ما أجمل الهند لكن أرضي أجمل ،، يشتـاق قلبي لهـا من حين يرحل  .. } تشكن مسالا ،،

السلام عليكم ياامهات وصبايا
هذا اول موضوع لي بقسم الطبخ فقلت خليه موضوع يستاهل شوي..
السالفه ياطويلين العمر كل مره اسوي لحم او دجاج مسالا يكون لونه اورنج
واذا مره مره سبح من الصلصه والطماطم صار اورنج على احمرار خفيف
بس امس سلمكم الله قلت ياانا ياهالمطاعم الهنديه ولون دجاجهم الاحمر< ادمان
مافيه بهارات هنديه الا وشريتها على اساس اوصل للون الاحمر واي شي لونه احمر اشتريه لعلى وعسى بس خابت ظنوني
بسسسس وصصصصللللللت للي ابيه واخييييرا ورب البيت كأنك تاكلين بمطعم هندي
ولا اللون ياااااسلااااام احمرررررررر
الصورة تتكلم ... 

ماااشاءالله تبارك الله ...



شوفو الدجاج نفسه كيف احمررر

نجي للمقادير والطريقه بالتفصيل 

دجاج منزوع الجلد مقطع ثمان قطع ومشرط شرطات خفيفه بالسكين
نضع نصف ملعقه صغيره ملون الطعام ( احمر ) <هذا السر مع ربع ملعقه ملون الطعام اصفر( كركم) ويخلط مع ملعقة زيت ونصف كاس ماء ويخمر الدجاج مدة عشر دقائق بالمحلول ،، 
( ونحتاج بعدين تقريبا بياله من المحلول خليه على جنب )..
(وهنا بهالمرحله تقدرين تخلينه تندوري يعني تنقعينه بالمحلول مع بهارات هنديه وتشوينه) للي يبغى تندوري
اما الي تبغى المسالا تكمل الطريقه

نضع بالخلاط :
2طماطم كبيره
3فصوص ثوم
قليل من الكزبره الطازجه على حسب الرغبه اذا تبغينها نكهتها طالعه كثري
3ملاعق صلصة طماطم
نصف علبة زبادي
نخلطهم بالخلاط مع بعض

الطريقة :
1- نحمس بصله كبيره مفرومه مع زيت حتى يصبح البصل اشقر
2- نضع الدجاج المخمر ( من دووون المويه ) على البصل ويقلب الدجاج مع البصل
3- نضع ملعقتين كبيرة بهارات مسالا الدجاج وملعقه كاري ونصف حبة ماجي وملح حسب الرغبه ويقلب
4- نضع عليهم ربع كاس ماء ويترك قليلا حتى يتسبك لمده خمس دقائق على نار متوسطه
5- نضع مقادير الخلاط على الدجاج ويترك نصف ساعه على نار هادئه حتى يستوي مع اضافه بياله واحده من المحلول ( الي خمرنا فيه الدجاج )<طبعا هذا السر الي يخلي المسالا احمر
او اكثر شوي من بياله يعني لين توصلين للون الاحمر الي تبغينه
6- اذا قرب الدجاج ينضج افتحي القدر خلي مويته تخف شوي وتثقل وبعد مايثقل شوي صبي عليه ثلاث ارباع بياله كريمة خفق وتقلب خمس دقائق وطفيه وبس..

ياسلاااام على الريحه



وهنا ..



وهنا ..




بالنسبه للرز 
عادي انا حطيت رز ابيض واخر شي تحطين فوقه كركم وشوي من المحلول الاحمر خطوط عشان التلوين بس 





ومعه سلطه خس وجزر مبشور وخيار شرائح




.
.
.

وهذي صور لبهارات المسالا و الكاري و صبغة الطعام الحمراء







ونفس الشي لمسالا اللحم بس تزودين مدة طبخ اللحم لين يستوي

جربوها وربي ماراح تصدقون النتيجه
ان شاءالله عجبتكم
عاد الله الله بالردود والتطبيق لاتفشلوني< تعبت من تحميل الصور

بس تكفووون الي افدتها بشي تدعي ان ربي يحقق لي مبتغاي
وينقلنا للرياض عاجل غير اجل يارب


سلام ...