ما احصل على ها الاشياء التافهه الا بحرب وجهد جهيد

مساء الخير. ابشرح لكم المشكله انه حنا الوالد تارك لنا مبلغ رحمه الله يعني مال احد منه علينا يعني ناكل من فلوسنا وحلالنا المهم حنا عندنا خدمة التوصيل البقاله ممنوعه من قبل اخواني منع بات لو يشوفون الي يوصل كان يهاوشونه ويقلبون علينا البيت فا اخوي الصغير والي اكبر منه هم الي يتكفلون يجيبون الاغراض للبيت كل واحد له يوم بتقولون وين المشكله المشكله اني انا اذا طلبت شي وهو بسيط زي مثلا جبن او حليب او عصير او اندومي او اي شي ما ينجاب لي الا بشق الانفس كذا مره اطلب وتجاب كل الاغراض البيت ماعدا الي انا طالبته وشعذرهم مره ان الاغراض كثيره وماقدرنا نلحق ومره نسينا ومره ارسلت رساله لخوي في الوتس اب قلت جبلي كذا وكذا اذا جبت الاغراض تفاجئت انه جاب اغراض البيت ماعدا الي انا طالبه وشعذره ليش ما نزلتي لي بنفسك وقلتي بلسانك وكتبتي في ورقة الاغراض وخواني هذولا اصغر مني بعشر سنوات او اقل بس الواحد عصبي مره لو يروح يشتري اغراض يعصب كنه رايح يشتريها زحف على بطنه والله يا بنات اني منقره من ها الحاله تخيلو اطلب شي واجلس اربع ايام ماينجاب لي وفي الاخير اعصب ويدق الشيطان طبوله في البيت ولويه وحالتنا حاله وامي يرتفع ضغطها او ماينجاب الشي لي الا بواسطات وغرابيل ماباقي الا نرفع قضيه يعني بختصار ما احصل على ها الشي الا بشق الانفس. لا وشي تافه مايسوى زي كاس جبنه صغير او اندومي بريال او بطاقه ب10 كل يوم ما انام الا متضايقه وكل يوم اشيل هم الاغراض احسني كني اكل من كيس غيري وبذل بعد مو من حلالي