندها ولد بعمر 4 سنوات الولد طبيعته بكاي وخواف وجدا حساس نفس شخصية بنت عمتي يعني لو بنتي دفته بالغلط وراح يبكي الصغير تجي الأم اللي هي بنت عمتي تهاوش بنتي ثم بنتي تقولها بالغلط وأنا اسفه وماكنت أقصد،،
تجي بنت عمتي تقولي انه كلمت بنتك وطلع مو بالغلط اعترفتلي انه دفت ولدي بالقصد بس كانت خايفه تعترف،،
أنا استغربت ليش بنتي تسوي كذا ؟؟
بالاخير حصل موقف امامي وانصدمت
كانو الاطفال يلعبون وأنا بالغرفه اللي فيها الأطفال الولد الصغيرون اللي قلتلكم عنه يلعب وش زينه مع الأطفال ..وطفل من الأطفال عمره يمكن 6 سنوات منسدح يطالع التلفزيون،، ولد بنت عمتي الصغير اللي عمره 4 يلعب وتعكرف من الولد ابو 6 سنوات لأنه منسدح وهذاك يركض وما انتبه شفت الموقف قدام عيوني الولد ابو 6 سنوات ماكان قاصد ابدا وراح الولد ابو 4 سنوات يبكي عند أمه جت امه  اللي حصل جت وهاوشت الولد ابو 6 سنوات وقال الولد يا خاله ماكنت قاصد هو مشى على بطني ما انتبه وطاح حتى أنا تألمت يا خاله هي اساساً ماانتظرته ولا يبرر على طول قاطعته وقالت لا مره ثانيه انتبه لاتنسدح بالطريق أنت عورته
بعدها شفت بنت عمتي هذي تكلم أم الولد ابو 6 سنوات تقول تخيلي ولدك طيح ولدي وسالته ياحبيبي قولي أنت قاصد تطيحه عادي ماراح ازعل منك ،،قال ولدك ايه قاصد بس اسف،،،أنا وقتها وجهي صار  بركان ليش تكذبين؟؟ليش تقولين انه  الولد قال كلام ماقاله ؟؟؟وش المقصد من الحركة وش تبي توصل يعني ؟؟ لأنه أنا كنت موجوده في الغرفه اللي صار فيها الموقف وشفت كل الحوار‏ أبدا ماحصل اللي قالته تكذب
غير كذا أشوف مواقف ولدها ابو أربع سنوات مع الأطفال مثال طفل مسك يده بقوة يقول يوجع ويبكي عند امه ويقول ضربني مثال بنت عمرها 11 سنة قبصت خدود الولد ابو 4 سنوات قالت يا زينك يروح الولد يبكي عند امه فلانة ضربتني كف والبنت بس قبصته مع خده تدلعه يعني مواقف بايخة والأم أوفر مره
طيب نجي للشق الآخر رحت أهل زوجي ومن السوالف قالو لي ليش بنتك بس تدف وتضرب ولدنا ،، شكلها تغار منه قلت من قال قالو فلان يقصدون ابو الولد ،،قلت أنا والله هم حساسين ومدلعين ولدهم وفوقها كذابين يقولون الطفل كلام ماقاله اجل تقول مرت ولدكم انه بنتي اعترفتلها انه هي دفت ولدها بالقصد وهي تكذب ماتبيني ابرر وأدافع عن بنتي حومت كبدي هي وولدها ياتعلم ولدها يدافع عن نفسه ولا لاتجي إذا بتمشي وتهاوش في ذا الأطفال وتتهيأ انه الأطفال متسلطين على ولدها وهي أصلن اللي حساسه هي وولدها،،،  وأسكتو وعم الصمت ورجعت البيت(( وراحت لسكره وجت الفكره)) وقلت ليتني ماقلت كذا طول عمري مالي بالقيل والقال ومترفعه وش جاني خربتها ليتني ماقلت كذا لا والمن الأم زوجي وبناتها عرفتو اللي تضايقت من نفسي مره وكرهت نفسي مره وبنفس الوقت طفح الكيل حامت كبدي اسكت واجامل وامشي