ما ابي اتطلق

السلام عليكم
بكتب مشكلتي كامله ومعاناتي من سنتين
وأتمنى اني ألقى الحل عندكم لانه مالي بعد الله غيركم

انا يا بنات متزوجة من سنتين وشوي عندي بنت عمرها سنة وتسع شهور مشكلتي الاساسية هي اهل زوجي
زوجي رجال طيب وفيه كل الصفات الزينه الي تتمناها اي وحده ف زوجها وانا احبه اكثر من اي شي فالدنيا وهو بعد يحبني
مشكلتي بدأت لما زوجي قرر يخطبني أهله كلهم رفضو ووقفو بوجهه والسبب اني كنت من قبيلة غير عن قبيلتهم
بعد ما جلس يزن فترة طويلة رضو بالأمر الواقع وجو وخطبوني تصورو جلسو يجادلو فالمهر الي طلبوه اهلي مع انه يشهد الله أبوي طلب شي بسيط جدا ولا طلب منهم شي ثاني ووقت جابو المهر ما جابو معه ولا قطعة ذهب مع انه نحنا من عاداتنا العروس يتقدملها ذهب وهدايا مع المهر رضيت وقلت اهم شي هو معاي
جاء يوم الملكة سوو لزوجي شي بسيط ورفضو يعزمو احدكم اهلهم لأنهم مستعرين مني ومن اسمي وكانهم ما يبو احد يدري من ماخذ
وقت دخل عشان يلبسني الدبلة أمه جلست تبكي من قلب كأنه متوفي لها احد وبصوت عالي حتى اهلي استغربو
مرت الايام وجا وقت تحديد يوم الزفاف أهله جلسو يماطلو وكل مره يجونا بتاريخ جديد كل هذا وانا وزوجي فالنص مع اني كنت خلاص زوجته بعدين جاه ابوه وقاله هالبنت طلقها لانها ما تناسبنا ونحنا تعبنا من كلام الناس وتعبنا من الكلام الي يجينا لانه ماخذين من هالعايله
جلسو اهله بعنادهم وهنا توقعت زوجي يحط رجله بالأرض ويوقف معاي ن الي صار انه كان بين مد وجزر وكان يكلمني يبكي ويقول ما اعرف ايش اسوي ! يعني من الاخر كأنه تخلى انا لما شفت الوضع كذا قلت لاهلي وأهلي راحو واجهوهم ابوه طبعا من النوع الي جدا يهتم للناس ويعمل لهم الف حساب ومستحيل ينزل وجهه قدام اي مخلوق حتى لو كان اهلي، فهذاك الوقت ابوه أنكر كل شي وحدد معاهم موعد الزفاف
الي تغير انه بعد هذاك اليوم زوجي تغير جدا صار بارد وانعزل حتى اذا شفته بالصدفه (بيت اهلي واهله على شارع واحد) كان شكله متغير
جا يوم الزفاف وعلى كل الي صار قبل كنت طايره من الفرحة اني اخيرا بسكن مع حب حياتي ف بيت واحد كان كل شي مثل الحلم
الزفاف كان من ترتيب اهله وسوه ف قاعه صغيره وقديمه وشكلها كان اقل من العادي والكوشه كانت للامانة تفشل لدرجة انا لما دخلت حبست دموعي استحيت لانه كل بنات اهلي وصديقاتي سوو زواجاتهم ف أفخم القاعات، مع انه اهله كانو ناس مقتدرين غير انه أبوي عرض يساعدهم فترتيب الزفاف، كانو الحاضرين من طرف اهل زوجي بس أمه وأخته وكم وحده من خالاته فقط دخلت القاعة وجلست على الكوشه حاولت أتناسى الي فيني وكل إليّ افكر فيه هو دخلة زوجي علي وكيف بيكون شعوره لما يشوفني بالفستان
أمه وأخته طول الوقت كانو رايحين جاين على الكوشه وبس يرمو علي كلام مثل السم
من عاداتنا العريس يدخل القاعه وياخذ عروسه، الي صار معي كان انه ما دخل القاعه الناس كانت تنتظر وتنتظر وتأخر الوقت اخر شي جات وحده من خالاته وقالت خليك عاقله واطلعي لزوجة بهدوء
هذا الشي عندنا كان إهانة كبيره لي ولاهلي ومع هذا ما عاندت وقمت كان زفافي مثل الكابوس الي كنت بس اتمنى ينتهي
ركبت السياره مع زوجي وأمه عند راسه وتقوله (برد خاطري) ما انسى وجهها ولا نظرتها
كان الاتفاق بين اهلي واهله انه ابوه راح يعطيه شقه فوحده من عماراته عشان نسكن فيها، وكان المفروض نروح فندق ٣ ايام بعدها نروح على الشقة
زوجي طول هالفتره وهو مو طبيعي، بس كنت اقول يمكن من الضغط الي محصله من اهله
بعد ال٣ ايام وداني زوجي بيت اهلي عشان اسلم عليهم وأخذ الباقي من اغراضي عشان ننقل على شقتنا، لف على بيت اهلي يمكن عشرين مره بدون ما يوقف يقول خلينا نسولف شوي
نزلت عند اهلي وكأنو مسوين لي غدا وعازمين خالاتي وعماتي وفرحانين فيني
على المغرب ارسل لي زوجي على الواتساب "أنا أحبك، أنا أسف" " إنتي طالق"
تخيلو الصدمة الي جاتني والموقف الي كنت فيه
انا طبعا ما استحملت الموقف وجاني انهيار وتعبت جدا
زوجي قفل تلفونه وأهلي لما راحو يتفاهمو مع اهله ابوه كان رده "ايش اسوي هذا قرار الولد ما بيدي شي"
كانت صدمة وجرح عميق ما ادري اذا بيجي يوم واتشافى منه
بعد ما طلعت من المستشفى قدرت أتواصل مع زوجي وكان طول الوقت يستسمح مني ويقول سامحيني الي صار كان غصب عني !
انا كنت اعشقه مو بس احبه بس كان قلبي معورني على نفسي ف خليته ولا رديت عليه، حسيت بالإهانة والخداع ولحد اليوم هذا جرحي ما شفى
بعد فتره بسيطه انصدمت اني حامل ! شي ابدا ما توقعته لاني ما كملت اسبوع عند زوجي، بعد ما عرفت بالحمل كنت ميته من الخوف من المستقبل كيف اكون وحدي بعمر ال٢٠ سنة ومعي طفل !
زوجي لما عرف ما سوى شي ابد، كانو اهله ضاغطين عليه ومتحكمين فيه لآخر درجة وهو طبعا ما سوا شي غير يتطمن علي من فتره لفتره، حتى مصروف ما كان يعطيني مواعيدي أبوي كان يوديني عليها
مرت ٨ شهور بعدين صارت مشكله بيني وبين امي جلست تعايرني وطلعتني من البيت قالتلي بالحرف "روحي للي رماك انا ما اتحمل غلطة غيري"
وتصورو زوجي جاني ورجعني ورحنا ندور من فندق لفندق كل يوم نجلس ف مكان لغاية ما اخذ شقه من ابوه وجلسنا فيها وجبت بنتي وعشت معه
فالفتره الي انا عايشه معه فيها اهله ما خلّصونا ف حالنا ابدا من مشاكل وتعبئة راس
حتى بنتي مرات كانو يرمو كلام انه ما نبيها عشان انا أمها
انا كان مو هامني لانه معي زوجي
صارت اشياء كثيره بيننا وبينهم وهم كل مره يضغطو عليه بشي كل مره يساوموه بشي جديد عشان يطلق
الأمور كانت هاديه فالبدايه بعدين بدت المشاكل بيننا تزيد بسبب الضغوطات الخارجية
بديت اكره زوجي وأكره انه ما عنده كلمه عند اهله اكره كيف سوا فيني ورماني بعد ٣ ايام وانا مالي ذنب
كنا ف مشاكل مستمرة لغاية ما جا اليوم الي انا انفجرت فيه وتضاربنا انا وزوجي لدرجة مد اليد وقدام بنتي الي عمرها ما كمل سنتين وانا حامل
هو ضربني وانا رديت لاني كنت أدافع عن نفسي وأظافري سوت علامة على وجهه
طلع من عندي وراح لاهله واهله خلوه يقدم بلاغ اني انا تهجمت عليه وطبعا الي صار كان فرصه وجات لين عندهم عشان يتخلصو مني للأبد
انا بعد ما طلع زوجي نومت بنتي وبديت انزف خفت حاولت أكلمه ما كان يرد علي
اتصلت على أبوي ما رد علي لانه نايم كان الوقت متاخر ما كان عندي حد وبدت الآلام تقطعني، خذيت بنتي ورحت امشي على رجولي للمستشفى وهو أكلمه يسكر ف وجهي ارسلتله اني انزف ورايحه المستشفى قالي انتي كذابه
المستشفى مو كثير بعيد عن مكان شقتي وصلت هناك وانا ابكي واصارخ من الالم كان عندي انفصال جزئي فالمشيمة وانا فالشهر الرابع
زوجي لما حس الموضوع جد جاني بس كان جاف معي جدا وانا ابكي من الالم
طلعت من المستشفى وصلني البيت وقال انا رايح لاهلي وبجلس هناك انتي روحي لأهلك لانه خلاص بنتطلق
هنا انا انهرت ما ابي اتطلق مره ثانيه كيف بربي الاطفال لحالي وامي ما وراح ترحمني ما راح اتحمل اجلس عند اهلي
جلست أترجاه كثير بعدين صار يبكي يقول ما بيدي اهلي راح يقاطعوني اذا ظليت معك
هنا حسيت كل شي صار قبل جالس ينعاد كلامه وطريقة تصرفه كلها جالسه تنعاد مره ثانيه !
المشكله صارلها يومين انا للحين فالشقه مع بنتي وهو عند اهله
امس جا مرتين وكل مره يجي يجلس يبكي ويقول انا ورطت نفسي وما ادري ايش اسوي مع اهلي الحين
هو ما يبي يطلقني وانا ما ابي اتطلق بس اهله هم المسيطرين على الوضع للمرة الثانية
انا بجد ما عارفه أتصرف ابد والله اني ما اكل ولا اشرب وبس ابكي على الي صار اقول يا ليتني مسكت أعصابي بس ف نفس الوقت اشوف انه الموضوع ابدا ما مستاهل كذا
اهله ما مخلينه الا يطلق عشان كرامته، وماسكينها علي اني انا مديت يدي عليه مع اني والله كنت بس ابي أبعده عني
بنات على كل الي صار انا احب زوجي وهو يقول جالس يدور على حل كيف أتصرف قولولي ؟
ادري طولت عليكم بس كان لازم احكي من البدايه عشان تفهمو وضعي زين
أرجوكم ردو علي بحكمه وبدون تجريح