مايجيب راسه شي .!!

اولاً بسم الله الرحمن الرحيم .. السلام عليكم ورحمة الله وبركاته ،،




قبل كم سنه ما اقدر احدد بالزبط طلعت عند الزوجات هبة او موضه (( الليالي الرومنسيه ))
لية حمراء وخضراء و السندريلا و حورية البحر و و و و الخ




وكان الإعتقاد السائد ان هذي الليالي حتكون نتيجتها حياة زوجية راااااائعه حياة كلها عسل بعسل ،، وان السبيل الوحيد لقلب الرجل هو " الجنس "






مرينا بعدها بكم سنه وفجأة اتغيرت المفاهيم !!!!






وطلعو لنا مجموعة من الزوجات بفكرة زوجك زي الكورة شوتيه يرجعلك !!!!!!
او زي ....... جوعية يدور عليك !!!!






اما الناس اللي كانت شوي محترمة بألفاظها جابوها بصيغة ارقى وقالو لاتشبعية عاطفياً عشان هو يدور عليك




وماننسى الى قالو اصلا الحياة اكبر من رجل عيشي حياتك وكوني نفسك والتفتي لعمرك واتمردي وايش يعني رجل ماوراه غير التحكم والتسلط و و و و الخ





الكلام اللي ذكرته فوق ينطبق عليه مثل (( ياطخه ياكسر مخه ))




يعني اما اكون زوجة مغرررررررررقة زوجي حب ورومنسيه ودلع عشان يحبني ويجري ورايا


او اكون زوجة معطيته اكبرررررررر طنااااااش عشان كمان يحبني ويجري ورايا




يعني اختلفت السبل بس الغاية واحده ،،






طبعاً اكيد اي زوجة ماعندها وعي بالحياة الزوجيه حتكون مع الخيل ياشقرا وحتكون طبقت كل السبل اللي ذكرتها فوق لعل وعسى انها توصل لنتيجه ولكن غالبا تكون طرقها كلها بائت بالفشل ،،






بموضوعي هذا حابة اقول شي عن الحياة الزوجية والزوج بالاخص وحابه اني استمتع معاكم بالنقاش بنهاية الموضوع




شاهدت محاظرة على اليوتيوب قال المتحدث فيها كلام جمييييل عن الزوج والزوجة المحاظرة طويله ولكن راح اقول باختصار اللي اتذكرة منها




اولاً خلونا نشوف الزوج ،،


غالبا الزوج تكون عنده صورة ذهنية عن المرأه صورة المرأه اللي هو حاب انها تكمل حياته وهنا مانتكلم عن الصورة الشكليه لااا هنا المقصد هو الطباع والاخلاق والسمات الشخصية






ولان الرجل مكون صورة ذهنيه مسبقه فهنا هو مستحيل يتكيف مع صفات وعادات واطباع زوجته اذا ماطابقت الصورة اللي بباله




يعني بالمختصر يستنى انها هي اللي تتكيف معاه وتتحول الى المرأه الموجوده بصورتة الذهنيه ..






طيب حنلاقى زوجات كثير تقول وليش ان شا الله حضرت جنابة مايتكيف معايا ..؟؟!!!!




لانك ياعزيزتي الزوجة تختلفي عنه بشي عظيم ورائع وهو قدرتك على التكيف وللأسف ان الرجل مايملك هذي المهارة




بمعنى انك انتي ك انثى مافي ببالك صورة ذهنية عن الرجل صحيح عندك فارس احلام تتمني انك تتزوجية بس فارس الاحلام هذا ليس صورة ذهنيه






بمعنى ان فارس احلامك ممكن يكون توم كروز لكن لما يجي ولد عمك ولا ولد جاركم يخطبك راح تطيري فيه وتحبيه وتعشقيه ويصير توم كروز صفر على الشمال






بعكس الزوج يكون بباله صورة ذهنيه عن زوجة محترمة صوتها مايعلى على صوتة استقبالها لطيف احضانها دافئة ، غير عنيدة ،، تحرص على راحته





لكن لما يتزوج يلقى ان زوجته وقت الغضب صوتها جدا عالي اسلوبها شرس لسانها سليط




عمرها ما استقبلته بحضن او حب ،، عنيده جدا ومستحيل تتنازل






هنااااا قلبه ينقفل تلقائياً عنك ومستحيل يتكيف مع وضعك حتى لو حاول يعني اذا كنتي عنيده مثلاً ماراح يقول والله هي عنيده انا لازم اكسبها واصير مطيع لهااااا .. بالعكس ممكن يكون اعند منك وممن باحسن الظروف انه يلبي الشي اللي تبغيه عشان يتقي شرك مو لانه يحبك






يعني ياعزيزتي الزوجه بالمختصر اذا ماكنتي قريبه من الصورة الذهنية للمرأه اللي يتمناها زوجك حياتك الزوجية حتكثر خلافاتها واذا كثرة خلافات الزوجين يزيد الجفا والكره وممكن لاسمح الله تصل للطلاق ان ماكان طلاق على ورق حيكون طلاق عاطفي







طيب حتقولي لي يعني انا اتكيف واكون زي مايبغى وزي مايحب ومريحته ومدلعته بس هو راكني على الرف ولا يلتفت لي .!! ليش اتعب نفسي اذاًواتكيف واكون المرأه اللي بصورتة الذهنيه ..؟






هنا ياعزيزتي حتكوني احد امرين ..


اما انك عارفه الصورة الذهنيه اللي يبغاها زوجك وطبقتيها لكن مغررررررررقته عاطفياً منها الى درجة وصول زوجك للتخمه العاطفيه واذا وصل الرجل للتخمه العاطفيه راح يفصل عاطفيا ويوقف عن العطااا




بمعنى حبية واحترمية وقدريه لكن لاتكتمية باهتمامك الزايد هو مايبغى منك كذا ولاطلب هو يبغا احترام ويبغا دلع بس مايبغا تدليع مبالغ فيه .. ف ان كنتي تعتقدي انك قد ماتبذلي للزوج حتلاقي حب غلطانه ،،






زوجك ان اعطيتيه اهتمام بمقدار ٨٠٪؜ ماراح ياخذ منه الا ٢٠٪؜ والباقي ماراح ينتبه له يعني راح تعبك هدر فهنا انتي ماكنتي المرأه اللي بصورتة الذهنيه انتي هنا الزوجة اللي خانقته وكاتمه عليه باهتمامك الزايد






او بالحالة الثانيه تكوني تقدمي لزوجك اهتمام وحب باعتدال بس للاسف مافهمتيه فجالسه تقدمي شي عكس اللي هو يبغاه




يعني مثلاً زوجك عاطفي ويحب الاحضان لكن انتي عكس عاطفيه وتحبي الكلام فجالسه تغرقيه كلام حب وهو يبغى منك الحضن




او زوجك يعشق المرأه المحترمة وانتي مغرقته اهتمام لكن وقت الغضب تصيري ابو عرام فهنا هدمتي كل اللي بنيتيه






بكل الحالتين انتي ماطابقتي الصورة الذهنية اللي بباله






فهنا الوضع يعتمد على ذكائك يعني من كلام زوجك وعشرتك معاه راح تعرفي هو ايش يحب ايش الصورة الذهنيه اللي بباله ... اذا وصلتي لها وطبقتيها ((وترى هذا الشي سهل موصعب )) راح تمتلكي قلبه وراح تمتلكي حياة زوجيه هاديه مستقره فيها مودة وفيها رحمة وتكون بيئتكم مناسبه جدا لتربية ابنائكم تربية مستقره






بعكس لو اخذتك العزه بالاثم وعاندتي وقلتي لا هو المفروض يفهمني هو المفروض يحبني ويعطيني اول عشان اعطيه






هنا حتكوني جنيتي على نفسك وعلى حياتك لان الرجل مو مهيئ نفسيا وخلقياً انه يتكيف على مزاجك وطبعك هذا شي مو بيده ولا على كيفة هذا شي ربي خلقة علية






معلومة اخيرة حابة اضيفها لكل زوجة تعطي زوجها حب واهتمام وتنتظر منه رد فعل سريع


الزوج ياخذ ثم ياخذ ثم ياخذ ثمممممم يعطي




يعني ياخذ منك حب ياخذ احترام ياخذ حضن دافي ياخذ كلام لطيف بعديييييييييين حيبدا يعطيك ،، واذا اعطاك حيرجع بعد فترة بمرحلة الخمول العاطفي هنا لاتفتكري انه اتغير عليك وانه يكرهك وانه في احد غيره بحياتك لاااا ،، هنا خليه يشحن طاقته العاطفيه منك مرا ثانيه وحيرجع يعطيك




بس ارجع اقولك خلي احترامك داااااااائم وعطائك موزون لا افراط ولاتفريط






اتمنى اكون وصلت فكرتي ووصلت الكلام اللي سمعته واستفدت منه






واتمنى ان كلنا نكون زوجات واعيات ونسد سمعنا عن اي كلام سلبي عن الحياة الزوجيه او اي كلام ممكن يسبب خلل بعلاقاتنا مع ازواجنا ويحول حياتنا الزوجيه لساحة حرب احنا بغنى عنها

..🌹🌹..