ما بقى براسي شعر الله يكسر ايده

جد اليوم انصدمت للان مفجوعه وابحث عن السبب اللي خلاه يسوي سواته اللي تسود الوجه
اليوم زوجي بدون سبب منطقي مسكني بشعري وسحب فيني البلاط وانا مصدومه
بقولكم السالفه من اولها والله شاهد على اللي بقوله صدق ولا رح اكذب بحرف
بداية السالفه انا من توظفت وانا اتعب تعب مو طبيعي بعد ما اطلع من الشغل الساعه ٥ اتوجه للبيت يكون اطفالي رجعو مع ابوهم واحد يطلع مع باص ويرجع على الساعه ١والثاني صغير تمهيدي ياخذه معه اذا طلع الدوام ويرجعه معه يجلس معه لين يجو البقيه وياكلون اكل مجهزته الصباح قبل لا اطلع احطه بالصاله وبعدها ينامون لحد ماارجع اذا رجعت القى البيت حوسه وكل شي وسخ ابدا انظف وبعدها اجهز العشاء يعني على الساعه ٩ اكون مخلصه كل شي وزوجي بعد ما رجع احط عشاه بحافظه وانام واصحي على الساعه ٥ الفجر وهكذا لاحظت عليه يتذمر وضحت له قلت انا اتعب وانت ارجع مبكر يعني ٩ ونص بالبيت مو عاجبه يبيني اجلس ل ١١انتظره يعني العشاء على ١١ تو احطه قلت ما يناسبني مقدر اسهر المهم امس رجع ١٠ ونص حطيت له العشاء والله الشاهد تعبانه حطيت العشاء ومعها فواكه ومنظفه المطبخ لجل انام قال ابي عصير قلت انا تعبانه جايه تعبانه من الدوام وانا قلت لك الساعه ١٠ بنام ورجعت للغرفه نمت وصحيت على الساعه ٩ واهو صحاء كنت اسوي قهوه وفطور واسمعه ينادي يا بقره ويصفر حسيت نفسي كلب مو ادمي يصفر المهم طنشته لين خلصت القهوه وجبتها وادخل عليه يسب وطلب مني اجيب المركى واحط الصينيه عليها حطيت الصينيه بالارض وقلت لولده جيب المركى ومشيت اهو من طبعه ينسدح ويتقهواء واهو منسدح على جنبه وهذي من العيوب الكثيره اللي غاثتني فيه المهم واطلع من الصاله واسمعه يسب وقال والله لطلقك كنت بالمطبخ وارجع وانا اقول تكفى طالبتك لا تطلقني انا اقولها كتمسخر لان انا من زمان اطلبه يطلقني واهو يهددني بالطلاق مدري كيف يفهم يعني تهددني بشي انا ابيه المهم وتو ما وصلت الباب الا صرت بعالم ثاني كل شي اسود انقض علي مثل الثور الهايج ويمعط شعري جلست لحظات لحد ما استوعبت انه يضربني وقدام عيالي المهم استوعبة وقدرت افك نفسي واخذ عصاء المكنسه واضربه وتنكسر ويرجع يمسكني مره ثانيه وافك نفسي مسكته مع حلقه وانا فيني غبنت السنين كلها طلعت وارجع المطبخ واخذ عصاء ثانيه واهو الاخ رجع يتقهواء يظن اني هربانه منه دخلت عليه وجلست اضرب واهو جالس يناظر في لانه يعرف انه غلط علي لحد ما حسيت اني اخذت حقي ما انخلقت وطلعت من بيت اهلي المكرميني حتى ينقال لي بقره وكاني خدامه بالبيت وبعدها قلت له ودني اهلي اهلي بعيد قالي ضفي قشك بعد ما جهزت الشناط جلس يماطل وبيت اختي قريب قلت ودني بيت اختي يماطل بعدها انا اخذت اكياس واخذت اغراضي المهمه انا وعيالي بكياس وطلعت بيت اختي
وبوضح بعض النقاط حتى ما تجي وحده وتقول انتي قليلة ادب مديتي يدك على زوجك
النقطه الاولى زوجي سئ العشره وبخيل جدا وصابره صبر ما يعلم فيه الا الله
ثاني نقطه زوجي خائن جواله مليان حريم ويمشي يخطب ويرفضونه واخرها امس خاطب من ناااس ورفضوه امس وهذا اللي خلاه يتهجم علي من قهره وهذا الشي مالي يد فيه غير اني ادعي عليه ولانه ظالمني تسكرت بوجهه
والشي الثالث زوجي شخص وسخ بالسان وفي نفسه وكسول لدرجه انه اذا جاء ينام ياخذ معه قاروره فاضيه يبول فيها يتكاسل يروح الحمام ويمشي بالبيت عاري لحد ما يوصل الحمام وهذا الشي اتعبني نفسيا انا احب النظافه واحب كل شي بحدود انا عندي اطفال وبدو يكبرون مابيهم يشوفونه عااري بالذات ان عندي بنت صغيره
انا قبل لا يتزوجني كان منفصل من ثنتين وبعذرهن شخص بهذي المواصفات محد يقدر يتحمله
وبنهايه ادعولي الله يسر امري اذا الطلاق خيره لي يعجله باااسر وقت واذا رجعه له يكون شخص ثاني وعارف غلطه انا ناويه اسحب عليه كم شهر لحد ما اتخذ قراري وخضرت رقمه